– ସମଗ୍ର ଖର୍ଚ୍ଚ CMRF ରୁ ବହନ କରାଯିବ।
– ମହାମାରୀ ଏକ ମାନବିକ ସଙ୍କଟ, କୋଭିଡ୍ ପ୍ରୋଟୋକଲ୍ ଅନୁସରଣ କରନ୍ତୁ।
– ଏହାର ଶୃଙ୍ଖଳା ଭାଙ୍ଗିବା ପାଇଁ- ଲୋକମାନଙ୍କୁ ମୁଖ୍ୟମନ୍ତ୍ରୀ ଅନୁରୋଧ କଲେ
ଭୁବନେଶ୍ୱର ମଇ ୨୧, (ଓଡ଼ିଆ ପୁଅ) ମୁଖ୍ୟମନ୍ତ୍ରୀ ଶ୍ରୀ ନବୀନ ପଟ୍ଟନାୟକ ଆଜି ପୁରୀର ଶ୍ରୀ ଜଗନ୍ନାଥ ମେଡିକାଲ କଲେଜ ପରିସରରେ ୧୫୦ ବେଡ୍ ବିଶିଷ୍ଟ ଜିଲ୍ଲା କୋଭିଡ ହସ୍ପିଟାଲକୁ ଭର୍ଚୁଆଲ ପ୍ଲାଟଫର୍ମରେ ଶୁଭାରମ୍ଭ କରିଛନ୍ତି।
ସମ୍ ହସ୍ପିଟାଲ୍ ଭୁବନେଶ୍ୱରର ସହଯୋଗରେ ନିର୍ମିତ ଏହି ସୁବିଧାରେ ୯୦ ଟି ଜେନେରାଲ୍ ଅକ୍ସିଜେନ୍ ବେଡ୍, ୪୦ ଟି HDU ବେଡ୍ ଏବଂ ୨୦ ଟି ଆଇସିୟୁ ବେଡ୍ ଅଛି। ଏହା ସହିତ ଏକ ଉଚ୍ଚମାନର ଲାବୋରେଟୋରୀ ଏବଂ ଡାଇଗ୍ନୋଷ୍ଟିକ୍ ସୁବିଧା ମଧ୍ୟ ରହିଛି।
ଏହି ଅବସରରେ ମୁଖ୍ୟମନ୍ତ୍ରୀ ଶ୍ରୀ ପଟ୍ଟନାୟକ କହିଛନ୍ତି ଯେ, ଜିଲ୍ଲାର ଗୁରୁତର କୋଭିଡ ରୋଗୀଙ୍କ ଉନ୍ନତ ଚିକିତ୍ସା ସେବା ଯୋଗାଇବାରେ ଡାକ୍ତରଖାନା ସହାୟକ ହେବ ଏବଂ ସେମାନଙ୍କୁ ଭୁବନେଶ୍ୱର କିମ୍ବା କଟକ ଡାକ୍ତରଖାନା ଖୋଜିବାକୁ ପଡ଼ିବ ନାହିଁ।
କୋଭିଡ ହସ୍ପିଟାଲର କାର୍ଯ୍ୟ ପାଇଁ ସମଗ୍ର ଖର୍ଚ୍ଚ ମୁଖ୍ୟମନ୍ତ୍ରୀଙ୍କ ରିଲିଫ ପାଣ୍ଠିରୁ ବହନ କରାଯିବ ବୋଲି ମୁଖ୍ୟମନ୍ତ୍ରୀ ଘୋଷଣା କରିଛନ୍ତି। ସେ ଆହୁରି ମଧ୍ୟ କହିଛନ୍ତି ଯେ, ସମସ୍ତ ବେଡ୍ ଅକ୍ସିଜେନ୍ ପାଇପଲାଇନ ସହିତ ସଂଯୁକ୍ତ ହୋଇଛି ଏବଂ ଆବଶ୍ୟକ ହେଲେ ଅକ୍ସିଜେନ୍ ବେଡ୍ ଆହୁରି ବୃଦ୍ଧି କରାଯିବ।
ଏହି କୋଭିଡ୍ କେୟାର ସୁବିଧା ପାଇଁ ରାଜ୍ୟ ସରକାରଙ୍କ ସହ ମିଶି ଆଗକୁ ଆସିଥିବାରୁ ମୁଖ୍ୟମନ୍ତ୍ରୀ ସମ୍ ହସ୍ପିଟାଲ୍ ଭୁବନେଶ୍ୱରକୁ ଧନ୍ୟବାଦ ଜଣାଇଛନ୍ତି।
ଦେଶରେ ଆମ ସମସ୍ତଙ୍କ ପାଇଁ ଏହା ଅତ୍ୟନ୍ତ ଆହ୍ୱାନପୂର୍ଣ୍ଣ ସମୟ ବୋଲି କହି ସିଏମ୍ କହିଛନ୍ତି ଯେ, ଏହି ମହାମାରୀ ଏକ ବଡ଼ ମାନବିକ ସଙ୍କଟ ସୃଷ୍ଟି କରିଛି। ଆମ ଜୀବନ, ସ୍ୱାସ୍ଥ୍ୟ ଏବଂ ଆମର ସାଧାରଣ କଲ୍ୟାଣ ପାଇଁ ବିପଦ ବୋଲି ସେ କହିଛନ୍ତି।
ସେ ଆହୁରି ମଧ୍ୟ କହିଛନ୍ତି ଯେ ଗତ ବର୍ଷ ପ୍ରଥମ ଲହରରେ ଅର୍ଥନୈତିକ ପ୍ରଭାବ ସତ୍ତ୍ୱେ ଆମେ ଏହି ଭୂତାଣୁର ସଂକ୍ରମଣକୁ ରୋକିବାରେ ସଫଳତା ପାଇଥିଲୁ। ଚଳିତ ବର୍ଷ ଦ୍ୱିତୀୟ ଲହରରେ, ଆମେ ଏପର୍ଯ୍ୟନ୍ତ ଏହାକୁ ବହୁ ପରିମାଣରେ ରୋକିବାରେ ସକ୍ଷମ ହୋଇଛୁ। ସୁସ୍ଥତା ହାରରେ ମଧ୍ୟ ଉନ୍ନତି ହେଉଛି ବୋଲି ମୁଖ୍ୟମନ୍ତୀ କହିଛନ୍ତି।
ମୁଖ୍ୟମନ୍ତ୍ରୀ କହିଛନ୍ତି ଯେ, ଆମର ଏକ ଦୃଢ଼ କୋଭିଡ ଭିତ୍ତିଭୂମି ଅଛି ଏବଂ ଏହାକୁ ଆହୁରି ଉନ୍ନତ କରିବା ପାଇଁ କାର୍ଯ୍ୟ କରୁଛୁ। ସର୍ବୋତ୍ତମ ଚିକିତ୍ସା ସୁବିଧା ଯୋଗାଇବା ତଥା ମୂଲ୍ୟବାନ ଜୀବନ ବଞ୍ଚାଇବା ପାଇଁ ସରକାର ସମସ୍ତ ପ୍ରକାର ଉଦ୍ୟମ କରୁଛନ୍ତି ବୋଲି ସେ ସୂଚନା ଦେଇଛନ୍ତି।
ମହାମାରୀକୁ ପରାସ୍ତ କରିବା ପାଇଁ ସମସ୍ତ କୋଭିଡ ନିୟମ ମାନିବାକୁ ଲୋକଙ୍କୁ ନିବେଦନ କରି ଶ୍ରୀ ପଟ୍ଟନାୟକ କହିଛନ୍ତି ଯେ ଏହି ମହାମାରୀର ସଂକ୍ରମଣକୁ ରୋକିବାର ମନ୍ତ୍ର ହେଉଛି ଭୂତାଣୁ ଯାଞ୍ଚ କରିବା ଏବଂ ଏହାର ଶୃଙ୍ଖଳା ଭାଙ୍ଗିବା।
ମହାମାରୀ ବିରୋଧରେ ଲଢ଼େଇରେ ସହଯୋଗ ପାଇଁ ମୁଖ୍ୟମନ୍ତ୍ରୀ ଓଡ଼ିଶାବାସୀଙ୍କୁ ପ୍ରଶଂସା କରିଥିଲେ।
ଭିସିରେ ଏହି କାର୍ଯ୍ୟକ୍ରମରେ ଯୋଗ ଦେଇ ସ୍ୱାସ୍ଥ୍ୟମନ୍ତ୍ରୀ ଶ୍ରୀ ନବ ଦାସ ଏହି ମହାମାରୀକୁ ରୋକିବା ପାଇଁ ସରକାର ନେଇଥିବା ପଦକ୍ଷେପକୁ ବିଷୟରେ କହିଥିଲେ। ବିଦ୍ୟାଳୟ ଓ ଗଣଶିକ୍ଷା ମନ୍ତ୍ରୀ ଶ୍ରୀ ସମୀର ରଂଜନ ଦାସ, କ୍ରୀଡ଼ା ମନ୍ତ୍ରୀ ଶ୍ରୀ ତୁଷାରକାନ୍ତି ବେହେରା ପୁରୀର କୋଭିଡ ହସ୍ପିଟାଲ ପାଇଁ ମୁଖ୍ୟମନ୍ତ୍ରୀଙ୍କୁ ଧନ୍ୟବାଦ ଜଣାଇଛନ୍ତି।
ରାଜ୍ୟ ଯୋଜନା ବୋର୍ଡର ଡେପୁଟି ଚେୟାରମ୍ୟାନ୍ ଶ୍ରୀ ସଞ୍ଜୟ ଦାସ ବର୍ମା କହିଛନ୍ତି ଯେ ଏହି ସୁବିଧା ଦ୍ୱାରା ପୁରୀର ଲୋକମାନେ ବହୁ ଉପକୃତ ହେବେ। ପୁରୀ ସାଂସଦ ଶ୍ରୀ ପିନାକି ମିଶ୍ର ବିଭିନ୍ନ ରାଜ୍ୟକୁ ଅକ୍ସିଜେନ୍ ସହାୟତା ଯୋଗାଇବାରେ ମୁଖ୍ୟମନ୍ତ୍ରୀଙ୍କ ଗତିଶୀଳ ନେତୃତ୍ୱ ଉପରେ କହିଥିଲେ।
ଏହି କାର୍ଯ୍ୟକ୍ରମରେ WODC ଅଧ୍ୟକ୍ଷ ଶ୍ରୀ ଅସିତ ତ୍ରିପାଠୀ, ମୁଖ୍ୟ ଶାସନ ସଚିବ ଶ୍ରୀ ସୁରେଶ ଚନ୍ଦ୍ର ମହାପାତ୍ର ଏବଂ ଏସିଏସ୍ ସ୍ୱାସ୍ଥ୍ୟ ଶ୍ରୀ ପି.କେ ମହାପାତ୍ର ଯୋଗ ଦେଇଥିଲେ।
ସମ ହସ୍ପିଟାଲ୍ ର ସୁପରିଟେଣ୍ଡେଣ୍ଟ ଡଃ ପି ସାମନ୍ତସିଂଘାର ଯୋଗ ଦେଇଥିଲେ।
ପୁରୀ କଲେକ୍ଟର ସ୍ୱାଗତ ଭାଷଣ ପ୍ରଦାନ କରିଥିଲେ ଏବଂ ଏଡିଏମ୍ ଧନ୍ୟବାଦ ଅର୍ପଣ କରିଥିଲେ।
