ଭଦ୍ରକ, ୨୬ା୭ (ଓଡ଼ିଆ ପୁଅ / ସ୍ନିଗ୍ଧା ରାୟ) – କାର୍ଗିଲ ବିଜୟ ଦିବସ ଅବସରରେ ଆଜି ଭଦ୍ରକ ବିଧାନସଭା କାର୍ଯ୍ୟାଳୟ ପରିସରରେ ଏକ ଗରିମାମୟ ଏବଂ ଦେଶପ୍ରେମରେ ଉର୍ଦ୍ଧ୍ୱ କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା। ଏହି ଅବସରରେ କାର୍ଗିଲ ଯୁଦ୍ଧରେ ମାତୃଭୂମିର ସୁରକ୍ଷା ପାଇଁ ସର୍ବୋଚ୍ଚ ବଳିଦାନ ଦେଇଥିବା ଅମର ବୀର ସହିଦମାନଙ୍କୁ ପୁଷ୍ପମାଲ୍ୟ ଅର୍ପଣ କରାଯିବା ସହ ଦୁଇ ମିନିଟ୍ ନୀରବ ପ୍ରାର୍ଥନା ମାଧ୍ୟମରେ ଭାବପୂର୍ଣ୍ଣ ଶ୍ରଦ୍ଧାଞ୍ଜଳି ଜଣାଯାଇଥିଲା। ଉପସ୍ଥିତ ବକ୍ତାମାନେ କହିଥିଲେ ଯେ, ୧୯୯୯ ମସିହାର କାର୍ଗିଲ ଯୁଦ୍ଧରେ ଭାରତୀୟ ସେନାର ଅଦମ୍ୟ ସାହସ, ଅପୂର୍ବ ବୀରତ୍ୱ ଓ ଅତୁଳନୀୟ ଦେଶପ୍ରେମ ସମଗ୍ର ବିଶ୍ୱ ସମ୍ମୁଖରେ ଭାରତର ଗୌରବକୁ ଉଜ୍ଜ୍ୱଳ କରିଥିଲା। ଦେଶର ଅଖଣ୍ଡତା, ସାର୍ବଭୌମତ୍ୱ ଏବଂ ସୁରକ୍ଷା ପାଇଁ ନିଜ ଜୀବନକୁ ଉତ୍ସର୍ଗ କରିଥିବା ବୀର ଯବାନମାନଙ୍କର ତ୍ୟାଗ ଓ ବଳିଦାନ ଦେଶବାସୀଙ୍କ ପାଇଁ ସଦା ପ୍ରେରଣାର ଉତ୍ସ ହୋଇ ରହିବ। ସେମାନଙ୍କର ବୀରଗାଥା ନୂତନ ପିଢ଼ିକୁ ରାଷ୍ଟ୍ରପ୍ରେମ, କର୍ତବ୍ୟନିଷ୍ଠା ଏବଂ ଦେଶସେବାର ମହାନ ଆଦର୍ଶ ପ୍ରତି ଉତ୍ସାହିତ କରିବ ବୋଲି ବକ୍ତାମାନେ ମତପ୍ରକାଶ କରିଥିଲେ। କାର୍ଯ୍ୟକ୍ରମରେ ଜିଲ୍ଲା ସଭାପତି ଭଗବାନ ପଣ୍ଡା, ସମାଜସେବୀ ଅଜୟ ନାୟକ, ବିଧାୟକଙ୍କ ପ୍ରତିନିଧି ଶେଖର ମହାପାତ୍ର ପ୍ରମୁଖ ଉପସ୍ଥିତ ରହି କାର୍ଗିଲ ବୀର ସହିଦମାନଙ୍କର ଅବଦାନକୁ ସ୍ମରଣ କରିଥିଲେ। ଏଥିସହ ସମସ୍ତ ମଣ୍ଡଳ ସଭାପତି, ଭାରତୀୟ ଜନତା ପାର୍ଟିର ବହୁ କର୍ମୀ, ବୁଥ୍ ସଭାପତି, ସଦସ୍ୟ, ବୁଦ୍ଧିଜୀବୀ ଏବଂ ବହୁ ସଂଖ୍ୟକ ଦେଶପ୍ରେମୀ ନାଗରିକ ଉପସ୍ଥିତ ରହି କାର୍ଯ୍ୟକ୍ରମକୁ ସଫଳ କରିଥିଲେ। ଶେଷରେ ଦେଶର ସୀମାରେ ନିୟୋଜିତ ସମସ୍ତ ବୀର ଯବାନଙ୍କ ସୁସ୍ୱାସ୍ଥ୍ୟ, ସୁରକ୍ଷା ଓ ଦୀର୍ଘାୟୁ କାମନା କରାଯିବା ସହ ସହିଦମାନଙ୍କ ପ୍ରତି ସମସ୍ତେ ଗଭୀର କୃତଜ୍ଞତା ଜଣାଇଥିଲେ। କାର୍ଗିଲ ବିଜୟ ଦିବସ କେବଳ ଏକ ସ୍ମୃତି ନୁହେଁ, ବରଂ ଦେଶପ୍ରତି ସମର୍ପଣ, ଏକତା ଓ ରାଷ୍ଟ୍ରଭକ୍ତିର ଚିରନ୍ତନ ବାର୍ତା ବହନ କରେ ବୋଲି ଉପସ୍ଥିତ ଅତିଥିମାନେ ମତପ୍ରକାଶ କରିଥିଲେ।
