ଭଦ୍ରକ, ୫ା୮ (ଓଡ଼ିଆ ପୁଅ / ସ୍ନିଗ୍ଧା ରାୟ)- ବନ୍ୟା ଆସିଲା ରାଜନୀତି ତେଜିଲା । ଦୁର୍ବଳ ନଦୀବନ୍ଧ ଯୋଗୁଁ ସବୁବର୍ଷ ବୈତରଣୀ ନଦୀରେ ସାମାନ୍ୟରୁ ମଧ୍ୟମ ଓ ବଡ ଧରଣର ବନ୍ୟା ଆସିଥାଏ । ଏହି ବନ୍ୟା ଧାମନଗର ବ୍ଲକ୍କୁ ବିଶେଷ ଭାବେ କ୍ଷତିଗ୍ରସ୍ତ କରିଥାଏ । ଚଳିତବର୍ଷର ମଧ୍ୟମ ଧରଣର ବନ୍ୟା ଧାମନଗର ବ୍ଲକ୍ରେ ୩୦ଟି ପଞ୍ଚାୟତକୁ କ୍ଷତିଗ୍ରସ୍ତ କରିଛି । ଏହି କ୍ଷୟକ୍ଷତିର ହିସାବ ପ୍ରଶାସନ କରିବ । ତେବେ ଏହି ବନ୍ୟା ଧାମନଗର ରାଜନୀତିକୁ ଖୁବ ଚଳଚଞ୍ଚଳ କରିଦେଇଛି । ଆଉ ୯ ମାସ ପରେ ହେବ ସାଧାରଣ ନିର୍ବାଚନ । ନିର୍ବାଚନର ଅବ୍ୟବହିତ ପୂର୍ବରୁ ଏହି ବନ୍ୟା ଧାମନଗର ବିଜେଡି ରାଜନୀତିକୁ ଚଳଚଞ୍ଚଳ କରିଛି । ବିଜେଡିର ମାଳ ମାଳ ନେତାଙ୍କ ଗସ୍ତ ସହ ନୂଆ ଆଶାୟୀଙ୍କ ମୁହଁ ସୋସିଆଲ ମିଡିଆରେ ଦେଖିବାକୁ ମିଳିଛି । ଭଦ୍ରକ ଜିଲାରେ ଚଳିତବର୍ଷର ପ୍ରଥମ ବନ୍ୟା ଜିଲାବାସୀଙ୍କୁ ନୟାନ୍ତ କରିସାରିଛି । ଜିଲାର ପ୍ରମୁଖ ନଦୀ ବୈତରଣୀ ନଦୀରେ ବନ୍ୟା ଆସି ଜିଲାର ବ୍ୟାପକ ଅଂଚଳ ଜଳମଗ୍ନ ହୋଇପଡିଛି । ବିଶେଷକରି ଧାମନଗର, ଭଣ୍ଡାରିପୋଖରୀ, ଚାନ୍ଦବାଲି, ତିହିଡି ବ୍ଲକ୍ର ବହୁ ଗ୍ରାମକୁ ବାହ୍ୟ ଜଗତରୁ ବିଚ୍ଛିନ୍ନ କରିଦେଇଛି । ଏହି ବନ୍ୟାକୁ ନେଇ ଜିଲା ପ୍ରଶାସନ, ରାଜ୍ୟ ନେତୃମଣ୍ଡଳୀ ବେଶ୍ ତତ୍ପର ହୋଇଉଠିଛି । ତେବେ ଧାମନଗରର ବହୁ ପଂଚାୟତ ବ୍ୟାପକ କ୍ଷୟକ୍ଷତିର ସମ୍ମୁଖୀନ ହୋଇଛି । ବନ୍ୟାକୁ ନେଇ ବିଭିନ୍ନ ରାଜନୈତିକ ଦଳର ନେତୃମଣ୍ଡଳୀଙ୍କ ବୟାନବାଜି ଗଣମାଧ୍ୟମକୁ ଉଷ୍ମ କରିରଖିଛି । ବିଶେଷକରି ଧାମନଗର ବିଜେଡି ରାଜନୀତି ବନ୍ୟା ପୀଡିତଙ୍କ ଦୁର୍ଦ୍ଦଶାରୁ ରାଜନୈତିକ ଫାଇଦା ଉଠାଇବା ପାଇଁ କସରତ ଚଳାଇଛି । ବନ୍ୟା ପୀଡିତଙ୍କ କ୍ଷତରେ ମଲମ ଲଗାଇ ରାଜନେତାମାନେ ୨୪ ନିର୍ବାଚନ ପାଇଁ କ୍ଷେତ୍ର ପ୍ରସ୍ତୁତ କରୁଛନ୍ତି ।
ବିପନ୍ନଙ୍କ ପାଇଁ ଟିକିଏ ଦରଦ ଥିଲାଭଳି ବନ୍ୟାଞ୍ଚଳ ଲୋକମାନଙ୍କ ଠାରୁ ଶୁଣିବାକୁ ମିଳୁଛି । ଏହି ନେତାମାନେ ବନ୍ୟା ପୀଡିତଙ୍କ ସାହାଯ୍ୟ ଦେବା ଆଳରେ ସୋସିଆଲ ମିଡିଆରେ ଅଭିନବ ନିଜସ୍ୱ ପ୍ରଚାର ଚଳାଇଛନ୍ତି । ଏପରିକି ୨୦୨୪ ନିର୍ବାଚନରେ କେତେକ ଆଶାୟୀ ପ୍ରାର୍ଥୀ ନିଜ ପାଇଁ କ୍ଷେତ୍ର ପ୍ରସ୍ତୁତ କରୁଥିବାର ଜଣାଯାଇଛି । ଏହି ନେତାମାନେ ହେଲେ ପୂର୍ବତନ ବିଧାୟକ ରାଜେନ୍ଦ୍ର ଦାସ, ଡାକ୍ତର ସଂଜୟ ଦାସ, ପୂର୍ବତନ ସାଂସଦଙ୍କ ପୁତ୍ର ସୁବ୍ରତ ମଲ୍ଲିକ, ମଂଜୁଲତା ଦାସ, ସତ୍ୟପ୍ରକାଶ ସେଠୀଙ୍କ ଚେହେରା ସୋସିଆଲ ମିଡିଆରେ ଦେଖିବାକୁ ମିଳୁଛି । ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଲା ଏହି ନେତାମାନେ ବନ୍ୟା ବିପନ୍ନଙ୍କ ନିକଟରେ ପହଞ୍ôଚ ଫଟୋ ଉଠାଇ ସହାୟତାର ମିଛ ଅଭିନୟ କରିବା ଓ ବିଭିନ୍ନ ପ୍ରତିଶ୍ରୁତି ଦେଉଥିବାବେଳେ ସବୁଠାରୁ ଅଧିକ ବିପନ୍ନ ପଶୁ ସଂପଦ ଗୋରୁ, ଗାଈ, ଛେଳିଙ୍କ ଦୁର୍ଦ୍ଦଶା ପ୍ରତି ଏମାନଙ୍କର କୌଣସି ଦରଦ ଦେଖାଯାଉନାହିଁ । ଏହାର କାରଣ ହେଲା ଏମାନେ ସେମାନଙ୍କର ଭୋଟର ନୁହଁନ୍ତି । ବିଭିନ୍ନ ଦଳ ଓ ରାଜନୈତିକ ବ୍ୟକ୍ତିବିଶେଷଙ୍କ ସୋସିଆଲ ମିଡିଆ ପ୍ରକୃତ ବନ୍ୟା ଅପେକ୍ଷା ଅଧିକ ଚିତ୍ରଣ କରି ନିଜର ପତିଆରା ବଢାଇବାରେ ଲାଗିପଡିଛନ୍ତି । ତେବେ ଏହି ବନ୍ୟା ସମୟରେ ସାଂସଦ କିମ୍ବା ପୂର୍ବତନ ବିଧାୟକ ମୁକ୍ତିକାନ୍ତ ମଣ୍ଡଳଙ୍କର ଚେହେରା ଦେଖାନଯିବା ଘଟଣା ଚର୍ଚ୍ଚାର ବିଷୟ ସାଜିଛି । ଅପରପକ୍ଷରେ ଜିଲା ପ୍ରଶାସନ ରାଜନୈତିକ ନେତା ଅପେକ୍ଷା ବନ୍ୟା ପୀଡିତଙ୍କ ପ୍ରତି ଅଧିକ ସଚେତନ ଅଛି । ଓଡ୍ରାଫ୍ ଟିମ୍ ଓ ଅଗ୍ନିଶମ ଦ୍ୱାରା ଉଦ୍ଧାର କାର୍ଯ୍ୟ, ବିସ୍ଥାପନ, ଶୁଖିଲା ଖାଦ୍ୟ ବଣ୍ଟନ, ସ୍ୱାସ୍ଥ୍ୟସେବା, ପାନୀୟ ଜଳ ଯୋଗାଣ ଆଦିକୁ ତ୍ୱରାନିତ କରିଚାଲିଛି । ବନ୍ୟାଞ୍ଚଳରେ ପ୍ରଶାସନର ନିରନ୍ତର କାର୍ଯ୍ୟ ଜାରି ରହିଛି କିନ୍ତୁ ନେତାମାନେ ବନ୍ୟା ଦୁର୍ଗତଙ୍କ ଦୂରାବସ୍ଥାକୁ ନେଇ ନିଜସ୍ୱ ପ୍ରଚାର ଚଳାଇଛନ୍ତି ।
