ଭଦ୍ରକ, ୬ା୧୧ (ଓଡ଼ିଆ ପୁଅ / ସ୍ନିଗ୍ଧା ରାୟ) – ଭଦ୍ରକ ଜିଲା ତିହିଡିବ୍ଲକରେ ଗତ ଏକମାସରୁ ଉର୍ଦ୍ଧ୍ୱ ହେବ ବର୍ଷା ଛାଡ଼ି ଯାଇଥିବାରୁ ଚାଷଜମି ଏବେ ଶୁଖି ଫାଟିଗଲାଣି । ଯାହା ଫଳରେ ଧାନଚାଷ କ୍ଷତିଗ୍ରସ୍ତ ହେବା ଆଶଙ୍କା ରହିଛି । ଯେଉଁଥିପାଇଁ ଚାଷୀକୁଳ ଏବେ ହତାଶ ହୋଇପଡ଼ିଛନ୍ତି । ଅପରପକ୍ଷେ ଦଶମୌଜା କେନାଲ ସଂସ୍କାର ହୋଇନଥିବାରୁ କେନାଲର ପାଣି ତଳମୁଣ୍ଡରେ ପହଞ୍ôଚ ପାରୁନାହିଁ । ଯାହାଫଳରେ ବହୁ ପଞ୍ଚାୟତର ଧାନଚାଷ ପ୍ରଭାବିତ ହେବା ନିଶ୍ଚିତ ହୋଇଯାଇଛି । ଏବେ ଧାନରେ ଥୋଡ଼ ବାହାରିବା ସମୟ । ଏହି ସମୟରେ ବର୍ଷ ଛାଡ଼ିଯିବା ଚାଷୀଙ୍କ ପାଇଁ ଚିନ୍ତାର କାରଣ ହୋଇଛି । ଦଶମୌଜା କେନାଲରୁ ଚାଷ ଜମିକୁ ପାଣି ମାଡ଼ି ପାରୁନଥିବାରୁ ଚାଷୀମାନେ ଖର୍ଚ୍ଚାନ୍ତ ହୋଇ ପମ୍ପ ସହାୟତାରେ ଚାଷଜମିକୁ ପାଣି ମଡ଼ାଇବା ପାଇଁ ବାଧ୍ୟ ହେଉଛନ୍ତି । ଦୀର୍ଘଦିନ ହେବ ଦଶମୌଜା କେନାଲ ସଂସ୍କାର ପାଇଁ ଚାଷୀଙ୍କ ମହଲରୁ ଦାବି ହୋଇ ଆସୁଥିଲେ ମଧ୍ୟ ବିଭାଗୀୟ ଅଧିକାରୀ ଏଥିପ୍ରତି କୌଣସି ଦୃଷ୍ଟି ଦେଉନଥିବା ଅଭିଯୋଗ ହୋଇଛି । କେନାଲ ସଂସ୍କାର ହୋଇନଥିବାରୁ ବ୍ଲକର ଭାଟପଡା, ଫତେପୁର, କୋହ୍ଲ, ମଙ୍ଗଳପୁର, ସିନ୍ଦୋଳ, ଦୌଲତପୁର, ବାମନବିନ୍ଧା ଇତ୍ୟାଦି ପଂଚାୟତରେ ଦଶମୌଜା ପାଣି ପହଁଚି ପାରୁ ନାହିଁ । କେନାଲରେ ବିଲାତି ବୁର, ଦଳ ପୂର୍ଣ୍ଣ ହୋଇଥିବାରୁ ପାଣି ତଳମୁଣ୍ଡରେ ପହଞ୍ôଚ ପାରୁନଥିବା ଅଭିଯୋଗ ହୋଇଛି । ତେବେ ତୁରନ୍ତ କେନାଲ ସଫା କରାଯାଇ ତଳମୁଣ୍ଡରେ ଥିବା ଏହିସବୁ ପଞ୍ଚାୟତର ଚାଷ ଜମିକୁ ପାଣି ଯୋଗାଇ ଦେବାକୁ ଚାଷୀମାନଙ୍କ ପକ୍ଷରୁ ଦାବି କରାଯାଇଛି ।
