ଭଦ୍ରକ, ୧୨ା୩ (ଓଡ଼ିଆ ପୁଅ / ସ୍ନିଗ୍ଧା ରାୟ) – ଜମି ପାଇଁ ଭଦ୍ରକରେ ଅଟକିଛି ବହୁ ଗୁରୁତ୍ୱପୂର୍ଣ୍ଣ ପ୍ରକଳ୍ପ । ଜବରଦଖଲକାରୀଙ୍କ କବଜାରେ ରହିଛି ବହୁ ସରକାରୀ ଜମି । ଜବରଦଖଲକାରୀଙ୍କ ପ୍ରତି କୌଣସି କାରଣରୁ କୋହଳ ମନୋଭାବ ପୋଷଣ କରି ନିଜ ଜମିର ଦଖଲ ନେବାକୁ ନ୍ୟାୟାଳୟକୁ ଦୌଡ଼ି ଚାଲିଛି ପ୍ରଶାସନ । ଯାହାର ସ୍ପଷ୍ଟ ଚିତ୍ର ଦେଖିବାକୁ ମିଳିଛି ଭଦ୍ରକ ପୌରାଞ୍ଚଳର ବାଗୁରାଇ ଠାରେ ନିକଟରେ ଲୋକାର୍ପିତ ହୋଇଥିବା ଅମୃତ ପାର୍କ କ୍ଷେତ୍ରରେ । ଉକ୍ତ ପାର୍କ ପାଇଁ ଉଦ୍ଦିଷ୍ଟ ଏକ ସିଂହଭାଗ ଜମିକୁ ଫେରି ପାଇବାକୁ ରାଜସ୍ୱ ବିଭାଗ ନୟାନ୍ତ ହେବା ପରେ ଏକ ସଂକୀର୍ଣ୍ଣ ଅଞ୍ଚଳର ଜମି ଉପରେ ଉକ୍ତ ପାର୍କ ପ୍ରତିଷ୍ଠା କରିଛନ୍ତି ପୌର କର୍ତ୍ତୃପକ୍ଷ । ସୂଚନା ଅନୁଯାୟୀ ଗତ ପୌର ପରିଷଦ ସମୟରେ ବାଗୁରାଇ ସମେତ ଚରମ୍ପାର ରହଣିଆ, ମଠସାହି ଦକ୍ଷୀଣକାଳୀ ମନ୍ଦିର ନିକଟ, ଗରଦପୁର, କୁଆଁସ ପରି ୫ଟି ସ୍ଥାନରେ ଅମୃତ ଯୋଜନାରେ ପାର୍କ ନିର୍ମାଣ ପାଇଁ ପ୍ରସ୍ତାବ ଗୃହୀତ ହୋଇଥିଲା । ରହଣିଆ ଠାରେ ଏକ ଏକରରୁ ଉର୍ଦ୍ଧ୍ୱ ଜମି ଉପରେ ୬୫ ଲକ୍ଷ ଟଙ୍କା ବ୍ୟୟରେ ପ୍ରଥମ ପାର୍କ ଲୋକାର୍ପିତ ହୋଇଥିବାବେଳେ, ମଠସାହି ଠାରେ ୪୩ ଲକ୍ଷ ଟଙ୍କାରେ ଦ୍ୱିତୀୟ ଓ ଗରଦପୁର ଠାରେ ୩୦ ଲକ୍ଷ ଟଙ୍କା ବ୍ୟୟରେ ତୃତୀୟ ଅମୃତ ପାର୍କ ଲୋକାର୍ପିତ ହୋଇଥିଲା । ତେବେ ଗତ ୮ତାରିଖ ବାଗୁରାଇ ଠାରେ ସହରର ଚତୁର୍ଥ ପାର୍କକୁ ଭଦ୍ରକ ସାଂସଦ ମଞ୍ଜୁଲତା ମଣ୍ଡଳ ଓ ବିଧାୟକ ସଂଜୀବ ମଲ୍ଲିକ ଉଦଘାଟନ କରି ସହରବାସୀଙ୍କ ଉଦ୍ଦେଶ୍ୟରେ ଉତ୍ସର୍ଗ କରିଛନ୍ତି । ତେବେ ଉକ୍ତ ପାର୍କର ଭିତ୍ତିଭୂମିକୁ ନେଇ ସାଧାରଣ ଲୋକ କ’ଣ ସ୍ଥାନୀୟ ଲୋକେ ମଧ୍ୟ ସନ୍ତୁଷ୍ଟ ନୁହନ୍ତି । ମାତ୍ର ୧୨ରୁ ୧୪ ଡିସିମିଲ ଜମି ଉପରେ ଏହି ପାର୍କ ସ୍ଥାପନ ହୋଇଥିବାବେଳେ, ଏଥି ନିମିତ୍ତ ଖର୍ଚ୍ଚ ହୋଇଛି ମାତ୍ର ୧୬.୬୭ ଲକ୍ଷ ଟଙ୍କା । ପୂର୍ବରୁ ଏହି ସ୍ଥାନରେ ଥିବା ୪୦ଡିସିମିଲ ରାଜସ୍ୱ ବିଭାଗର ଜମି ଉପରେ ଅମୃତ ପାର୍କ ନିର୍ମାଣ ପାଇଁ ୨୦୧୭-୧୮ରେ ପୌର ପରିଷଦରେ ପ୍ରସ୍ତାବ ପାରିତ ହୋଇଥିଲା । ଉକ୍ତ ପରିମାଣର ଜମିକୁ ରାଜସ୍ୱ ବିଭାଗ ପୌର କର୍ତ୍ତୃପକ୍ଷଙ୍କୁ ହସ୍ତାନ୍ତର କରିବା ପରେ କାର୍ଯ୍ୟାରମ୍ଭ ପ୍ରକ୍ରିୟା ଆରମ୍ଭ ହେଲା । କିନ୍ତୁ ଆରମ୍ଭରୁ ଦେଖାଦେଲା ସମସ୍ୟା ।
ଉକ୍ତ ଜମିରୁ ପ୍ରାୟ ୩୦ ଡିସିମିଲରୁ ଉର୍ଦ୍ଧ୍ୱ ଜବରଦଖଲକାରୀଙ୍କ କବଜାରେ ରହିଥିଲା । ବିଭାଗୀୟ ଉଛେଦ ଉଦ୍ୟମ ସମୟରେ ସଂପୃକ୍ତ ଅଧିବାସୀ କୋର୍ଟର ଦ୍ୱାରସ୍ଥ ହୋଇଥିଲେ । ଯାହାକି ପ୍ରଥମେ ଭଦ୍ରକ ମୁନସଫ ଓ ଏବେ ଜିଲ୍ଲାଜଜ୍ କୋର୍ଟରେ ବିଚାରାଧିନ ରହିଛି । ତେଣୁ ଅନ୍ୟ କୌଣସି ଉପାୟ ନପାଇ ପୌର କର୍ତ୍ତୃପକ୍ଷ ୧୫ ଡିସିମିଲରୁ କମ୍ ଜମି ଉପରେ ପାର୍କ ନିର୍ମାଣ କରିଛନ୍ତି । ଫଳରେ ଏହା ଖୁବ ସଂକୀର୍ଣ୍ଣ । ଏକକାଳୀନ ୫୦ଜଣ ଲୋକ ମଧ୍ୟ ଉକ୍ତ ପାର୍କ ମଧ୍ୟରେ ବିଚରଣ କରିବା ସମ୍ଭବ ନୁହେଁ । ଏହି ପାର୍କ ମଧ୍ୟରେ ପଡ଼ି ରହିଛି ନେସ୍କୋର ବିଦ୍ୟୁତ ଖୁଣ୍ଟ । ଉଦଘାଟନ ପର୍ବର ଶେଷ ମୁହୂର୍ତ୍ତରେ ସ୍ଥାନୀୟ ଲୋକଙ୍କୁ ବୁଝାଇ ସୁଝାଇ କିଛି ଜମି ନିଜ ଅଧିନକୁ ଆଣିବାକୁ ସକ୍ଷମ ହୋଇଛନ୍ତି ସ୍ଥାନୀୟ ଅଞ୍ଚଳର ପ୍ରାକ୍ତନ କାଉନସିଲର ଦେବ୍ରବତ ମହାନ୍ତି । ଯେଉଁଥି ପାଇଁ ପାର୍କ ପରିସରରେ ଟମାଟୋ, ବାଇଗଣ ଗଛ ଥିବା ଦେଖିବାକୁ ମିଳିଛି । ତେବେ ନ୍ୟାୟାଳୟରେ ତାରିଖ ପଡ଼ୁଥିଲେ ମଧ୍ୟ ଉଦ୍ଦେଶ୍ୟମୂଳକ ଭାବରେ ଆବେଦନକାରୀ ସେଠାରେ ନପହଞ୍ଚି ସମୟ ଗଡ଼ାଇ ଚାଲିଛନ୍ତି ବୋଲି ଶ୍ରୀ ମହାନ୍ତି କହିଛନ୍ତି । ନ୍ୟାୟାଳୟଙ୍କ ଚୁଡ଼ାନ୍ତ ରାୟ ପରେ ଉକ୍ତ ପାର୍କର ସମ୍ପ୍ରସାରଣ କରାଯିବ ବୋଲି ଶ୍ରୀ ମହାନ୍ତି ଆଶାବାଦୀ । ମୋଟାମୋଟି ଭାବରେ ନିଜ ଜମି ପାଇଁ ନିଜେ ଲଢ଼ୁଛି ଅସହାୟ ପ୍ରଶାସନ । ଆଉ ପ୍ରଶାସନର ଏପରି ନିଷ୍କ୍ରିୟତା ପାଇଁ ଅସୁବିଧାରେ ପଡ଼ୁଛନ୍ତି ସ୍ଥାନୀୟ ଲୋକେ । ଯାହାର ଏକ ଛୋଟ ଉଦାହରଣ ହେଉଛି ବାଗୁରାଇ ଅମୃତ ପାର୍କ ।
