ଭଦ୍ରକ, ୯ା୪ (ଓଡ଼ିଆ ପୁଅ / ସ୍ନିଗ୍ଧା ରାୟ) – କୋଭିଡ୍ ମୁକାବିଲା ନିମନ୍ତେ ରାଜ୍ୟ ସରକାରଙ୍କ ନିର୍ଦ୍ଦେଶ କ୍ରମେ ଭଦ୍ରକ ଜିଲାରେ କରୋନା ଟୀକା ଦିଆଯାଉଛି । ପ୍ରଥମ ପର୍ଯ୍ୟାୟରେ ଭଦ୍ରକ ଜିଲାର ୫୨ଟି ସ୍ଥାନରେ ଏହି ଟୀକା ଦିଆଯାଉଥିବାବେଳେ ଆଜି ୩୦ଟି ସ୍ଥାନରେ ପ୍ରଦାନ କରାଯାଇଛି । ଆଜିସୁଦ୍ଧା ପ୍ରାୟ ୪ ହଜାର ଭ୍ୟାକ୍ସିନ ଦିଆଯାଇଥିବାବେଳେ ଆସନ୍ତାକାଲି ୧୫ଟି ସେଣ୍ଟରରେ ଏହି ଟୀକା ପ୍ରଦାନ କରାଯିବ । ତେବେ ଆସନ୍ତାକାଲି ପ୍ରାୟ ୧୦ ହଜାର ଟୀକା ପହଞ୍ଚୁଥିବାରୁ ଏହି ଟୀକା ବନ୍ଦ ହେବନାହିଁ ବୋଲି ଜଣାପଡିଛି । ତେବେ ଏହି ଟୀକା ପ୍ରଦାନ କାଳରେ ବହୁ ଜନସାଧାରଣ ସରକାରଙ୍କ କୋଭିଡ୍ ଗାଇଡ୍ଲାଇନ୍କୁ ଉଲ୍ଲଂଘନ କରୁଥିବାର ଦେଖାଯାଇଛି । ବିଶେଷକରି ଏହି ଟୀକା କେନ୍ଦ୍ରରୁ ଆସିବା ନେଇ ବିଳମ୍ବ ହେଉଥିବାରୁ ଲୋକେ ଏହା ବନ୍ଦ ହୋଇଯିବା ଆଶଙ୍କାରେ ବିଭିନ୍ନ କେନ୍ଦ୍ରରେ ଭିଡ କରୁଥିବାର ପରିଲକ୍ଷିତ ହେଉଛି । ଆଜି ଭଦ୍ରକ ସହରର ବାଘୁରାଇ ଉପସ୍ୱାସ୍ଥ୍ୟକେନ୍ଦ୍ରରେ ଏହି ଟୀକା ପ୍ରଦାନ କାଳରେ ବହୁ ଲୋକ ଲାଇନ୍ କରି ଅପେକ୍ଷା କରିଥିଲେ ମଧ୍ୟ ଜଣେ ମାତ୍ର ଟୀକା ପ୍ରଦାନକାରୀ ନର୍ସ ତାହା ଦେଉଥିବାରୁ ଲୋକମାନଙ୍କ ମଧ୍ୟରେ ଉତ୍ତେଜନା ସୃଷ୍ଟି ହୋଇଥିଲା । ବହୁ ଲୋକ ପୂର୍ବଦିନ ଅପରାହ୍ନରେ ଦୀର୍ଘସମୟ ଅପେକ୍ଷା କରି ଫେରିଯାଇଥିବାରୁ ଆଜି ଅତ୍ୟଧିକ ଭିଡ ପରିଲକ୍ଷିତ ହୋଇଥିଲା । ଏପରିକି କିଛି ଲୋକ ସାମାଜିକ ଦୂରତ୍ୱକୁ ନମାନି ଟୀକା ଦିଆଯାଉଥିବା ଗୃହମଧ୍ୟରେ ପ୍ରବେଶ କରିବା ଫଳରେ ଟୀକା ଦେଉଥିବା ନର୍ସ ଜଣକ ନିଜକୁ ଅସହାୟ ମଣିଥିଲେ । ଅନୁରୂପ ଜିଲା ପ୍ରଶାସନ ପକ୍ଷରୁ ପ୍ରବଳ ଗ୍ରୀଷ୍ମ ପ୍ରବାହ ଜନିତ ତାପରୁ ରକ୍ଷା ପାଇବା ପାଇଁ ବୟସ୍କମାନେ ରକ୍ଷା ପାଇବା ପାଇଁ କୌଣସି ବ୍ୟବସ୍ଥା ହୋଇନଥିଲା । ଫଳରେ ବହୁ ବୃଦ୍ଧ-ବୃଦ୍ଧା ପ୍ରବଳ ଖରାରେ ଠିଆ ହୋଇନପାରି ତଳେ ବସୁଥିବାର ଦେଖାଯାଇଥିଲା । ଏଣୁ ଏ ଦିଗରେ ଜିଲା ପ୍ରଶାସନ ଦୃଷ୍ଟି ଦେବାକୁ ସାଧାରଣରେ ଦାବି ହୋଇଛି ।
