ଭଦ୍ରକ, ୨୦ା୪ (ଓଡ଼ିଆ ପୁଅ / ସ୍ନିଗ୍ଧା ରାୟ) – ଦ୍ରୁତଗତିରେ ଗାଡି ଚଳାଉଥିବାବେଳେ ସାମ୍ନାକୁ କୁକୁର ଆସିଯିବାରୁ ଭାରସାମ୍ୟ ହରାଇ ଗଛରେ ପିଟି ହେଲା ବାଇକ୍। ଫଳରେ ବାଇକ୍ ଆରୋହୀଙ୍କ ଜୀବନ ଯାଇଥିବାବେଳେ ବାଇକ୍ ଚାଳକ ଗୁରୁତର ହୋଇଛନ୍ତି। ସୂଚନା ଅନୁଯାୟୀ ଏହି ଜିଲାର ଧାମନଗର ଥାନା ଅଧୀନ ଗୁମୁଗଡ ଠାରେ ଦୁର୍ଘଟଣା ଘଟିଛି। ଧାମନଗର ଥାନା ଦକ୍ଷିଣବାଡ ଗାଁର ଗୌରବ ବେହେରା ସାଙ୍ଗ ଶିବ ଶଙ୍କର ବେହେରାଙ୍କ ସହ କୋଠାର ଅଭିମୁଖେ ଯାଉଥିବାବେଳେ ଗୁମୁଗଡ ନିକଟରେ ଏକ କୁକୁର ସାମ୍ନାକୁ ଆସିଯାଇଥିଲା। ଫଳରେ ବ୍ରେକ୍ ମାରିବା ସମୟରେ ଭାରସାମ୍ୟ ହରାଇ ବାଇକ୍ଟି ଏକ ଗଛରେ ପିଟି ହୋଇଯାଇଥିଲା। ଉଭୟଙ୍କୁ ଗୁରୁତର ଅବସ୍ଥାରେ ଭଦ୍ରକ ଜିଲାମୁଖ୍ୟ ଡାକ୍ତରଖାନାରେ ଭର୍ତ୍ତି କରାଯାଇଥିବାବେଳେ ଗୌରବ ବେହେରାଙ୍କୁ ମୃତ ଘୋଷଣା କରାଯାଇଛି। ବାଇକ୍ ଚାଳକ ଶିବ ଶଙ୍କର ବେହେରାଙ୍କ ଅବସ୍ଥା ଗୁରୁତର ରହିଥିବା ସୂଚନା ମିଳିଛି।
