ଭଦ୍ରକ, ୧୯ା୮ (ଓଡ଼ିଆ ପୁଅ / ସ୍ନିଗ୍ଧା ରାୟ) – ଏହି ଜିଲାର ଭଣ୍ଡାରିପୋଖରୀ ବ୍ଲକ୍ରେ ବନ୍ୟାଜଳରେ ଭାସିଆସିଥିବା ଏକ ବିରାଟକାୟ ଅଜଗର ସାପ ରାତିରେ ଉଦ୍ଧାର ହୋଇଛି। ପ୍ରାପ୍ତ ଖବରରୁ ଯାହା ଜଣାଯାଏ ବନ୍ଦାଳୋ-ମଢିଆଳି ପଂଚାୟତର ବୈତରଣୀ ନଦୀବନ୍ଧ ମହେଶପୁର ଗଡାଣି ନିକଟରେ ଗତ ରାତିରେ ୩ ଜଣ ବାଇକ୍ ଆରୋହୀ ଯାଉଥିବାବେଳେ ବନ୍ଧ ଉପରେ ଏକ ବିରାଟକାୟ ଅଜଗର ଅତିକ୍ରମ କରୁଥିବାବେଳେ ତାହା ଉପରେ ଗାଡି ଚଢାଇଦେଇଥିଲେ। ଅଜଗରଟି ହମ୍ପସ୍ ସଦୃଶ ରାସ୍ତା ଉପରେ ଗତି କରୁଥିଲା। ବାଇକ୍ ଆରୋହୀ ତାକୁ ହମ୍ପସ୍ ଭାବି ତାହା ଉପରେ ବାଇକ୍ ଚଢାଇଦେବା ପରେ ସାପଟି ଗୁଡେଇ ହୋଇଯିବାରୁ ତାକୁ ଅଜଗର ବୋଲି ଚିହ୍ନଟ କରି ଗ୍ରାମବାସୀଙ୍କୁ ଖବର ଦେଇଥିଲେ। ସାପଟି ନିକଟ ବୁଦାମୂଳକୁ ଯାଉଥିବାବେଳେ ଗ୍ରାମବାସୀମାନେ ସାହସର ସହ ତାକୁ କାବୁ କରି ବନ ବିଭାଗକୁ ଖବର ଦେଇଥିଲେ। ବନପାଳ ସୂର୍ଯ୍ୟକାନ୍ତ ପଣ୍ଡା, ବନରକ୍ଷୀ ପ୍ରିୟଙ୍କା ଦାସ ଓ କର୍ମଚାରୀମାନେ ଘଟଣାସ୍ଥଳରେ ପହଂଚି ସାପଟିକୁ ସୁରକ୍ଷିତ ଭାବେ ଉଦ୍ଧାର କରି ହଦଗଡ ଜଂଗଲରେ ଆଜି ଛାଡିଥିବାର ଜଣାପଡିଛି। ସାପଟି ୧୨ ଫୁଟ୍ ଲମ୍ବ ଓ ପ୍ରାୟ ୨୫ କିଲୋ ଓଜନ ହେବ ବୋଲି ବନକର୍ମଚାରୀମାନେ ସୂଚନା ଦେଇଛନ୍ତି। ଚଳିତ ବନ୍ୟାଜଳରେ ଜଂଗଲରୁ ବହୁ ସରୀସୃପ ଭାସିଆସୁଥିବାରୁ ସ୍ଥାନୀୟ ଅଂଚଳବାସୀ ସତର୍କ ରହିବାକୁ ବନବିଭାଗ ପକ୍ଷରୁ ଅନୁରୋଧ କରାଯାଇଛି।
