ଭଦ୍ରକ, ୨୯ା୮ (ଓଡ଼ିଆ ପୁଅ / ସ୍ନିଗ୍ଧା ରାୟ) – ଭଦ୍ରକ ଜିଲ୍ଲା ବାସୁଦେବପୁର ବ୍ଲକ ଅନ୍ତର୍ଗତ ବାଲିମେଦପୁର ପଂଚାୟତ ଅଂଚଳରେ ସାପ କାମୁଡ଼ାକୁ ନେଇ ଚାଂଚଲ୍ୟ ସୃଷ୍ଟି ହୋଇଛି। ସାପ କାମୁଡ଼ାରେ ଜଣେ ୨୫ ବର୍ଷୀୟ ଯୁବକ ଗୁରୁତର ହୋଇଥିବା ସୂଚନା ମିଳିଛି। ସୂଚନା ଅନୁଯାୟୀ, ବାଲିମେଦପୁର ପଂଚାୟତର କାଳନ୍ଦୀ ଜେନାଙ୍କ ପୁଅ ବିଜୟ ଜେନା (୨୫) ଶୁକ୍ରବାର ସନ୍ଧ୍ୟା ପ୍ରାୟ ୭ଟା ୩୦ ମିନିଟ୍ ସମୟରେ ରାସ୍ତାରେ ଛିଡ଼ା ହୋଇଥିବା ବେଳେ ଏକ ସାପ ତାଙ୍କୁ କାମୁଡ଼ିଥିଲା। ସାପ କାମୁଡ଼ିବା ପରେ ବିଜୟଙ୍କ ଅବସ୍ଥାକୁ ନେଇ ପରିବାର ଲୋକେ ଚିନ୍ତିତ ହୋଇପଡ଼ିଥିଲେ। ଘଟଣା ପରେ ପରିବାର ଲୋକେ ତୁରନ୍ତ ବିଜୟଙ୍କୁ ଚିକିତ୍ସା ପାଇଁ ବାସୁଦେବପୁର ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରକୁ ନେଇଯାଇଥିଲେ। ସାପଟିକୁ ମଧ୍ୟ ଏକ ପ୍ଲାଷ୍ଟିକ ଜାରରେ ରଖି ସାଙ୍ଗରେ ନେଇ ମେଡିକାଲରେ ପହଂଚିଥିବା ଜଣାପଡ଼ିଛି। ବାସୁଦେବପୁର ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ବିଜୟଙ୍କୁ ପ୍ରାଥମିକ ଚିକିତ୍ସା ଦିଆଯିବା ପରେ ତାଙ୍କ ଅବସ୍ଥାକୁ ଦୃଷ୍ଟିରେ ରଖି ଭଦ୍ରକ ଜିଲ୍ଲା ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରାଯାଇଥିବା ସୂଚନା ମିଳିଛି। ସାପଟିକୁ ପ୍ଲାଷ୍ଟିକ ଜାରରେ ନେବା ପରିବାରର ତୁରନ୍ତ ପଦକ୍ଷେପ ଥିଲେ ମଧ୍ୟ, ସାପକୁ ଧରିବା କିମ୍ବା ନିକଟକୁ ଯିବା ବିପଦଜନକ ହୋଇପାରେ। ସାପ କାମୁଡ଼ିଲେ ଯଥାଶୀଘ୍ର ଚିକିତ୍ସାଳୟରେ ପହଂଚିବା ହିଁ ସବୁଠାରୁ ଜରୁରୀ।
