ଭଦ୍ରକ, ୧୧ା୩ (ଓଡ଼ିଆ ପୁଅ / ସ୍ନିଗ୍ଧା ରାୟ) – ଭଣ୍ଡାରିପୋଖରୀ ବ୍ଲକର ବିଭିନ୍ନ ଶୈବପୀଠରେ ମହାଶିବରାତ୍ରୀ ଓ ଜାଗରଯାତ୍ରା ଆଜି ପାଳିତ ହୋଇଛି । ଭକ୍ତମାନେ ଉପବାସ ରହିବା ସହ ଇଶ୍ୱର ଦର୍ଶନ କରି କାଗଜ ନିର୍ମିତ ଛତା, ଦୀପ ଦାନ କରିଥିଲେ । ବେଲପତ୍ର ପାଦୁକା ସେବନ ପୂର୍ବକ ପ୍ରଭୁଙ୍କୁ ଉପାସନା କରିଥିବା ଦେଖାଯାଇଥିଲା । ଔଁ ନମଃ ଶିବାୟ ମନ୍ତ୍ର ଜପ କରି ଶ୍ରଦ୍ଧାଳୁମାନେ ମନ୍ଦିର ଉପରେ ପ୍ରଜ୍ଜ୍ୱଳିତ ମହାଦୀପକୁ ଦର୍ଶନ କରିବା ନିମନ୍ତେ ବିଳମ୍ବିତ ରାତ୍ରୀ ପର୍ଯ୍ୟନ୍ତ ଉଜାଗର ରହିଥିଲେ । ଏହି ଉପଲକ୍ଷେ ବିଭିନ୍ନ ଶିବ ମନ୍ଦିରକୁ ଆକର୍ଷଣୀୟଭାବେ ସଜ୍ଜିତ କରାଯାଇଥିଲା । ସେହିପରି ଭଣ୍ଡାରିପୋଖରୀ ଥାନା ପରିସରରେ ଥିବା ବାବାଶିତିକଣ୍ଠେଶ୍ୱର, ମେଡିକାଲ ପରିସରରେ ରାମେଶ୍ୱର, ଭଣ୍ଡାରିପୋଖରୀ ବଜାରରେ ଦର୍ପେଶ୍ୱର, ଅଗେଇବେହେରାର ଆଖଣ୍ଡଳେଶ୍ୱର, ଥଇଳାର ଥାନେଶ୍ୱର, ରହଣିଆର କଚେରୀଶ୍ୱର, ରାଢୋର ବିଶ୍ୱେଶ୍ୱର, ମାଳଦାର ଛୋଟେଶ୍ୱର ଓ ନୂଆମହାଦେବ, ନଗୁଆଁର ନଗେଶ୍ୱର ଓ ଭଗେଶ୍ୱର, ଝୁଟଣାର ଅଷ୍ଟଶମ୍ଭୁ ଓ ସ୍ୱପ୍ନେଶ୍ୱର, ରହଣିଆର ଉତ୍ତରେଶ୍ୱର, ଦେଓପଦାର ଶୈବପୀଠ, ଝଟୁଣାରେ ସ୍ୱପ୍ନେଶ୍ୱର, ଶାତଶୋଳାର ଅଖିଳେଶ୍ୱର, ବାରିକପୁର ମେଡିକାଲ ପରିସର ଶିବମନ୍ଦିର, ରଣଜିତ ପଞ୍ଚାୟତର ନୂଆନଈ ନିକଟରେ ଅପୂଜା ମହାଦେବପୀଠ, ପନଖାର ନୀଳକଣ୍ଠେଶ୍ୱର, ନାଆଁମୀର ଧବଳେଶ୍ୱର, ବନ୍ଦାଳୋର ଗତେଶ୍ୱର, ରାଜେନ୍ଦ୍ରପୁରର ସର୍ବେଶ୍ୱର, ସାରୋର ବିଘ୍ନେଶ୍ୱର ଓ ସିଦ୍ଧେଶ୍ୱର, ଶାସନର ଭାବେଶ୍ୱର, ଆକୁଲିକଣାର ବରୁଣେଶ୍ୱର, ଜଗନ୍ନାଥପ୍ରସାଦର ଲୋକନାଥେଶ୍ୱର, ଆଖୁଆପଦାର ହରପାର୍ବତୀ ଆଦି ମୁଖ୍ୟ ଶିବ ମନ୍ଦିର ସହ ଗାଁ ଗହଳିରେ ଥିବା ସମସ୍ତ ଶିବମନ୍ଦିରରେ ବିପୁଳ ସଂଖ୍ୟକ ଭକ୍ତ ଓ ଶ୍ରଦ୍ଧାଳୁଙ୍କ ଭିଡ ଲାଗିରହିଥିଲା । ମୁଢାପଦାର ପ୍ରସିଦ୍ଧ ବାବା ବୈଦ୍ୟନାଥ ମନ୍ଦିରରେ ଭଦ୍ରକ ଓ ଯାଜପୁରର ଜିଲ୍ଲାର ବହୁଭକ୍ତଙ୍କ ସମାଗମ ହୋଇଥିଲା ।
