କେନ୍ଦୁଝର, ତା ୦୨ ମେ(ଓଡ଼ିଆ ପୁଅ/ପ୍ରେମାନନ୍ଦ ଦାସ) ବର୍ତ୍ତମାନ ସାରା ବିଶ୍ବରେ କୋଭିଡ୍ ୧୯ ବା କରୋନା ମହାମାରୀର ଆତଙ୍କ ଚାଲିଥିବା ବେଳେ ସେଥିରୁ ବାଦ ପଡ଼ିନାହିଁ ଆମ ଦେଶ ଓ ଆମ ରାଜ୍ୟ ଓଡ଼ିଶା । ଏହି ମହାମାରୀରୁ ଲୋକମାନଙ୍କୁ ସୁରକ୍ଷିତ ରଖିବା ପାଇଁ କେନ୍ଦ୍ର ସରକାର ଲକ୍ ଡାଉନ୍ ସହ ବିଭିନ୍ନ ନିୟମ ଜାରି ରଖିଛନ୍ତି । ତାହାକୁ ନେଇ ଆମ ରାଜ୍ୟ ସରକାର ବିଭିନ୍ନ ସଚେତନତା କାର୍ଯ୍ୟକ୍ରମରେ ଲୋକମାନଙ୍କୁ ଘରେ ରୁହନ୍ତୁ ସୁରକ୍ଷିତ ରୁହନ୍ତୁର ବାର୍ତ୍ତା ସହ ଲକ୍ ଡାଉନ୍ ନିୟମକୁ କଡ଼ାକଡ଼ି କରାଇଛନ୍ତି । ସରକାରଙ୍କ ଏହି ନିୟମ ପାଳନ ପାଇଁ ସମସ୍ତ ତହସିଲଦାର ଓ ପୋଲିସର ତତ୍ପରତା ପ୍ରକାଶ ପାଇଛି । ଏହି ନିୟମକୁ ଗତକାଲି କେନ୍ଦୁଝର ଜିଲ୍ଲା ଯୋଡ଼ା ବ୍ଲକ ଲେବର ୟୁନିଅନର ସୁଶାନ୍ତ ଖିଲାର ଖୋଲମଖୋଲା ଉଲ୍ଲଂଘନ କରିଥିବା ଅଭିଯୋଗ ହୋଇଛି । ଆଇନ ଶୃଙ୍ଖଳାକୁ ଚ୍ୟାଲେଞ୍ଜ୍ କରି ବିଶ୍ବ ଶ୍ରମିକ ଦିବସରେ ସିଲିଯୋଡାର ଶହଶହ ନିରୀହ ଲୋକଙ୍କୁ ଏକତ୍ରିତ କରାଇ ବଣ ଭୋଜିଭାତର ଆୟୋଜନ କରାଇଥିବା ଜଣାପଡିଛି । ଏହା କ’ଣ ପ୍ରଶାସନିକ ଅଧିକାରୀଙ୍କ ଦୃଷ୍ଟି ଆଢ଼ୁଆଳରେ ନା ପ୍ରଶାସନ ପାଖରେ ଏହାର ଖବର ନାହିଁ, ତାହାକୁ ନେଇ ସାଧାରଣରେ ଉଠୁଛି ବଡ଼ ପ୍ରଶ୍ନ । ଖବର ଅନୁଯାୟୀ ବଳଦା ଗ୍ରାମପଞ୍ଚାୟତ ସିଲିଯୋଡା ଗ୍ରାମର ତୁରବିଲ ପଡିଆ ପାଖରେ ଏହି ବଣ ଭୋଜିର ଆୟୋଜନ କରାଯାଇଥିଲା । ହେଲେ ଏଠାରେ ପ୍ରଶ୍ନ ଉଠୁଛି, ସରକାରଙ୍କ ଏତେ ସଚେତନତା କାର୍ଯ୍ୟକ୍ରମ ସହ ଲକ୍ ଡାଉନ୍ ନିୟମକୁ ଖୋଲାଖୋଲି ଭାବେ ଉଲଂଘନ କରି କାହା ସ୍ବାର୍ଥରେ ଏହି ଭୋଜିର ଆୟୋଜନ କରାଯାଇଥିଲା । ଏହି ନିୟମକୁ ଉଲ୍ଲଂଘନ କରି ନିଜକୁ ଅନ୍ନଦାତାର ପରିଚୟ ଦେଇ ଖୁସି ମନାସୀ ଶହଶହ ଲୋକଙ୍କ ଜୀବନକୁ ବାଜି ଲଗାଇ ବଣ ଭୋଜି କରୁଥିଲେ ନା ଅନ୍ୟ କିଛି । ଏଥିପ୍ରତି ଜିଲ୍ଲା ପ୍ରଶାସନ ଦୃଷ୍ଟି ଦେଇ ପୁଙ୍ଖାନୁପୁଙ୍ଖ ତଦନ୍ତ କରାଇବା ସହ ସରକାରଙ୍କ ନିୟମକୁ ଉଲ୍ଲଂଘନ କରିଥିବା ଦୋଷୀଙ୍କ ଉପରେ ଦୃଢ଼ କାର୍ଯ୍ୟାନୁଷ୍ଠାନ ନେବାକୁ ଏଅଞ୍ଚଳବାସୀଙ୍କ ଦାବି ।
