ad
ଓଡ଼ିଶା

ଉତ୍ତରାଖଣ୍ଡରେ ନମାମି ଗଙ୍ଗେ ଅଧୀନରେ ୬ଟି ବୃହତ ପ୍ରକଳ୍ପ ଉଦଘାଟନ କରିବେ ପ୍ରଧାନମନ୍ତ୍ରୀ

 

– “Rowing Down the Ganges” ପୁସ୍ତକ ହେବ ଉନ୍ମୋଚନ
– ଗଙ୍ଗା ଉପରେ ସ୍ଵତନ୍ତ୍ର ସଂଗ୍ରହାଳୟ ଗଙ୍ଗା ଅବଲୋକନକୁ କରିବେ ଉଦଘାଟନ

ନୂଆ ଦିଲ୍ଲୀ ୨୯-୯ (ଓଡ଼ିଆ ପୁଅ) ନମାମି ଗଙ୍ଗେ ମିଶନ ଅଧୀନରେ ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ଆଜି ୨୯-୦୯-୨୦୨୦ ଭିଡିଓ କନଫରେନ୍ସ ମାଧ୍ୟମରେ ଉତ୍ତରାଖଣ୍ଡରେ ୬ଟି ବୃହତ ପ୍ରକଳ୍ପ ଉଦଘାଟନ କରିବେ।

ଏହି ପ୍ରକଳ୍ପଗୁଡ଼ିକ ମଧ୍ୟରେ ୬୮ ଏମଏଲଡି ଏସଟିପି ନିର୍ମାଣ, ହରିଦ୍ଵାରର ଜଗଜିତପୁରଠାରେ ଥିବା ୨୭ ଏମଏଲଡି ଏସଟିପିର ଉନ୍ନତିକରଣ ଏବଂ ହରିଦ୍ଵାରର ସରାଇଠାରେ ୧୮ ଏମଏଲଡି ଏସଟିପିର ନିର୍ମାଣ ଅନ୍ତର୍ଭୁକ୍ତ। ୬୮ ଏମଏଲଡି ଏସଟିପି ଜଗଜିତପୁର ପ୍ରକଳ୍ପ ରାଜ୍ୟର ପ୍ରଥମ ସ୍ବେରେଜ ପ୍ରକଳ୍ପ ଯାହାକି ସରକାରୀ ଓ ଘରୋଇ ଭାଗିଦାରୀତାରେ ସଂପୂର୍ଣ୍ଣ ହୋଇଛି। ଏହା ବ୍ୟତୀତ ଋଷିକେଶର ଲାକଡାଘାଟଠାରେ ୨୬ ଏମଏଲଡି ଏସଟିପିର ମଧ୍ୟ ଉଦଘାଟନ କରିବେ।

ହରିଦ୍ଵାର ଋଷିକେଶ ଜୋନରୁ ଗଙ୍ଗା ନଦୀରେ ଶତକଡା ୮୦ ଭାଗ ବର୍ଜ୍ୟ ଜଳ ନିଷ୍କାସିତ ହୋଇଥାଏ। ଗଙ୍ଗା ନଦୀକୁ ନିର୍ମଳ ରଖିବା ପାଇଁ ଏହି ଏସଟିପିଗୁଡିକର ଉଦଘାଟନ ବିଶେଷ ସହାୟକ ହେବ।

ମୁନି କି ରେଟି ସହରର ଚନ୍ଦ୍ରେଶ୍ଵର ନଗରରେ ୭-୫ ଏମଏଲଡି ଏସଟିପି ଦେଶର ପ୍ରଥମ ୪ ମହଲା ବିଶିଷ୍ଟ ବର୍ଜ୍ୟବସ୍ତୁ ପରିଚାଳନା ପ୍ଳାଣ୍ଟର ମାନ୍ୟତା ପାଇବ। ଏହା ୯୦୦ ବର୍ଗମିଟର ପରିମିତ ଅଞ୍ଚଳରେ ନିର୍ମିତ ହୋଇଛି।

ପ୍ରଧାନମନ୍ତ୍ରୀ ଏହାଛଡା ଚୁରପାଣିଠାରେ ୫ ଏମଏଲଡି ଏସଟିପି ଓ ବଦ୍ରିନାଥଠାରେ ୧ ଏମଏଲଡି ଏସଟିପି ଓ ୦.୦୧ ଏମଏଲଡି ଏସଟିପି ସାମର୍ଥ୍ୟ ବିଶିଷ୍ଟ ଆଉ ଦୁଇଟି ଏମଏଲଡି ଏସଟିପି ମଧ୍ୟ ଉଦଘାଟନ କରିବେ। ଏହାକୁ ମିଶାଇ ଉତ୍ତରାଖଣ୍ଡର ମୋଟ ୩୦ଟି ପ୍ରକଳ୍ପର କାର୍ଯ୍ୟ ସଂପୂର୍ଣ୍ଣ ହେବ। ଶତକଡା ୧୦୦ ଭାଗ କାର୍ଯ୍ୟ ଏହି ଗଙ୍ଗାନଦୀ ତଟବର୍ତ୍ତୀ ୧୭ଟି ସହରରେ ସଂପୂର୍ଣ୍ଣ ହେବା ଏକ ପ୍ରମୁଖ ସଫଳତା କହିଲେ ଅତ୍ୟୁକ୍ତି ହେବନାହିଁ। ପ୍ରଧାନମନ୍ତ୍ରୀ ମଧ୍ୟ ଗଙ୍ଗା ଅବଲୋକନ ନାମରେ ଏକ ସଂଗ୍ରହାଳୟର ଉଦଘାଟନ ହରିଦ୍ଵାରର ଚଣ୍ଡୀଘାଟଠାରେ କରିବେ। ଦେଶରେ ପ୍ରଥମଥର ପାଇଁ ସ୍ଥାପିତ ଏହିପରି ଏକ ସଂଗ୍ରହାଳୟରେ ଗଙ୍ଗାନଦୀର ପୁନରୁଦ୍ଧାର, ଜୈବ ବିବିଧତା, ସଂସ୍କୃତି ଇତ୍ୟାଦି ସନ୍ନିବେଶିତ ହେବ।

ଏହି ଅବସରରେ ଜାତୀୟ ଗଙ୍ଗା ପରିମଳ ମିଶନ ଓ ଭାରତୀୟ ବନ୍ୟପ୍ରାଣୀ ପ୍ରତିଷ୍ଠାନ ପକ୍ଷରୁ ପ୍ରକାଶିତ ପୁସ୍ତକ ‘Rowing down the Ganges’ ଉନ୍ମୋଚିତ ହେବ। ଗଙ୍ଗାକୂଳର ସଂସ୍କୃତି ଓ ଜୈବ ବିବିଧତା ବିଷୟବସ୍ତୁମାନ ଏହି ପୁସ୍ତକରେ ରଙ୍ଗୀନ ଫଟୋ ସହିତ ଦର୍ଶାଯାଇଛି। ଏହି ପୁସ୍ତକରେ ଗଙ୍ଗାର ଉତ୍ପତ୍ତିସ୍ଥଳ ଗୋମୂଖଠାରୁ ଆରମ୍ଭ କରି ସାଗରରେ ବିଲୀନ ହୋଇଥିବା ଗଙ୍ଗା ସାଗର ପର୍ଯ୍ୟନ୍ତ ନୌଯାତ୍ରାର ପରିକଳ୍ପନା କରାଯାଇଛି।

ଏହାଛଡା ପ୍ରଧାନମନ୍ତ୍ରୀ ଜଳ ଜୀବନ ମିଶନର ଲୋଗୋ ଓ ଗ୍ରାମପଞ୍ଚାୟତଗୁଡିକର ମାର୍ଗଦର୍ଶିକା ଓ ଜଳ ଜୀବନ ମିଶନ ଅନ୍ତର୍ଗତ ପାଣି ସମିତି ସମ୍ପର୍କିତ ପୁସ୍ତିକା ମଧ୍ୟ ଉନ୍ମୋଚନ କରିବେ।

ଏହି ଲିଙ୍କhttps://pmevents.ncog.gov.in/ରେ ଯୋଡି ହୁଅନ୍ତୁ ।

Loading...
ad
Click to comment

Leave a Reply

Your email address will not be published. Required fields are marked *

ବହୁ ଚର୍ଚ୍ଚିତ ଖବର

To Top