ଭଦ୍ରକ, ୩୦ା୮ (ଓଡ଼ିଆ ପୁଅ / ସ୍ନିଗ୍ଧା ରାୟ) – ଭଦ୍ରକର ଦଶମୌଜା କେନାଲର ଘାଇ ଏବଂ ମାଲେରିୟାରୁ ଧଳି ପର୍ଯ୍ୟନ୍ତ ଯାଇଥିବା ନାଳରେ ଜଳସ୍ତର ବୃଦ୍ଧି ପାଇବା ଫଳରେ ମୁକୁନ୍ଦପୁର, ଝିଙ୍କିରୀୟା, ଆରସା ଓ ତାଳପଦା ଗ୍ରାମର ଚାଷୀମାନେ ଗମ୍ଭୀର ସଙ୍କଟର ସମ୍ମୁଖୀନ ହୋଇଛନ୍ତି। କେନାଲ ପାଣି ମାଡ଼ିଯିବା ଯୋଗୁଁ ଆଖପାଖର ବ୍ୟାପକ ଚାଷଜମି ଓ ତଳି ଯାହା ନୂତନ ଭାବେ ରୁଆ ହୋଇଥିଲା ତାହା ନଷ୍ଟ ହେବାକୁ ବସିଥିଲା। ସ୍ଥାନୀୟ ପ୍ରଶାସନର ନିଷ୍କ୍ରିୟତା ଓ ଉଦାସୀନତା ଯୋଗୁଁ ଚାଷୀମାନେ ନିରାଶ ହୋଇପଡ଼ିଥିବା ବେଳେ, ସେମାନଙ୍କ ଦୁଃଖକଷ୍ଟ ଦୂର କରିବାକୁ ଆଗେଇ ଆସିଥିଲେ ଯୁବ ସମାଜସେବୀ ଦେବୀ ପ୍ରସାଦ ପାଟ ଓ ମୁକୁନ୍ଦପୁର ଯୁବସଂଗଠନ। ଘଟଣା ସମ୍ପର୍କରେ ଜାଣିବା ମାତ୍ରେ ଦେବୁ ତୁରନ୍ତ ସ୍ଥିତିର ସମୀକ୍ଷା କରିବା ସହ ଯୁବସଂଘର ସଦସ୍ୟମାନଙ୍କୁ ନେଇ ଉଦ୍ଧାର କାର୍ଯ୍ୟ ଆରମ୍ଭ କରିଥିଲେ। ଉଚ୍ଚ କର୍ତବ୍ୟବୋଧ ଓ ସାହସିକତାର ପରିଚୟ ଦେଇ ଯୁବସଂଗଠନର କର୍ମକର୍ତାମାନେ ଦିନରାତି ଏକ କରି ଅସ୍ଥାୟୀ ଭାବେ ଏକ ବନ୍ଧ ନିର୍ମାଣ କରିବା ସହ ପାଣିର ସ୍ରୋତକୁ ଅଟକାଇବାରେ ସଫଳ ହୋଇଛନ୍ତି। ଏହି ତୁରନ୍ତ ପଦକ୍ଷେପ ଯୋଗୁଁ ସୋସାଇଟିର ଶହ ଶହ ଚାଷୀଙ୍କ ଫସଲ ଓ ଭବିଷ୍ୟତ ସୁରକ୍ଷିତ ହୋଇପାରିଛି। ସଙ୍କଟଜନକ ପରିସ୍ଥିତିରେ ପ୍ରଶାସନ ପଛଘୁଂଚା ଦେଇଥିବା ବେଳେ ମୁକୁନ୍ଦପୁର ଯୁବ ସଙ୍ଗଠନ ଏହି ଜନହିତକର କାର୍ଯ୍ୟ କରିବା ସେମାନଙ୍କୁ ସ୍ଥାନୀୟ ଅଂଚଳର ବୁଦ୍ଧିଜୀବୀ ପ୍ରଶଂସା କରିଛନ୍ତି।
