Home ଜିଲ୍ଲା ପରିକ୍ରମା ଧୂଷୁରୀ– ଗୋପବନ୍ଧୁନଗର ରାସ୍ତାରେ ନବନିର୍ମିତ କଲଭର୍ଟର ଆପ୍ରୋଚ୍ ରୋଡ୍ ଭୁଶୁଡ଼ିଲା, ଏକ କୋଟିରୁ ଊର୍ଦ୍ଧ୍ୱ ଟଙ୍କାର...

ଧୂଷୁରୀ– ଗୋପବନ୍ଧୁନଗର ରାସ୍ତାରେ ନବନିର୍ମିତ କଲଭର୍ଟର ଆପ୍ରୋଚ୍ ରୋଡ୍ ଭୁଶୁଡ଼ିଲା, ଏକ କୋଟିରୁ ଊର୍ଦ୍ଧ୍ୱ ଟଙ୍କାର ପ୍ରକଳ୍ପର ନିର୍ମାଣ ମାନକୁ ନେଇ ଉଠିଲା ପ୍ରଶ୍ନ, ଉଚ୍ଚସ୍ତରୀୟ ତଦନ୍ତ ଓ ସ୍ଥାୟୀ ମରାମତି ଦାବି

2

ଭଦ୍ରକ, ୧୯ା୧୧ (ଓଡ଼ିଆ ପୁଅ / ସ୍ନିଗ୍ଧା ରାୟ) – ଭଦ୍ରକ ଜିଲା ଧାମନଗର ବ୍ଲକ ଅନ୍ତର୍ଗତ ଧୂଷୁରୀ ଠାରୁ ଗୋପବନ୍ଧୁନଗର ହସନାବାଦ ଦେଇ ଯାଜପୁରକୁ ସଂଯୋଗ କରୁଥିବା ପ୍ରମୁଖ ରାସ୍ତାରେ ନବନିର୍ମିତ କଲଭର୍ଟ ର ଆପ୍ରୋଚ ରୋଡ୍ ଭୁଶୁଡ଼ି ପଡ଼ିବା ଘଟଣାକୁ ନେଇ ସ୍ଥାନୀୟ ଅଂଚଳରେ ଅସନ୍ତୋଷ ପ୍ରକାଶ ପାଇଛି। ଏକ କୋଟିରୁ ଊର୍ଦ୍ଧ୍ୱ ଟଙ୍କା ବ୍ୟୟରେ ନିର୍ମିତ ଏହି କଲଭର୍ଟ ର ଆପ୍ରୋଚ ରୋଡ୍ ମାତ୍ର ୨ ରୁ ୪ ମାସ ମଧ୍ୟରେ ଭୁଶୁଡ଼ି ପଡ଼ିବା ଘଟଣା ନିର୍ମାଣ କାର୍ଯ୍ୟର ଗୁଣାତ୍ମକ ମାନକୁ ନେଇ ପ୍ରଶ୍ନବାଚୀ ସୃଷ୍ଟି କରିଛି। ଏହି ରାସ୍ତା ଉପରେ ପ୍ରତିଦିନ ଶତାଧିକ ଲୋକ, ଛାତ୍ରଛାତ୍ରୀ, ରୋଗୀ, ବ୍ୟବସାୟୀ ଓ ସାଧାରଣ ଯାତ୍ରୀ ନିର୍ଭର କରିଥାନ୍ତି। ମାତ୍ର ନିର୍ମାଣର କିଛି ମାସ ନପୂରୁଣୁ କଲଭର୍ଟର ଆପ୍ରୋଚ୍ ରୋଡ୍ ଭୁଶୁଡ଼ି ଯିବା ସହ ରାସ୍ତାରେ ବଡ଼ ବଡ଼ ଖାଲ ସୃଷ୍ଟି ହୋଇଛି। ଫଳରେ ଯାତାୟାତ ଗୁରୁତର ଭାବେ ବାଧାପ୍ରାପ୍ତ ହେଉଛି। ବିଶେଷକରି ରାତି ସମୟରେ ଏହି ରାସ୍ତା ଦେଇ ଯାତାୟାତ ବିପଦପୂର୍ଣ୍ଣ ହୋଇପଡ଼ୁଛି। ପ୍ରତିଦିନ ଛୋଟବଡ଼ ଦୁର୍ଘଟଣା ଘଟିବା ସହ ଖାଲଖମାରେ ଗାଡ଼ି ଫସି ଯାଉଥିବା ଅଭିଯୋଗ ହେଉଛି। ବୟସ୍କ ବ୍ୟକ୍ତି, ମହିଳା ଓ ଛାତ୍ରଛାତ୍ରୀମାନେ ଏହି ରାସ୍ତାରେ ଯାତାୟାତ କରିବାକୁ ଭୟଭୀତ ହେଉଛନ୍ତି। ଏହି ସମସ୍ୟାକୁ ନେଇ ମାନ୍ୟବର ଧାମନଗର ବିଧାୟକ ତଥା ଓଡ଼ିଶା ସରକାରଙ୍କ ଉଚ୍ଚଶିକ୍ଷା ମନ୍ତ୍ରୀ ଶ୍ରୀ ସୂରଜ ସୂର୍ଯ୍ୟବଂଶୀ ଙ୍କ ନିକଟରେ ଅଭିଯୋଗ ରଖାଯାଇଛି। ନବନିର୍ମିତ କଲଭର୍ଟ ଓ ଆପ୍ରୋଚ୍ ରୋଡ୍‌ର ଗୁଣାତ୍ମକ ମାନକୁ ନେଇ ଉଚ୍ଚସ୍ତରୀୟ ତଦନ୍ତ କରିବା ସହ ନିର୍ମାଣ କାର୍ଯ୍ୟରେ ତ୍ରୁଟି ଥିଲେ ଦାୟୀ ଠିକାଦାର ଓ ସମ୍ପୃକ୍ତ ଅଧିକାରୀଙ୍କ ଦାୟିତ୍ୱ ନିର୍ଦ୍ଧାରଣ କରିବାକୁ ଦାବି ହୋଇଛି। ଏଥିସହ ଯୁଦ୍ଧକାଳୀନ ଭିତିରେ ରାସ୍ତାର ସ୍ଥାୟୀ ମରାମତି କରାଯିବା ସହ ଭବିଷ୍ୟତରେ ଏଭଳି ସମସ୍ୟା ଯେପରି ନଉପୁଜେ ସେଥିପ୍ରତି ଦୃଷ୍ଟି ଦେବାକୁ ଜନସାଧାରଣଙ୍କ ପକ୍ଷରୁ ଦାବି ହୋଇଛି। ସାଧାରଣ ଲୋକଙ୍କ ନିରାପଦ ଯାତାୟାତ ସୁନିଶ୍ଚିତ କରିବା ଏବେ ପ୍ରଶାସନ ପାଇଁ ଏକ ବଡ଼ ଆହ୍ୱାନ ପାଲଟିଛି। ଏ ଦିଗରେ ବିଭାଗୀୟ ଯନ୍ତ୍ରୀ କହିଛନ୍ତି ଯେ ଆବଶ୍ୟକଠାରୁ ଅଧିକ ଭାରିଯାନ ଯାତାୟାତ କରୁଥିବାରୁ ଏପରି ପରିସ୍ଥିତି ସୃଷ୍ଟି ହେଲା।

LEAVE A REPLY

Please enter your comment!
Please enter your name here

Solve this *Time limit exceeded. Please complete the captcha once again.