କୋରାପୁଟ ୨୪-୦୭(ଓଡିଆ ପୁଅ /ରଂଜନ ଦାସ)ପଟ୍ଟାଙ୍ଗୀ ଥାନା ପୋଲିସ ଦ୍ୱାରା ମାଳିଗୁଂଜା ଛକ ନିକଟରୁ ବିପୁଳ ପରିମାଣର ଗଞ୍ଜେଇ ଜବତ କରାଯାଇଥିବା ଥାନା ଅଧିକାରୀ କୈବଲ୍ୟ ସେଠ ସୂଚନା ଦେଇଛନ୍ତି । ପୁକାଲି-ରେଙ୍ଗା ଅଂଚଳରୁ ଏମଏଚ-୧୭ବିୱାଇ ୨୮୨୮ ନମ୍ବର ୧୪ ଚକିଆ ଟ୍ରକ ଓ ଏପି-୩୯ଟିଏମ ୫୮୫୯ ନମ୍ବର ଥିବା ଏକ ପିକଅପ ଭ୍ୟାନରେ ଗଞ୍ଜେଇ ଚୋରା ଚାଲାଣ ହେଉଥିବା ଖବର ବିଶ୍ୱସ୍ତ ସୂତ୍ରରୁ ପଟ୍ଟାଙ୍ଗୀ ଥାନା ଅଧିକାରୀ କୈବଲ୍ୟ ସେଠଙ୍କୁ ମିଳିଥିଲା । ଶ୍ରୀ ସେଠଙ୍କ ନେତୃତ୍ୱରେ ଏଏସଆଇ ଏସ.ସିଏଚ.ନାୟକ,ହାବିଲଦାର ଆର.ସି.ନାୟକ,କନେଷ୍ଟବଲ ଜି.ସିଏଚ ମୁଣ୍ଡାଗାଡିଆ,ଆର.ସିଏଚ.ଖୀଲ,ଗୃହରକ୍ଷୀ ତୂଲସୀ ନାରାୟଣ ପଟ୍ଟନାୟକ ଏବଂ ଆଇଆରବି କର୍ମଚାରୀ ମାଳିଗୁଂଜା ଛକରେ ପହଂଚି ଟ୍ରକ ଓ ଭ୍ୟାନକୁ ଅପେକ୍ଷା କରିଥିଲେ ଏବଂ ସମ୍ପୃକ୍ତ ଦୁଇଟି ଗାଡି ପହଂଚିବା ପରେ ଅଟକାଇ ଚେକିଂ କରିବା ବେଳକୁ ଉଭୟ ଗାଡିରୁ ୪୫ଟି ଜରି ଅଖାରେ ପେକିଂ କରା ଯାଇଥିବା ୧୩୪୮ କିଲୋଗ୍ରାମ ଗଞ୍ଜେଇ ମିଳିଥିଲା । ପୋଲିସ ଗଞ୍ଜେଇ ସହ ଟ୍ରକ ଓ ଭ୍ୟାନକୁ ଜବତ କରିଥିବାବେଳେ କୌଶଳ କ୍ରମେ ଗାଡିରେ ଥିବା ୩ଜଣ ଅଭିଯୁକ୍ତ ଖସି ପଳାଇଥିବା ଜଣାପଡିଛି । ଜବତ ଗଞ୍ଜେଇର ବଜାର ଦର ପ୍ରାୟ ୧ କୋଟି ୩୫ ଲକ୍ଷ ଟଙ୍କା ହେବ ବୋଲି ଜଣାପଡିଛି ।
