ଭଦ୍ରକ, ୨୯ା୯ (ଓଡ଼ିଆ ପୁଅ / ସ୍ନିଗ୍ଧା ରାୟ) – ୧୬ ନଂ ଜାତୀୟ ରାଜପଥର ବୈତରଣୀ ନଦୀ ପୁରାତନ ସେତୁ ଉପରୁ ଗତ ବୁଧବାର ରାତ୍ର ୯.୩୦ମି. ସମୟରେ ନଦୀକୁ ଡେଇଁଥିବା ବାଲିପୋଖରୀ ପଞ୍ଚାୟତ ପରମାନନ୍ଦପୁର ଗ୍ରାମର ଚନ୍ଦନ ସାହୁ(୩୦)ର ଶବ ୩୬ ଘଣ୍ଟା ପରେ ନଦୀର କଣ୍ଟିଘାଇ ନିକଟରୁ ଉଦ୍ଧାର ହୋଇଛି । ହେଲେ ଚନ୍ଦନ ଗାମୁଛା ସହାୟତାରେ ବାନ୍ଧିଥିବା ଦେଢବର୍ଷର ଝଅ ନିଖୋଜ ଅଛି । ଶୁକ୍ରବାର ସକାଳେ ବୈତରଣୀ ଶାଖା ବୁଢ଼ା ନଦୀର ଚମ୍ପାଛନ୍ଦାରେ ଶବ ଲାଗିଥିବା ଖବର ପ୍ରଚାରିତ ହୋଇଥିଲା । ଚନ୍ଦନର ପରିବାର ଲୋକେ ସେଠାକୁ ଯାଇ ନିରାଶ ହୋଇ ଯାଜପୁର ସହର ଦେଇ ନଦୀ କୂଳେ କୂଳେ ସନ୍ଧାନ ନେଇ ଘରକୁ ଫେରୁଥିବା ବେଳେ ଷୋଳମପୁର ପଞ୍ଚାୟତ ବିନ୍ଧାର ଗ୍ରାମ କଣ୍ଟିଘାଇ ନିକଟରେ ବନସୀରେ ଶବ ଲାଗିଥିବା ଖବର ପ୍ରଚାରିତ ହୋଇଥିଲା । ଚନ୍ଦନର ଭିଣୋଇ ଶବ ଚିହ୍ନଟ କରିଥିଲେ । ଚନ୍ଦନ କଳା ହାଫପ୍ୟାଣ୍ଟ, ବାନିଅନ ପିନ୍ଧିଥିବା ବେଳେ ଝିଅ ତୃପ୍ତିକୁ ବାନ୍ଧିଥିବା ଗାମୁଛା ପେଟରେ ବନ୍ଧା ହୋଇ ରହିଥିଲା । ଚନ୍ଦନ ଡାହାଣ ହାତ କଚଟିରେ ବନ୍ଧା ହୋଇଥିବା ସୂତା ବନସୀରେ ଲାଖି ରହିଥିଲା । ସୂଚନା ପାଇ ଅଧିକାରୀ ସୌରଭ ରାଉତଙ୍କ ନେତୃତ୍ୱରେ ଅଗ୍ନିଶମବାହିନୀ ଓ ଥାନାଧିକାରୀ ଅଜୟ ସୁଦର୍ଶନ ବାଗେଙ୍କ ନେତୃତବରେ ପୁଲିସ ମଧ୍ୟାନ୍ନ ୧୨ଟାରେ ଶବ ଉଦ୍ଧାର କରିଥିଲେ । ମାତ୍ର ଝିଅ ତୃପ୍ତିକୁ ଅଗ୍ନିଶମବାହିନୀ ଖୋଜଖୋଜି କରିଥିଲେ ବି ମିଳିନଥିଲା ।
ଚନ୍ଦନର ପିତା ଦାମୋଦରଙ୍କ ଅଭିଯୋଗ କ୍ରମେ ଥାନାରେ ୨୮/୨୩ନଂ ଅପମୃତ୍ୟୁ ମାମଲା ଋଜୁ ହୋଇ ଶବ ବ୍ୟବଚ୍ଛେଦ ପାଇଁ ଯାଜପୁର ସଦର ମହକୁମା ହାସପାତାଳକୁ ପଠାଯାଇଥିବା ଜଣାଯାଇଛି । ସୂଚନା ଯୋଗ୍ୟ ଯେ ଚନ୍ଦନ ସାହୁ(୩୦) ମାନସିକ ଭାରସାମ୍ୟ ହରାଇ ଅଢେଇ ବର୍ଷର କନ୍ୟା ତୃପ୍ତିକୁ ଛାତିରେ ଗାମୁଛାରେ ବାନ୍ଧି ଗତ ବୁଧବାର ରାତ୍ରରେ ନଦୀକୁ ଡେଇଁ ପଡିଥିଲେ । ପୁଲିସ ବୈତରଣୀ ସେତୁ ଉପରୁ ବାଇକ, ଉଭୟ ବାପଝିଅଙ୍କ ଜୋତାକୁ ଜବତ କରିଥିଲା । ଚନ୍ଦନ ସ୍ଥାନୀୟ ମଞ୍ଜୁରୀ ଗ୍ରାମର ଲକ୍ଷ୍ମୀପ୍ରିୟାକୁ ୪ ବର୍ଷ ପୂର୍ବେ ପ୍ରେମ କରିଥଲେ । ଚନ୍ଦନ ସୁରତର ଏକ ସୂତା ମିଲରେ କାମ କରୁଥିଲେ । ବିବାହ ପରେ ଚନ୍ଦନ ପତ୍ନୀକୁ ନେଇ ସୁରତରେ ରହୁଥିଲେ । ସେଠାରେ ସେମାନଙ୍କର ଗୋଟିଏ କନ୍ୟାସନ୍ତାନ ଜନ୍ମ ହୋଇଥିଲା । ମାସକ ତଳେ ଲକ୍ଷ୍ମୀପ୍ରିୟା ସୁରତରେ ଆତ୍ମହତ୍ୟା କରିବାରୁ ଚନ୍ଦନ ପରମାନନ୍ଦପୁର ଆସି ସୁଦ୍ଧି ହୋଇଥିଲେ । ଚନ୍ଦନଙ୍କ ଶ୍ୱଶୁର ଘର ପକ୍ଷରୁ ଝିଅ ତୃପ୍ତି ନାମରେ ୨ ଲକ୍ଷ ଟଙ୍କା ଜମା ରଖିବାକୁ ଚନ୍ଦନ ଉପରେ ଚାପ ପ୍ରୟୋଗ କରାଯାଇଥିଲା । ଚନ୍ଦନ ବାପ ମାଆ ସହ ଝିଅକୁ ନେଇ ସୁରତ ଯାଇଥିଲେ । ସେଠାରେ ସ୍ୱଳ୍ପ ଦିନ ରହି ପତ୍ନୀ କଥା ଭୁଲିନପାରି ସପ୍ତାହକ ମଧ୍ୟରେ ଘରକୁ ଫେରିଆସିଥିଲେ । ସେବେଠାରୁ ଚନ୍ଦନ ଗାଁକୁ ଫେରି ମାନସିକ ଭାରସାମ୍ୟ ହରାଇ ଅସ୍ୱାଭାବିକ ହୋଇପଡିଥିଲେ । ପିତାମାତା, ଭଉଣୀ ଓ ସାଥିଙ୍କୁ ଜଣାଇ ଶେଷରେ ଚନ୍ଦନ ଏଭଳି ଚରମ ନିଷ୍ପତ୍ତି ନେଇଥିଲେ ।
