ଲଘୁଚାପ ଲଗାଣ ବର୍ଷାରେ ଧୋଇଗଲା ବୈତରଣୀ ନଦୀର ଶହେ ଫୁଟ୍ର ନଦୀବନ୍ଧ, ଷାଠିବାଙ୍କୁଡା ନଦୀବନ୍ଧରେ ସୃଷ୍ଟି ବିଶାଳ ଫାଟ ନେଇ ନଦୀକୂଳିଆ ଆତଙ୍କିତ
ଭଦ୍ରକ, ୨ା୮ (ଓଡ଼ିଆ ପୁଅ / ସ୍ନିଗ୍ଧା ରାୟ) – ଗତ ଦୁଇଦିନର ଲଘୁଚାପ ଜନିତ ଲଗାଣ ବର୍ଷାରେ ଏହି ଜିଲାର ଆରଡି ନିକଟସ୍ଥ ଷାଠିବାଙ୍କୁଡା ଠାରେ ଧୋଇଯାଇଛି ଶହେ ଫୁଟର ବୈତରଣୀ ନଦୀବନ୍ଧ । ଫଳରେ ବନ୍ଧରେ ଥିବା ପଥର ନଦୀ ଭିତରକୁ ଚାଲିଯିବା ସହ ବଡ ବଡ ଫାଟ ଦେଖାଦେଇଛି । ଯାହାକୁ ନେଇ ନଦୀକୂଳିଆ ଆତଙ୍କିତ ହୋଇପଡିଛନ୍ତି । ଉପରମୁଣ୍ଡ ଅର୍ଥାତ୍ ଆଖୁଆପଦା ନିକଟରେ ବୈତରଣୀ ନଦୀର ଜଳସ୍ତର ବିପଦ ସଂକେତ ଉପରେ ପ୍ରବାହିତ ହେଉଥିବାରୁ ଆସୁଥିବା ବଡ ବନ୍ୟାକୁ ନେଇ ଭୟଭୀତ ହୋଇପଡିଛନ୍ତି ଏହି ଅଂଚଳର ୪ଟି ପଂଚାୟତର ୨୦ଟି ଗ୍ରାମର ଲୋକେ । ବିଶେଷକରି ଚାଷ ନିମନ୍ତେ ଏବେ ଧାନତଳି କ୍ଷେତରେ ପଡୁଥିବାରୁ ବନ୍ୟାରେ ବହୁ କ୍ଷତି ହେବ ବୋଲି ଚାଷୀ ଏବେ ଚିନ୍ତାରେ ପଡିଛି । ଅନୁରୂପ ଆଖଣ୍ଡଳମଣି-କୁଆଖିଆ ୨୦ ନଂ ଜାତୀୟ ରାଜପଥର ବୋଡକ ନିକଟରେ ପାଖାପାଖି ୩ ଶହ ଫୁଟ୍ର ରାସ୍ତା ଗତବର୍ଷ ବନ୍ୟାରେ ଧୋଇଯାଇଥିବାରୁ ସ୍ଥାୟୀ ମରାମତି ବଦଳରେ ଏବେ ଅସ୍ଥାୟୀ ମରାମତି ହୋଇଥିବାରୁ ତାହା ବନ୍ୟାରେ ଭାସିଯିବାର ଆଶଙ୍କା ଦେଖାଦେଇଛି । ତେବେ ଜଳସେଚନ ବିଭାଗ ଏହି ଖବର ପାଇବା ପରେ ଧୋଇଯାଇଥିବା ବନ୍ଧକୁ ସୁରକ୍ଷା ଦେବାପାଇଁ ଯାଜପୁର ଜଳସଚେନ ବିଭାଗ ପକ୍ଷରୁ ଯୁଦ୍ଧକାଳୀନ ଭିତ୍ତିରେ ବାଲିବସ୍ତା ପକାଯାଉଥିବାର ଜଣାପଡିଛି ।
