ଭଦ୍ରକ, ୨୭ା୧୧ (ଓଡ଼ିଆ ପୁଅ / ସ୍ନିଗ୍ଧା ରାୟ) – ପବିତ୍ର ରାହାସ ପୂର୍ଣ୍ଣିମା ପାଇଁ ସୋମବାର ଚଳଚଞ୍ଚଳ ହୋଇଉଠିଥିଲା । ଏହି ଅବସରରେ ବାବା ଆଖଣ୍ଡଳମଣିଙ୍କ ହରଗୌରୀ ବେଶ ଦର୍ଶନ ଓ ପୂଜାର୍ଚ୍ଚନା କରିବା ପାଇଁ ରାଜ୍ୟ ଓ ରାଜ୍ୟ ବାହାରୁ ୪୦ ହଜାରରୁ ଉର୍ଦ୍ଧ୍ୱ ଭକ୍ତଙ୍କ ସମାଗମ ହୋଇଥିଲା । ଧର୍ମର ମାସ କାର୍ତ୍ତିକରେ ବ୍ରତ ରଖିଥିବା ହଜାରର ହବିଷାଳୀ ଭକ୍ତ ଶିବଗଙ୍ଗା ପୁଷ୍କରିଣୀରେ ବୋଇତ ଭସାଇବା ସହ ହରିବୋଲ ହୁଳହୁଳ ଧ୍ୱନି ଦେଇ ବୁଡ ପକାଇଥିଲେ । ଏପଟେ ରାହାସ ନୀତି ପାଇଁ ଭୋର ୪ଟାରେ ମଣିବାବାଙ୍କ ଦ୍ୱାର ଫିଟାଯିବା ସହ ମଙ୍ଗଳ ଆଳତୀ, ଘର୍ଷଣଲାଗି, ମହାସ୍ନାନ, ପଞ୍ଚ ଉପଚାର ପୂଜା, ଦିଗମ୍ବର ବେଶରେ ପହିଳି ବାଲ୍ୟଭୋଗ ଲାଗି କରାଯାଇଥିଲା । ସକାଳ ୫ଟା ଠାରୁ ଶ୍ରଦ୍ଧାଳୁ ଭକ୍ତ ସ୍ୱତନ୍ତ୍ର ବ୍ୟାରିକେଟରେ ଯାଇ ମଣିବାବାଙ୍କୁ ଦର୍ଶନ କରିବା ସହ ପୂଜାର୍ଚ୍ଚନା କରିଥିଲେ । ମଧ୍ୟାହ୍ନ ୧ଟା ସୁଧା ସମସ୍ତ ସକାଳ ନୀତି ସରିବା ପରେ ମଣିବାବାଙ୍କୁ ପଞ୍ଚାନନ ବେଶ୍ ସଜ୍ଜିତ କରାଯାଇ ବଡ ଅନ୍ନନୀତି ଭୋଗ ଲାଗି କରାଯାଇଥିଲା । ପରେ ଏକଘଣ୍ଟା ଅବକାଶ (ଶୟନ) ନୀତି କରାଯାଇ ଅପରାହ୍ନ ୪ଟାରେ ଗମ୍ଭୀର ।
ଘର ସଫେଇ ପରେ ବାବାଙ୍କୁ ଓ ମାତା ପାର୍ବତୀଙ୍କୁ ଦୁର୍ଲଭ ହରଗୌରୀ ବେଶରେ ସଜ୍ଜିତ କରାଯାଇ ଭକ୍ତଙ୍କ ଦର୍ଶନ ପାଇଁ ସାହାଣମେଲା କରାଯାଇଥିଲା । ଭକ୍ତମାନଙ୍କର ଭିଡକୁ ଦୃଷ୍ଟିରେ ରଖି ଜିଲା ଓ ମନ୍ଦିର ପ୍ରଶାସନ ପକ୍ଷରୁ ବ୍ୟାପକ ବ୍ୟବସ୍ଥା କରାଯାଇଥିବା ବେଳେ ଆଖଣ୍ଡଳମଣି ଉଚ୍ଚ ବିଦ୍ୟାଳୟ ଓ ବାବାମଣି ଡିଗ୍ରୀ ମହାବିଦ୍ୟାଳୟର ଶତାଧିକ ଛାତ୍ରଛାତ୍ରୀ ଧାଡିରେ ଭକ୍ତମାନଙ୍କୁ ଶୃଙ୍ଖଳିତ ଦର୍ଶନ କରାଇଥିଲେ । ତାହା ସହ ଦର୍ଶନ ଓ ପୂଜାର୍ଚ୍ଚନା ପାଇଁ ସ୍ୱତନ୍ତ୍ର ବ୍ୟାରିକେଟ୍ ବ୍ୟବସ୍ଥା କରାଯାଇଥିବାବେଳେ ଶିବଗଙ୍ଗା ପୁଷ୍କରିଣୀରେ ଯେପରି ଭକ୍ତ ଓ ହଭିଷାଳିମାନେ ଶୃଙ୍ଖଳାର ସହ ବୋଇତ ଭସାଣ ଓ ସ୍ନାନ କରିବେ, ସେଥିପାଇଁ ପୁଷ୍କରିଣୀ ଚତୁଃପାଶ୍ୱର୍ରେ ଆଲୋକ ବ୍ୟବସ୍ଥା କରାଯାଇଥିଲା । ସନ୍ଧ୍ୟାରେ ସାଂସ୍କୃତିକ କାର୍ଯ୍ୟକ୍ରମ ମନ୍ଦିର ପରିସରରେ ଅନୁଷ୍ଠିତ ହୋଇଥିଲା । ମନ୍ଦିର ପରିଚାଳକ ବିଦ୍ୟାଧର ପଲାଇ, ଟ୍ରଷ୍ଟବୋର୍ଡ ସଭ୍ୟ ସନ୍ତୋଷୀ ପାଢୀ, ସରୋଜ ଦାସ ପ୍ରମୁଖ ମନ୍ଦିର ପରିସରରେ ରହି ସମସ୍ତ କାର୍ଯ୍ୟର ତଦାରଖ କରିଥିଲେ ।
