ନୂଆ ଦିଲ୍ଲୀ ୨-୫ (ଓଡ଼ିଆ ପୁଅ) ସୋମବାର ସୁପ୍ରିମକୋର୍ଟ କହିଛନ୍ତି ଯେ, କୌଣସି ବ୍ୟକ୍ତିଙ୍କୁ ଟୀକାକରଣ କରିବାକୁ ବାଧ୍ୟ କରାଯାଇପାରିବ ନାହିଁ। କିନ୍ତୁ ସରକାର ଜନସାଧାରଣଙ୍କ ମଙ୍ଗଳ ଏବଂ ସ୍ୱାସ୍ଥ୍ୟ ପାଇଁ ନୀତି ପ୍ରସ୍ତୁତ କରିପାରିବେ ଏବଂ କିଛି ସର୍ତ୍ତ ଲଗାଇ ପାରିବେ। ଶାରୀରିକ ସ୍ୱାଧୀନତା କ୍ଷେତ୍ରରେ ସରକାର ନିୟମ କରିପାରିବେ। ସାମ୍ପ୍ରତିକ ଟୀକାକରଣ ନୀତିକୁ ଅନ୍ୟାୟ ବୋଲି କୁହାଯାଇପାରିବ ନାହିଁ।
ସୁପ୍ରିମକୋର୍ଟ ଏହାର ରାୟ ପ୍ରଦାନ କରିବାବେଳେ କହିଛନ୍ତି ଯେ ବର୍ତ୍ତମାନର ଟିକା ନୀତି ଉପରେ କୋର୍ଟ ସନ୍ତୁଷ୍ଟ ଅଛନ୍ତି। ଶାରୀରିକ ସ୍ୱାଧୀନତା ବଞ୍ଚିବାର ମୌଳିକ ଅଧିକାର ଅଧୀନରେ ଆସେ। ବୈଜ୍ଞାନିକ ପ୍ରମାଣ ଉପରେ ନିଷ୍ପତ୍ତି ନେବାକୁ କୋର୍ଟର ଅଭିଜ୍ଞତା ନାହିଁ। ଯଦି କୌଣସି ସ୍ପଷ୍ଟ ଆଭିମୁଖ୍ୟ ଅଛି, ତେବେ କୋର୍ଟ ଏହା ଉପରେ ରାୟ ଦେଇପାରିବେ।
ଜଷ୍ଟିସ୍ ଏଲ୍ ନାଗେଶ୍ୱର ରାଓ ଏବଂ ଜଷ୍ଟିସ୍ ବି.ଆର ଗାଭାଇଙ୍କ ଖଣ୍ଡପୀଠ କହିଛନ୍ତି ଯେ ଏହି ଟୀକାକରଣରେ ହସ୍ତକ୍ଷେପ କରିବାକୁ କୋର୍ଟ ଇଚ୍ଛୁକ ନୁହଁନ୍ତି। ବିଶେଷଜ୍ଞଙ୍କ ମତରେ ସରକାର ଗ୍ରହଣ କରିଥିବା ନୀତିଗତ ନିଷ୍ପତ୍ତିରେ ନ୍ୟାୟିକ ସମୀକ୍ଷାର ପରିସର ସୀମିତ ଅଟେ।
