ଭଦ୍ରକ, ୧୬ା୩ (ଓଡ଼ିଆ ପୁଅ / ସ୍ନିଗ୍ଧା ରାୟ) – ଆଖଣ୍ଡଳମଣିଙ୍କ ପୀଠରେ ଏବେ ନିର୍ମାଣ ହେବ ଏକ ନୂତନ ବସ୍ଷ୍ଟାଣ୍ଡ । ଏଥିପାଇଁ ରାଜ୍ୟ ସରକାରଙ୍କ ପକ୍ଷରୁ ଯୋଗାଇ ଦିଆଯାଇଛି ୧୧.୮୨ କୋଟି ଟଙ୍କା । ଜିଲା ଓ ରାଜ୍ୟର ପ୍ରମୁଖ ଶୈବପୀଠ ଆରଡି ଧାମର ବାବା ଆଖଣ୍ଡଳମଣିଙ୍କୁ ଦର୍ଶନ କରିବା ପାଇଁ ରାଜ୍ୟ ଓ ରାଜ୍ୟ ବାହାରୁ ହଜାର ହଜାର ଶ୍ରଦ୍ଧାଳୁ ଭକ୍ତ ଓ ପର୍ଯ୍ୟଟକ ଆସିଥାନ୍ତି । ବିଶେଷକରି ପର୍ଯ୍ୟଟନ ଋତୁ ଆରମ୍ଭରୁ ଶେଷ ଯାଏ ଲାଗିରହିଥାଏ ଏଠାରେ ଲକ୍ଷାଧିକ ଲୋକଙ୍କର ଭିଡ । ତେବେ ପର୍ଯ୍ୟଟକମାନେ ଆଣୁଥିବା ଛୋଟବଡ ବସ୍ ରଖିବା ପାଇଁ ଏଠାରେ ସ୍ଥାୟୀ ବସ୍ଷ୍ଟାଣ୍ଡଟିଏ ନଥିବାରୁ ସେମାନେ ନାନା ଅସୁବିଧାର ସମ୍ମୁଖୀନ ହେଉଥିବାବେଳେ ଆରଡି ପୀଠରୁ ଭଦ୍ରକ, ଭୁବନେଶ୍ୱର, କଟକ, ରାଉରକେଲା, ଯାଜପୁର, ଘଟଗାଁ, ବାଲେଶ୍ୱର ଓ କୋଲକାତା ଭଳି ସ୍ଥାନକୁ ପ୍ରତିଦିନ ଯାତାୟତ କରୁଥିବା ୪୦ ରୁ ଉର୍ଦ୍ଧ୍ୱ ବସ୍ ରହଣି ପାଇଁ ସ୍ଥାନାଭାବ ପରିଲକ୍ଷିତ ହୋଇଥାଏ । ଏଭଳି ସମସ୍ୟାକୁ ନେଇ ଏକ ସ୍ଥାୟୀ ବସ୍ଷ୍ଟାଣ୍ଡ ନିର୍ମାଣ ନିମନ୍ତେ ପୂର୍ବତନ ସରପଞ୍ଚ ସରୋଜ ଦାସଙ୍କ ସହ ଅନ୍ୟମାନେ ଭଦ୍ରକ ଜିଲାପାଳ, ସ୍ଥାନୀୟ ବିଧାୟକ ଓ ରାଜ୍ୟ ପରିବହନ ବିଭାଗ ନିକଟରେ ବାରମ୍ବାର ଦାବି କରିଆସୁଥିଲେ । ଏହି ସମସ୍ୟାର ସ୍ଥାୟୀ ସମାଧାନ ପାଇଁ ଭଦ୍ରକ ଜିଲାପାଳ ସିଦ୍ଧେଶ୍ୱର ବଳିରାମ ବୋନ୍ଦରଙ୍କ ସହ ରାଜ୍ୟ ପରିବହନ ବିଭାଗର ଉଚ୍ଚ ପଦାଧିକାରୀ ଓ ସ୍ଥାନୀୟ ପ୍ରଶାସନିକ ଅଧିକାରୀମାନେ ପୀଠର ପ୍ରବେଶ ପଥ ଅର୍ଥାତ୍ ପାନ୍ଥନିବାସ ନିକଟରେ ଚିହ୍ନଟ ଜାଗାର କ୍ଷେତ୍ର ପରିଦର୍ଶନ କରିବା ସହ ୪ ଏକର ପରିମିତ ଏକ ସ୍ଥାନ ଯୋଗାଇ ଦେଇଥିଲେ । ଯେଉଁଠାରେ ସ୍ଥାୟୀ ବସଷ୍ଟାଣ୍ଡ ନିର୍ମାଣ ପାଇଁ ରାଜ୍ୟ ସରକାରଙ୍କ ପକ୍ଷରୁ ଉପରୋକ୍ତ ଅର୍ଥ ଯୋଗାଇଦିଆଯିବା ଫଳରେ ଫଳକ ଲଗାଯାଇ ଆଜି କାର୍ଯ୍ୟ ଆରମ୍ଭ ନିମନ୍ତେ ପ୍ରକ୍ରିୟା ଆରମ୍ଭ ହୋଇଛି । ଏହି କାର୍ଯ୍ୟକୁ ନେଇ ସ୍ଥାନୀୟ ଲୋକେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ, ବିଧାୟକ ତଥା ଜିଲା ଯୋଜନା ବୋର୍ଡ ଅଧ୍ୟକ୍ଷ ବ୍ୟୋମକେଶ ରାୟ ଓ ଜିଲା ପ୍ରଶାସନକୁ ଧନ୍ୟବାଦ ଜଣାଇଛନ୍ତି ।
