ଭୁବନେଶ୍ୱର: ଥରେ ଜଣେ ରାଜା, ରାଜ ଦରବାରରେ ଉପସ୍ଥିତ ଥିବା ସମସ୍ତ ବିଦ୍ୱାନ ମାନଙ୍କୁ ପ୍ରଶ୍ନ କଲେ, ସଂସାରରେ ସବୁଠାରୁ ଭୟଙ୍କର ଚୋଟ ବା ତୀବ୍ର କାମୁଡ଼ା/ଦଂଶନ କାହାର? କିଏ କହିଲା ବିରୁଡ଼ିର, କିଏ କହିଲା ବିଛାର। କେହି କେହି ସାପ, ମହୁମାଛି ଆଦିଙ୍କର ଦଂଶନ/ଚୋଟ ତୀବ୍ର ବୋଲି କହିଲେ। ମାତ୍ର ରାଜା ଏ’ ସବୁ ଉତ୍ତରରେ ସନ୍ତୁଷ୍ଟ ହେଲେ ନାହିଁ। ଜିଜ୍ଞାସାପୂର୍ଣ୍ଣ ଦୃଷ୍ଟିରେ ରାଜା ଦରବାରରେ ଉପସ୍ଥିତ ଥିବା ବୃଦ୍ଧ ମନ୍ତ୍ରୀଙ୍କ ଆଡ଼କୁ ଚାହିଁଲେ। ବୃଦ୍ଧ ମନ୍ତ୍ରୀ ଜଣଙ୍କ ଏ’ ପର୍ଯ୍ୟନ୍ତ ସମସ୍ତଙ୍କର ଉତ୍ତର ନୀରବରେ ଶୁଣୁଥିଲେ। ରାଜାଙ୍କର ଜିଜ୍ଞାସାପୂର୍ଣ୍ଣ ଚାହାଣୀ ଦେଖି ସେ ତାଙ୍କ ଉଦ୍ଦେଶ୍ୟ ବୁଝି ପାରିଲେ, ଏବଂ କହିଲେ, ହେ ରାଜନ୍ ଆପଣ ତ’ ସମସ୍ତଙ୍କ ଠାରୁ ଉତ୍ତର ଶୁଣି ସାରିଲେଣି। ରାଜା କହିଲେ, ନାଁ, ଏ’ ସବୁ ଉତ୍ତର ସମସ୍ତେ କହୁଥିବା ଉତ୍ତର ଅଟେ। ମୁଁ ଆପଣଙ୍କଠାରୁ ଅନୁଭବସିଦ୍ଧ ଉତ୍ତର ଚାହୁଁଛି। ବୃଦ୍ଧ ମନ୍ତ୍ରୀ ଜଣଙ୍କ ହାତ ଯୋଡ଼ି କହିଲେ, ହେ ରାଜନ୍, ସତ କଥା ହେଉଛି ସଂସାରରେ ସବୁଠାରୁ ତୀବ୍ର ଭାବରେ ଦଂଶନ କରୁଥିବା ଦୁଇ ପ୍ରକାର ଜନ୍ତୁ ଅଛନ୍ତି। ସେମାନେ ହେଲେ ନିନ୍ଦୁକ ଏବଂ ତୋଷାମଦକାରୀ ବା ଚାଟୁକାର। ନିନ୍ଦୁକ ହେଲେ ପଛ ପଟୁ କାମୁଡ଼େ, ଯାହାର କାମୁଡ଼ାରେ ଆତ୍ମା ବିକଳ ହୋଇପଡ଼େ। କିନ୍ତୁ, ଚାଟୁକାର ବା ତୋଷାମଦକାରୀ ସମ୍ମୁଖରୁ କାମୁଡ଼େ। ଯାହାର କାମୁଡ଼ାରେ ଆତ୍ମା ନିଜର ଚେତନା ହରାଇ ବସେ।
ପୁରୀ ଶ୍ରୀମନ୍ଦିର ଐତିହ୍ୟ କରିଡର ପ୍ରକଳ୍ପ କାର୍ଯ୍ୟକୁ ନେଇ ବିବାଦ ଲାଗିରହିଛି। ରାଜ୍ୟ ସରକାରଙ୍କ ପକ୍ଷରୁ ଚାଲିଥିବା ଏପରି କାମକୁ ବେଆଇନ୍ ଦର୍ଶାଇ ଭୁବନେଶ୍ୱର ସାଂସଦ ତଥା ବିଜେପି ରାଷ୍ଟ୍ରୀୟ ପ୍ରବକ୍ତା ଅପରାଜିତା ଷଡ଼ଙ୍ଗୀ ବିରୋଧ କରି ଆସୁଛନ୍ତ। ଏ’ ଭିତରେ ରାଜ୍ୟ ସରକାର/ ପୋଲିସ୍ ପ୍ରଶାସନ ପକ୍ଷରୁ ବାରଣ ତଥା ବହୁ ଘାତ ପ୍ରତିଘାତ ସତ୍ତ୍ୱେ ପୁରୀ ଯାଇ ଜଗନ୍ନାଥ ଦର୍ଶନ କରି ଫେରିଛନ୍ତି ସାଂସଦ ଅପରାଜିତା ଷଡ଼ଙ୍ଗୀ। ତେବେ ରାଜ୍ୟ ସରକାର ବା ଶାସକ ବିଜେଡି ପକ୍ଷରୁ ଅପରାଜିତାଙ୍କୁ ବିରୋଧ କରାଯିବା ଯେତିକି ବଡ଼ କଥା ନୁହେଁ, ବଡ଼ କଥା ହେଲା ନିଜ ଦଳ ବିଜେପି ପକ୍ଷରୁ ଅପରାଜିତାଙ୍କୁ ଅସହଯୋଗ, ଏପରିକି ଏକ ପ୍ରକାର ବିରୋଧ କରାଗଲା। ଏଥିରେ ଦଳର କିଛି ଯା’ ଆସ ନାହିଁ, ଏହା ଅପରାଜିତାଙ୍କ ବ୍ୟକ୍ତିଗତ କାମ ବୋଲି କୁହାଗଲା। ଅପରାଜିତାଙ୍କ ଗସ୍ତ ସମୟରେ ପୁରୀ ବିଜେପି ବିଧାୟକ ଜୟନ୍ତ କୁମାର ଷଡ଼ଙ୍ଗୀ ଘରେ ଲୁଚି ରହିଲେ। ଧର୍ମେନ୍ଦ୍ର – ଅପରାଜିତା ଶୀତଳ ଯୁଦ୍ଧ ତଥା ବିଜେପି ଭିତରେ ଚାଲିଥିବା ଗୋଷ୍ଠୀ ବିବାଦ ଦାଣ୍ଡରେ ପଡ଼ି ହାଟରେ ଗଡ଼ିଲା।
ତେବେ, ଏ’ ଭିତରେ କିଛି ଧର୍ମେନ୍ଦ୍ର ପ୍ରଧାନଙ୍କ ଅନୁଗତ ଧର୍ମେନ୍ଦ୍ରଙ୍କ ପ୍ରତି ନିଜର ଆନୁଗତ୍ୟ ଦେଖାଇବାକୁ ଯାଇ ଏପରି ଚାଟୁକାରୀ କରୁଛନ୍ତି, ଯାହା ଧର୍ମେନ୍ଦ୍ର ପ୍ରଧାନଙ୍କ ପାଇଁ ଘାତକ ସାବ୍ୟସ୍ତ ହେବାରେ ଲାଗିଛି। ପ୍ରଥମେ ଜଣେ ସୋସିଆଲ୍ ମିଡିଆ ସଂଯୋଜିକା ଦଳର ରାଷ୍ଟ୍ରୀୟ ପ୍ରବକ୍ତା ଅପରାଜିତା ଷଡ଼ଙ୍ଗୀଙ୍କୁ ଟାର୍ଗେଟ୍ କରି ଅନେକ ଗୁଡ଼ିଏ କଥା ନିଜ ସୋସିଆଲ୍ ମିଡିଆ ଆକାଉଣ୍ଟରେ ପୋଷ୍ଟ୍ କଲେ। ସଂପୃକ୍ତ ଆଇଟି ସେଲ୍ ସଂଯୋଜିକା ଜଣଙ୍କ କେବଳ ଯେ ଅପରାଜିତାଙ୍କୁ ଟାର୍ଗେଟ୍ କରି ସୋସିଆଲ୍ ମିଡିଆରେ ପୋଷ୍ଟ୍ କଲେ ତାହା ନୁହେଁ, ସେ କୁଆଡ଼େ ସାଂସଦ ଅପରାଜିତାଙ୍କ ଉଦ୍ଦେଶ୍ୟରେ ଅନେକ ଅପଶବ୍ଦ କହିବା ସହ ତାଙ୍କ ଚରିତ୍ର ସଂହାର କଲା ପରି ଅନେକ ଗୁଡ଼ିଏ ଅରୁଚିକର ମନ୍ତବ୍ୟ ବିଭିନ୍ନ ମାଧ୍ୟମରେ ଦେଇଛନ୍ତି ବୋଲି ଜଣାପଡ଼ିଛି। ଏହି ଘଟଣା ଏବେ ଦଳ ଭିତରେ ଖୁବ୍ ଚର୍ଚ୍ଚା ଓ ଆଲୋଚନାର ବିଷୟ ପାଲଟିଛି। ଦଳ ପକ୍ଷରୁ ତାଙ୍କୁ ବାରଣ କରାନଯିବାକୁ ନେଇ ଏପରି ପୋଷ୍ଟ୍ କରିବାକୁ ହୁଏତ ତାଙ୍କୁ ସେପଟୁ ଲିଖିତ ନିର୍ଦ୍ଦେଶ ଆସିଥିଲା ବୋଲି ସାଧାରଣରେ ଏକ ଧାରଣା ସୃଷ୍ଟି ହୋଇଛି।ନଚେତ୍ ନିଜ ପ୍ରତି ହୁଏତ ମନ୍ତ୍ରୀଙ୍କ ଦୃଷ୍ଟି ଆକର୍ଷଣ କରାଇବାକୁ ଯାଇ ସେ ଏପରି କରିଥାଇ ପାରନ୍ତି ବୋଲି କୁହାଯାଉଛି।
ଏବେ ପୁଣି ଦଳର ଜଣେ ରାଜ୍ୟ ପ୍ରବକ୍ତା ଦଳର ରାଷ୍ଟ୍ରୀୟ ପ୍ରବକ୍ତାଙ୍କୁ ଟାର୍ଗେଟ୍ କରିଛନ୍ତି। ଅପରାଜିତାଙ୍କ ଉଦ୍ଦେଶ୍ୟରେ ଅଣଓଡ଼ିଆ ଶବ୍ଦ ବ୍ୟବହାର କରିଛନ୍ତି। ଧର୍ମେନ୍ଦ୍ରଙ୍କୁ ଟେକିଛନ୍ତି, ଅପରାଜିତାଙ୍କୁ ତଳେ ପକାଇବାକୁ ଚେଷ୍ଟା କରିଛନ୍ତି। କିନ୍ତୁ, ଏହି ଚାଟୁକାରୀ ଧର୍ମେନ୍ଦ୍ର ପ୍ରଧାନଙ୍କ ପାଇଁ ଅତ୍ୟନ୍ତ ଘାତକ ସାବ୍ୟସ୍ତ ହେଲା ପରି ଅନୁଭବ ହେଉଛି। କାରଣ ଅପରାଜିତାଙ୍କୁ ଟାର୍ଗେଟ୍ କରିଥିବା ସେହି ପ୍ରବକ୍ତା ଜଣଙ୍କ ଗତ ୨୦୧୯ ନିର୍ବାଚନ ପୂର୍ବରୁ ମୋଦୀଙ୍କ ପୋଷ୍ଟର ଉପରେ ଜୋତା ମାଡ଼ କରୁଥିଲେ। ସଂଘ (ଆରଏସ୍ଏସ୍)କୁ ଶକୁନି ମାମା କହି ବିଜେପି କେବେ ଆରଏସ୍ଏସ୍ ମୁକ୍ତ ହେବ ବୋଲି ପ୍ରଶ୍ନ କରୁଥିଲେ। ଆଉ ତାଙ୍କୁ ଧର୍ମେନ୍ଦ୍ର ଫୁଲତୋଡ଼ା ଦେଇ ଦଳକୁ କୋଳେଇ ନେଇଥିଲେ। ରାଜ୍ୟ ପ୍ରବକ୍ତା କରି ସଜେଇ ଦେଲେ। ଏମିତିରେ ଅପରାଜିତାଙ୍କ ଉଦ୍ଦେଶ୍ୟରେ ସେ ଅଣଓଡ଼ିଆ ଶବ୍ଦ ବ୍ୟବହାର କରିଛନ୍ତି। ଯାହାକି ଧର୍ମେନ୍ଦ୍ର ପ୍ରଧାନଙ୍କ ପତ୍ନୀ ମୃଦଳା ଠାକୂରଙ୍କୁ ସିଧା ବାଜୁଛି। ରାଜ୍ୟ ବିଜେପିର ଅନେକ ନେତାନେତ୍ରୀ ମୃଦଳା ଠାକୂରଙ୍କୁ ବଡ଼ ଗୁରୁତ୍ୱ ଦିଅନ୍ତି। ତାଙ୍କ ପରାମର୍ଶ ନିଅନ୍ତି। ଏମାନେ ଦିଲ୍ଲୀ ଗଲେ କିମ୍ବା ସେ ଓଡ଼ିଶା ଆସିଲେ ଏମାନେ ଯାଇ ହାଜିରା ପକାନ୍ତି। ମୃଦଳାଙ୍କ ଓଡ଼ିଆ ପ୍ରତି ବଖାଣନ୍ତି। ଏବେ କିନ୍ତୁ ରାଜ୍ୟ ପ୍ରବକ୍ତା ଅପରାଜିତାଙ୍କ ଉଦ୍ଦେଶ୍ୟରେ କହିଥିବା ଅଣ ଓଡ଼ିଆ ଶବ୍ଦ ମୃଦଳା ଠାକୂରଙ୍କ ପାଇଁ ମଧ୍ୟ ଲାଗୁ ହେବ।
ତୋଷାମଦକାରୀ କ୍ଷିପ୍ତ ଶ୍ୱାନ ପରି ସହଜେ ଚିହ୍ନା ନ’ ଯାଏ,
ଭୃତ୍ୟଭାବ ଧରି ଗୋଡ଼ ଚାଟୁଚାଟୁ ବିଷ ଲେପି ଦେଇଥାଏ।
@DevD
