ହରିଚନ୍ଦନପୁର,ତା ୨୯ ଅଗଷ୍ଟ (ଓଡ଼ିଆ ପୁଅ/ପ୍ରେମାନନ୍ଦ ଦାସ) କେନ୍ଦୁଝର ଜିଲ୍ଲା ଆଦିବାସୀ ଅଧ୍ୟୁଷିତ ହରିଚନ୍ଦନପୁର ବ୍ଲକର ବିଭିନ୍ନ ସ୍ଥାନରେ ଲଘୁଚାପ ଜନିତ ଲଗାଣ ବର୍ଷା କାରଣରୁ ଅନେକ ଗରିବ ଶ୍ରେଣୀର ଲୋକଙ୍କ ବାସଗୃହ ଭାଙ୍ଗିଯାଇଥିବା ଜଣାପଡିଛି । ଅତି ଦୁଃଖର ବିଷୟ, ଏହି ଲଘୁଚାପ ବର୍ଷାରେ ଠାକୁରପଡା ଗ୍ରାମ ପଞ୍ଚାୟତ ପିଟାଟାଙ୍ଗର ଗ୍ରାମର ବାପାମାଆ ଛେଉଣ୍ଡ ମସ୍ତିଷ୍କ ବିକୃତ ସୁବଳ ମହାରଣାଙ୍କ ବାସଗୃହ ସମ୍ପୂର୍ଣ୍ଣ ଭାବେ ଭାଙ୍ଗିଯାଇଥିବା ଦେଖିବାକୁ ମିଳିଛି । ସୁବଳ ଦିନେ କଂସା ବାସନ ସାମଗ୍ରୀ ବିକ୍ରି କରି ନିଜର ପରିବାର ପୋଷଣ କରୁଥିଲେ । ହେଲେ ଆଜକୁ ୯ବର୍ଷ ପୂର୍ବେ ଏକ ଭଡ଼ା ଗାଡ଼ିରେ କିଛି ଲୋକଙ୍କ ସହ ବେପାର କରିବା ପାଇଁ ଯାଇଥିଲେ, ସେଠାରୁ ଫେରୁଥିବା ବେଳେ କୁଆଝରଣ ଘାଟିରେ ଗାଡ଼ିଟି କୌଣସି କାରଣରୁ ଭାରସାମ୍ୟ ହରାଇ ଦୁର୍ଘଟଣାଗ୍ରସ୍ତ ହୋଇଥିଲା । ସେଥିରେ ଥିବା ଲୋକମାନଙ୍କ ମଧ୍ୟରୁ ଜଣଙ୍କର ମୃତ୍ୟୁ ଘଟିଥିବା ସହ ଜଣଙ୍କର ଗୋଡ଼ ଭାଙ୍ଗି ଯାଇଥିବା ବେଳେ ସୁବଳଙ୍କ ମୁଣ୍ଡରେ ଆଘାତ ଲାଗିଥିଲା । ତାଙ୍କୁ ଚିକିତ୍ସା ନିମନ୍ତେ କଟକ ବଡ଼ ମେଡ଼ିକାଲକୁ ନିଆଯାଇଥିଲା, ହେଲେ ସେଠାରେ ତାଙ୍କର ସଠିକ୍ ସ୍ବାସ୍ଥ୍ୟ ପରିକ୍ଷା କରାନଯାଇ କିଛି ଔଷଧ ଦେଇ ତାଙ୍କୁ ଘରକୁ ପଠାଇ ଦିଆଯାଇଥିଲା । ସେଠାରୁ ଆସିବା ପରେ କିଛି ଦିନ ସୁବଳ ଠିକ୍ ଭାବରେ କଥାବାର୍ତ୍ତା ସହ ଘରର କାମକାର୍ଯ୍ୟ କରିପାରିଥିଲେ । ହେଲେ କିଛି ଦିନ ପରେ ହଠାତ୍ ତାଙ୍କ ମୁଣ୍ଡ କାମ ନକରିବା ସହ କଥାବାର୍ତ୍ତା ବନ୍ଦ ଓ କାନକୁ ଶୁଭିବା ବନ୍ଦ ହୋଇଯାଇଥିଲା । ରୋଜଗାରିଆ ପୁଅ ସୁବଳଙ୍କ ଏହି ଭଳି ଅବସ୍ଥାକୁ ନେଇ ଚିନ୍ତାରେ ବାପା √କାର୍ତ୍ତିକା ମହାରଣା ରୋଗାକ୍ରାନ୍ତ ହୋଇ ଗତ ୨ବର୍ଷ ହେବ ମୃତ୍ୟୁ ବରଣ କରିଥିବା ବେଳେ ମାଆ √ବିମଳା ମହାରଣାଙ୍କ ୧ବର୍ଷ ପୂର୍ବେ ମୃତ୍ୟୁ ଘଟିଥିବା ଜଣାପଡ଼ିଛି । ହେଲେ ଅର୍ଥ ଅଭାବ କାରଣରୁ ସୁବଳଙ୍କ ଚିକିତ୍ସା ଓ ଭଉଣୀର ବିବାହ ବାପା ମାଆଙ୍କ ଅନ୍ତେ ହୋଇପାରିଲା ନାହିଁ । ବାପା ମାଆଙ୍କ ମୃତ୍ୟୁ ପରେ ଗ୍ରାମର କିଛି ସୁହୃଦୟ ବ୍ୟକ୍ତି ଓ ବଡବାପା ପରିବାର ଲୋକଙ୍କ ସାହାର୍ଯ୍ୟରେ ଗତ କିଛି ଦିନ ପୂର୍ବେ ବାପାମାଆ ଛେଉଣ୍ଡ ଭଉଣୀର ବାହାଘର ହୋଇଛି । ହେଲେ ଅର୍ଥ ଅଭାବ କାରଣରୁ ଆଜି ପର୍ଯ୍ୟନ୍ତ ସୁବଳଙ୍କ ଚିକିତ୍ସା ହୋଇପାରିନାହିଁ, ଯଦି ତାଙ୍କ ମସ୍ତିଷ୍କର ସଠିକ୍ ପରିକ୍ଷା କରାଯାଇ ଚିକିତ୍ସା କରାଯାଇପାରନ୍ତା ତେବେ ସେ ପୂର୍ବ ଭଳି ଅବସ୍ଥାକୁ ଫେରିପାରନ୍ତେ ବୋଲି ବୁଦ୍ଧିଜୀବି ମହଲରେ ମତ ପ୍ରକାଶ । ସୁବଳ ମସ୍ତିଷ୍କ ବିକୃତର ସାର୍ଟିଫିକେଟ୍ ହାସଲ କରିବା ପରେ ସରକାରଙ୍କ ଭତ୍ତା ଯୋଜନାରେ ଅନ୍ତର୍ଭୁକ୍ତ ହୋଇପାରିଛନ୍ତି । ବର୍ତ୍ତମାନ ବଡ଼ ବାପାଙ୍କ ପରିବାର ସୁବଳ ଖାଇବା ପିଇବା କଥା ବୁଝୁଛନ୍ତି, ହେଲେ ଲଘୁଚାପ ଜନିତ ଲଗାଣ ବର୍ଷା ତାଙ୍କ ପାଇଁ ସାଜିଲା କାଳ । ସେ ରହୁଥିବା ବାସଗୃହଟି ଲଗାଣ ବର୍ଷା କାରଣରୁ ସମ୍ପୂର୍ଣ୍ଣ ଭାବେ ଭାଙ୍ଗି ଯାଇଥିବା ଦେଖିବାକୁ ମିଳିଛି । ବାସଗୃହଟି ଭାଙ୍ଗିଯିବା ଫଳରେ ଆଶ୍ରୟ ନେବା ତାଙ୍କ ପାଇଁ ବହୁତ୍ କଷ୍ଟକର ହୋଇପଡ଼ିଥିବା ସହ ବେସାହାରା ହୋଇପଡ଼ିଛନ୍ତି । ତେଣୁ ଏଥିପ୍ରତି ପ୍ରଶାସନ ଦୃଷ୍ଟି ଦେଇ ଯଥାଶୀଘ୍ର ତାଙ୍କୁ ସରକାରୀ ଆବାସ ଯୋଜନାରୁ ଘର ଖଣ୍ଡିଏ ଯୋଗାଇ ଦେବା ସହ ତାଙ୍କ ଚିକିତ୍ସା ନିମନ୍ତେ ସରକାରୀ ସାହାଯ୍ୟ ଯୋଗାଇ ଦେବାକୁ ଜନସାଧାରଣରେ ଦାବି ହୋଇଛି ।
