ନୂଆଦିଲ୍ଲୀ: ସାମଗ୍ରୀ ବିତରଣ ସହିତ ‘ଲଜିଷ୍ଟିକ୍’ ସୁବିଧା ଯୋଗାଉଥିବା କମ୍ପାନୀ ଇକମ୍ ଏକ୍ସପ୍ରେସ୍ ଆସନ୍ତା କିଛି ସପ୍ତାହ ମଧ୍ୟରେ ୩୦ ହଜାର ଲୋକଙ୍କୁ ନିଯୁକ୍ତି ଦେବାକୁ ଯୋଜନା କରିଛି। ତେବେ, କମ୍ପାନୀ ଅନୁଯାୟୀ ଏହି ଚାକିରୀ ଗୁଡ଼ିକ ଅସ୍ଥାୟୀ ହେବ। ଆଗକୁ ଆସୁଥିବା ଉତ୍ସବର ରୃତୁ ଦଶହରା, ଦୀପାବଳୀ ପାଇଁ ଇ-କମର୍ସ କମ୍ପାନୀ ଗୁଡ଼ିକର ବର୍ଦ୍ଧିତ ଚାହିଦା ପୂରଣ ପାଇଁ କମ୍ପାନୀ ନୂତନ ଲୋକଙ୍କୁ ନିଯୁକ୍ତ କରିବାକୁ ଯୋଜନା କରିଛି। କୋଭିଡ -୧୯ ପୂର୍ବରୁ କମ୍ପାନୀର କର୍ମଜୀବୀ ସଂଖ୍ୟା ପ୍ରାୟ ୨୩ ହଜାର ଥିଲେ। ଲକଡାଉନ୍ ଏବଂ ପରବର୍ତ୍ତୀ ଅନଲାଇନ୍ ଅର୍ଡର ପୂରଣ ପାଇଁ କମ୍ପାନୀ ଗତ କିଛି ମାସ ମଧ୍ୟରେ ୭,୫୦୦ କର୍ମଚାରୀଙ୍କୁ ନିଯୁକ୍ତି ଦେଇଥିଲା। ଲୋକମାନେ କୋଭିଡ -୧୯ ମଧ୍ୟରେ ଖାଦ୍ୟ ସାମଗ୍ରୀ, ମେଡିସିନ ଏବଂ ଅନ୍ୟାନ୍ୟ ଜିନିଷ ପାଇଁ ଇ-ବାଣିଜ୍ୟ ଆଡ଼କୁ ଯାଉଥିବା ଜଣାପଡ଼ିଛି। ଇକମ୍ ଏକ୍ସପ୍ରେସର ବରିଷ୍ଠ ଉପାଧ୍ୟକ୍ଷ ତଥା ମୁଖ୍ୟ ମାନବ ସମ୍ବଳ ଅଧିକାରୀ ସୌରଭ ଦୀପ ସିଙ୍ଗଲା କହିଛନ୍ତି ଯେ ଏହି ମହାମାରୀ ଇ- ବାଣିଜ୍ୟ ଶିଳ୍ପକୁ ଏକ ଭିନ୍ନ ସ୍ତରକୁ ନେଇଛି। ଆମର ଇ- ବାଣିଜ୍ୟ ଗ୍ରାହକମାନେ ପର୍ବ ସମୟରେ ବହୁତ ଆକ୍ରମଣାତ୍ମକ ଯୋଜନା କରୁଛନ୍ତି। ଆମେ ନିଶ୍ଚିତ କରିବାକୁ ଚାହୁଁଛୁ ଯେ ସେମାନେ ଚାହିଦା ପୂରଣ କରିପାରିବେ। ଆମେ ନିଯୁକ୍ତି ଆରମ୍ଭ କରିଦେଇଛୁ। ଏହି ପ୍ରକ୍ରିୟା ଅକ୍ଟୋବର ୧୦ ପର୍ଯ୍ୟନ୍ତ ଜାରି ରହିବ ଏବଂ ପର୍ବ ସମୟରେ ଆମେ ୩୦,୦୦୦ ଅସ୍ଥାୟୀ ନିଯୁକ୍ତି ସୃଷ୍ଟି କରିବାକୁ ଆଶା କରୁଛୁ।
ଅଗଷ୍ଟରେ କମ୍ପାନୀର କର୍ମଜୀବୀଙ୍କ ସଂଖ୍ୟା ୩୦,୫୦୦ ଥିଲା। କମ୍ପାନୀ କହିଛି ଯେ ଗତ ବର୍ଷ ଆମେ ପର୍ବ ପୂର୍ବରୁ ୨୦ ହଜାର ଲୋକଙ୍କୁ ନିଯୁକ୍ତି ଦେଇଥିଲୁ। ଯଦିଓ ଏହି ଚାକିରୀ ଗୁଡ଼ିକ ଅସ୍ଥାୟୀ ଥିଲା, କିନ୍ତୁ ତନ୍ମଧ୍ୟରୁ ପ୍ରାୟ ଏକ ତୃତୀୟାଂଶ ଚାକିରୀ ସ୍ଥାୟୀ ହୋଇଗଲାଣି। କାରଣ ଆମେ ପର୍ବ ପରେ ମଧ୍ୟ ଅର୍ଡର ବୃଦ୍ଧି ଦେଖୁଛୁ। ଇ- କମର୍ସ କମ୍ପାନୀ ଗୁଡ଼ିକ ବିଶ୍ୱାସ କରୁଛନ୍ତି ଯେ ପର୍ବ ସମୟରେ ସେମାନଙ୍କର ବ୍ୟବସାୟର ଏକ ବଡ଼ ଅଂଶ ଆସିବ ଏବଂ ସେମାନେ କ୍ଷମତା ବୃଦ୍ଧି କରିଛନ୍ତି। ଏକ ଉତ୍ତମ ଉପାୟରେ ଅର୍ଡର ପରିଚାଳନା କରିବା ପାଇଁ ଏକ ବଡ଼ ବିନିଯୋଗ କରିଛନ୍ତି। ୱାଲମାର୍ଟର ମାଲିକାନା ଫ୍ଲିପକାର୍ଟ ଯୋଗାଣ ଶୃଙ୍ଖଳାକୁ ମଜବୁତ କରିବା ଏବଂ ବିତରଣ କ୍ଷମତା ବଢ଼ାଇବା ପାଇଁ ନିକଟରେ ୫୦ ହଜାରରୁ ଅଧିକ କିରାଣୀ ଦୋକାନ ଯୋଗ କରିଛି। ସେହିପରି ଆମାଜନ ଇଣ୍ଡିଆ ପାଞ୍ଚଟି କେନ୍ଦ୍ର (ବିଶାଖାପାଟନମ୍, ଫାରୁଖନଗର, ମୁମ୍ବାଇ, ବାଙ୍ଗାଲୋର ଏବଂ ଅହମ୍ମଦାବାଦ) ଯୋଗ କରିବାକୁ ଘୋଷଣା କରିଛି। ଏହାର ୮ଟି କେନ୍ଦ୍ରର ସମ୍ପ୍ରସାରଣ ମଧ୍ୟ ଘୋଷଣା କରିଛି। ଇକମ୍ ଏକ୍ସପ୍ରେସର ଉପାଧ୍ୟକ୍ଷ ସୌରଭ ଦୀପ ସିଙ୍ଗଲା କହିଛନ୍ତି ଯେ ମେଟ୍ରୋ ବ୍ୟତୀତ ଛୋଟ ସହରରେ ମଧ୍ୟ ଇକମ୍ ଏକ୍ସପ୍ରେସ୍ ନିଯୁକ୍ତି ସୃଷ୍ଟି କରିବ। ଦେଶର ଦୂରବର୍ତ୍ତୀ ଅଞ୍ଚଳରେ ସାମଗ୍ରୀ ବିତରଣ ଉପରେ ମଧ୍ୟ କମ୍ପାନୀ ଦୃଷ୍ଟି ରଖିଛି। ଯେଉଁଥିପାଇଁ ଛୋଟ ଏବଂ ମଧ୍ୟମ ସହରରେ ମଧ୍ୟ ନିଯୁକ୍ତି କରାଯିବ। /- DevDr
