ଭଦ୍ରକ, ୪ା୧୨ (ଓଡ଼ିଆ ପୁଅ / ସ୍ନିଗ୍ଧା ରାୟ) – ତିହିଡ଼ି ବଜାର ମଧ୍ୟସ୍ଥଳରେ ଅବସ୍ଥିତ ତିହିଡ଼ି ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ର ରୋଗୀଙ୍କୁ ସେବା ଯୋଗାଇଦେବାରେ ବିଫଳ ହୋଇଛି । ‘ମୋ ସରକାର’ ଅଧୀନରେ ରାଜ୍ୟରେ ପାଞ୍ଚ ‘ଟି’ ସଚିବ ସ୍ୱାସ୍ଥ୍ୟ ବ୍ୟବସ୍ଥାର ସୁଧାର ଆଣିବା ପାଇଁ ଉଦ୍ୟମରତ ଥିବା ବେଳେ ଏହାର ସାମାନ୍ୟ ପ୍ରଭାବ ତିହିଡ଼ିରେ ଦେଖିବାକୁ ମିଳୁନାହିଁ । ରୋଗୀ ଆଉ ତିହିଡ଼ି ଡାକ୍ତରଖାନା ଉପରେ ଭରଷା ମଧ୍ୟ କରିପାରୁନାହାନ୍ତି । ଚାନ୍ଦବାଲି, ମତୋ, ଘଣ୍ଟେଶ୍ୱର, ପୀରହାଟ ଆଦି ଅଞ୍ଚଳରୁ ଶହ ଶହ ରୋଗୀ ପ୍ରତିଦିନ ଏହି ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ର ଉପରେ ନିର୍ଭର କରିଥା’ନ୍ତି । ଡାକ୍ତରଙ୍କର ଘୋର ଅଭାବ ଯୋଗୁ ରୋଗୀସେବା କରାଯାଇପାରୁନାହିଁ । ଜଣେ ମେଡିକାଲ ଅଫିସର ଓ ଜଣେ ସ୍ତ୍ରୀ ଓ ପ୍ରସୂତି ବିଶେଷଜ୍ଞଙ୍କୁ ନେଇ ଚାଲିଛି ରୋଗୀସେବା । ସରକାର ଶିଶୁ ସୁରକ୍ଷା ଉପରେ ଗୁରୁତ୍ୱ ପ୍ରଦାନ କରୁଥିବା ବେଳେ ଅଗଷ୍ଟ ୨୦୧୪ ମସିହାରୁ ଏଠାରେ ଶିଶୁ ବିଶେଷଜ୍ଞ ପଦବୀ ଫାଙ୍କା ପଡ଼ିଛି । ଛଅ ବର୍ଷ ହେଲା ଏଠାରେ ମେଡିସିନ ବିଶେଷଜ୍ଞ ପଦବୀ ମଧ୍ୟ ଫାଙ୍କା ପଡ଼ିଛି । ସେହିପରି ଶଲ୍ୟ ବିଶେଷଜ୍ଞ ପଦବୀ ମଧ୍ୟ ୫ ବର୍ଷ ହେଲା ଫାଙ୍କା ପଡ଼ିଛି । ସବୁଠାରୁ ଆଶ୍ଚର୍ଯ୍ୟର କଥା ହେଉଛି ଜଣେ ମେଡିସିନ ସ୍ପେଶାଲିଷ୍ଟଙ୍କର ଏଠାରେ ପୋଷ୍ଟିଂ ହୋଇଥିଲା । ସେ ଗୋଟିଏ ଦିନ ରହି ରିଲିଭ ହୋଇ ପଳାଇଲେ । ସେହିପରି ତିହିଡ଼ି ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ର ଅଧୀନରେ ବିଭିନ୍ନ ସ୍ଥାନରେ ଥିବା ୭ ଗୋଟି ପ୍ରାଥମିକ ସ୍ୱାସ୍ଥ୍ୟକେନ୍ଦ୍ରରୁ ୨ ଗୋଟିରେ ଆଲୋପାଥିକ ଡାକ୍ତର ନାହାନ୍ତି । ସେହିପରି ପୀରହାଟ ପ୍ରାଥମିକ ସ୍ୱାସ୍ଥ୍ୟକେନ୍ଦ୍ରରେ ଜଣେ ଅବସରପ୍ରାପ୍ତ ଡାକ୍ତର କାମ ଚଳାଉଛନ୍ତି । ତିଆଡ଼ିସାହି ଓ ବାହାବଳପୁର ପରି ଗ୍ରାମାଞ୍ଚଳରେ କେହି ଡାକ୍ତର ନାହାନ୍ତି । ଯେଉଁ ପ୍ରାଥମିକ ସ୍ୱାସ୍ଥ୍ୟକେନ୍ଦ୍ରରେ ଆଲୋପାଥି ଡାକ୍ତର ଅଛନ୍ତି ବାଧ୍ୟ ହୋଇ ସେମାନଙ୍କୁ ତିହିଡ଼ିକୁ ଡେପୁଟେସନରେ ଅଣାଯାଉଛି । ମେଡିକାଲ ଅଫିସର ସ୍ୱାଭାବିକ ଭାବେ ପ୍ରାଶାସନିକ କାର୍ଯ୍ୟରେ ବ୍ୟସ୍ତ ରହୁଥିବା ବେଳେ ବିଶେଷଜ୍ଞ ମଧ୍ୟ ତିହିଡ଼ିରେ ସ୍ଥାୟୀ ଭାବେ ରହୁନାହାନ୍ତି । ପିଲାଜନ୍ମ ଅସ୍ତ୍ରୋପଚାର କଥା ଆସିଲେ ସିଧା ଭଦ୍ରକକୁ ରେଫର କରିଦିଆଯାଏ । ତିହିଡ଼ି ଡାକ୍ତରଖାନାରେ ମୂଲ୍ୟବାନ ଯନ୍ତ୍ରପାତି ଥିଲେ ମଧ୍ୟ ବର୍ଷ ବର୍ଷ ହେଲା ଏଠାରେ ଅପରେସନ କରାନଯାଇ ବାହାରକୁ ପଠାଇଦିଆଯାଉଛି । ଖାଲି ସ୍ୱାସ୍ଥ୍ୟସେବା ନୁହେଁ, ଏଠାରେ ପରିବେଶ ମଧ୍ୟ ଅତ୍ୟନ୍ତ ଖରାପ ହୋଇଯାଇଛି । ତିହିଡ଼ି ଡାକ୍ତରଖାନା ବାଇକ ପାର୍କିଂ ସ୍ଥାନ ପାଲିଟିଛି । ବଜାରକୁ ଆସୁଥିବା ଲୋକେ ନିଜ ନିଜର ବାଇକକୁ ଡାକ୍ତରଖାନା ପରିସରରେ ପାର୍କିଂ କରିଦେଇ ନିଜନିଜର କାର୍ଯ୍ୟ କରୁଛନ୍ତି । ଫଳରେ ଆମ୍ବୁଲାନ୍ସ, ଦମକଳ ଆଦି ଡାକ୍ତରଖାନାକୁ ପଶିବାରେ ଅସୁବିଧାର ସମ୍ମୁଖୀନ ହେଉଛନ୍ତି ।
