କେନ୍ଦୁଝର, ୨୬ ଅଗଷ୍ଟ (ଓଡ଼ିଆ ପୁଅ/ବିଭୂତି ଭୂଷଣ ପଟ୍ଟନାୟକ) ସମଗ୍ର କେନ୍ଦୁଝର ଜିଲ୍ଲାରେ ଲଘୁଚାପ ଜନିତ ଲଗାଣ ବର୍ଷା ଲାଗି ରହିଥିବା ବେଳେ ପ୍ରାୟ ସମସ୍ତ ଅଞ୍ଚଳ ପ୍ରଭାବିତ ହୋଇଛି। ଗତକାଲି ମଙ୍ଗଳବାର ଅପରାହ୍ନ ପର ଠାରୁ ବର୍ଷା ଆରମ୍ଭ ହୋଇଯାଇଥିବା ବେଳେ ରାତ୍ରୀ ତମାମ ମୁଷଳଧାରାରେ ବର୍ଷା ହେବା ସହ ବୁଧବାର ଦିନ ମଝିରେ ମଝିରେ ସାମାନ୍ୟ ବିରତି ଦେଇ ବର୍ଷା ଲାଗିରହିଛି। ଫଳରେ କେନ୍ଦୁଝର ସହର ଅବସ୍ଥା ବେହାଲ ହୋଇପଡିଛି। ମ୍ୟୁନିସିପାଲଟିର ଅଧିକାଂଶ ଅଞ୍ଚଳ ଜଳାର୍ଣ୍ଣବ ହୋଇ ପଡିଥିବା ବେଳେ ଲୋକମାନେ ଏକପ୍ରକାର ଜଳବନ୍ଦୀ ଅବସ୍ଥାରେ ରହିଛନ୍ତି। ସହରର ତଳି ଅଞ୍ଚଳର ଅବସ୍ଥା ନ କହିବା ଭଲ। କେନ୍ଦୁଝର ଗଡ ମ୍ୟୁନିସପାଲଟି ପକ୍ଷରୁ କୋଟି କୋଟି ଟଙ୍କା ଖର୍ଚ୍ଚ ହୋଇ ଡ୍ରେନ ତିଆରି ହେଉଛି ହେଲେ ଡ୍ରେନ ର ଆଉଟଲେଟ ର ବ୍ୟବସ୍ଥା କରାଯାଇନ ଥିବାରୁ ପାଣି ନିଷ୍କାସିତ ହୋଇ ନପାରି ଲୋକଙ୍କ ଘରେ ପଶୁଛି। ଏପରି କି ମାଇନଂରୋଡସ୍ଥିତ ଡଃ ଚୌଧୁରୀ ଙ୍କ ବାସଭବନ ରହିଥିବା ଲେନ୍ ତଥା ବିଗ୍ବଜାର ପଛ ପାଖ ଅଞ୍ଚଳ ବାନାର୍ଜୀ କଲୋନୀ ସାମାନ୍ୟ ବର୍ଷାରେ ସଂପୁର୍ଣ୍ଣ ଜଳମଗ୍ନ ହୋଇ ପଡୁଛି। ଏ ସଂପର୍କରେ ମ୍ୟୁନିସପାଲଟି କର୍ତ୍ତୃପକ୍ଷଙ୍କର ବାରମାବାର ଦୃଷ୍ଟି ଆକର୍ଷଣ ସତ୍ୱେ ଡ୍ରେନ ନିର୍ମାଣ କରାଯାଉନାହିଁ। ଉକ୍ତ ଅଞ୍ଚଳରେ ଡ୍ରେନ ନିର୍ମାଣ ପାଇଁ ସମସ୍ତ ପ୍ରସ୍ତୁତି ସରିଥିବା କଥା ପୂର୍ବତନ ମ୍ୟୁନିସପାଲଟି ନିର୍ବାହୀ ଅଧିକାରୀ ଯିବା ପୂର୍ବରୁ ସୂଚନା ଦେଇଥିଲେ ମଧ୍ୟ ତାହା ଅଦ୍ୟବଧି କାର୍ଯ୍ୟରେ ପରିଣତ ହୋଇପାରିନାହିଁ। ଅନ୍ୟ ପକ୍ଷରେ ସହରରେ ରହିଥିବା ଅନେକ ଡ୍ରେନ ମେଂଟେଂନାନ୍ସ ଅଭାବରୁ ଏକ ପ୍ରକାର ପୋତି ହୋଇ ପଡିଥିବା ବେଳେ ଅଧିକାଂଶ ଡ୍ରେନ ଉପରେ ସ୍ଳାପ ନଥିବା କାରଣରୁ ସେସବୁ ମଶା ବଂଶ ବୃଦ୍ଧି ପାଇିଂ ବେଶ ସୁହାଉଅଛି।
ଗତକାଲି ଠାରୁ ଆରମ୍ଭ ଏହି ଲଘୁଚାପ ଜନିତ ପ୍ରବଳ ବର୍ଷା ଫଳରେ ସହର ର ଅବସ୍ଥା ବେହାଲ ହୋଇପଡିଛି। ଏପରିକି ମ୍ୟୁନିସିପାଲ ଟି ଏକ୍ଜ୍ୟୁଟିଭ ଅଫିସର ଙ୍କ ବାସଭବନ ସହ ପାର୍କ ଲାଇନ, ଭାଲୁକିପାତଳା, ବଡହଳ, ଧୋବାଡିହ ରାସ୍ତା, ମାଇନିଂ ସ୍ଥିତ ବନାର୍ଜ୍ଜି କଲୋନୀ, ସାହୁ କଲୋନୀ, ବଳଦେବଜୀଉ କଲୋନୀ, ସ୍ପଞ୍ଜ କଲୋନୀ ଆଦି ଅନେକ ଅଞ୍ଚଳ ର ରାସ୍ତା ଘାଟ ସହ ଘର ଭିତରେ ମଧ୍ୟ ପଶିଛି ବର୍ଷା ପାଣି। ପୌରବାସୀ ପ୍ରାୟ ଏକ ପ୍ରକାର ଜଳବନ୍ଧୀ ହୋଇଯାଇଛନ୍ତି। ସବୁ ବର୍ଷ ର ବର୍ଷା ଦିନେ ପ୍ରାୟ ଏପରି ଅବସ୍ଥା ଭୋଗିବାକୁ ପଡୁଛି ସହରବାସୀଙ୍କୁ। ମ୍ୟୁନିସିପାଲ ଟି ପକ୍ଷରୁ ପ୍ରତିବର୍ଷ ଡ୍ରେନ କାମ ହେଉଛି କୋଟି କୋଟି ଟଙ୍କା ଖର୍ଚ୍ଚ ହେଉଛି ହେଲେ ଡ୍ରେନ କୁ ଅଧାରାସ୍ତା ରେ ଛାଡି ଦିଆଯାଉଛି ଆଉଟଲେଟ ରହୁ ନାହିଁ ଫଳରେ ଡ୍ରେନ ରେ ପାଣି ନିଷ୍କାସନ ହୋଇ ନପାରି ରାସ୍ତା ଉପରେ ପ୍ରବାହିତ ହେବା ସହ ଲୋକ ଙ୍କର ଘରେ ପାଣି ପଶୁଛି। ଲୋକ ଙ୍କ ଘରେ ଆଣ୍ଠୁଏ ଆଣ୍ଠୁଏ ପାଣି ପଶି ଥିବା ରୁ ଲୋକେ ନାହି ନଥିବା ଅସୁବିଧାର ସମ୍ମୁଖିନ ହେଉଛନ୍ତି। ଗତକାଲି ରାତି ଠାରୁ ବର୍ଷା ପାଣି ପଶିଥିବା କାରଣରୁ ଲୋକ ଙ୍କ ଘରେ ରୋଷେଇ ବାସ ବନ୍ଦ ହୋଇଯାଇଛି ବୋଲି କହିଛନ୍ତି ସହର ବାସିନ୍ଦା ମଦନ ମୋହନ ସ୍ୱାଇଁ ଭାଲୁକିପାତଲା ବାସିନ୍ଦା ପ୍ରଶନ୍ନ ମହାନ୍ତି ପ୍ରମୁଖ। ଲୋକଙ୍କୁ ଭୋକ ଉପାସରେ ରହବାକୁ ପଡୁଛି। ଲୋକେ ଘରୁ ବାହାର କୁ ବାହାରି ପାରୁ ନାହାନ୍ତି। ଏ ସଂମ୍ପର୍କରେ କୌଣସି ମତାମତ ଦେବାକୁ ପ୍ରଶାସନିକ ଅଧିକାରୀ ମାନେ ମନା କରିଦେଇଛନ୍ତି।
ଅନ୍ୟ ପକ୍ଷରେ ଜିଲ୍ଲାର ଉପର ମୁଣ୍ଡରେ ପ୍ରବଳ ବର୍ଷା ଯୋଗୁଁ ଆନନ୍ଦପୁର ଅଞ୍ଚଳ ବହୁ ଭାବେ ପ୍ରଭାବିତ ହୋଇଥିବା ବେଳେ ଦିନ ୧ ଟା ସୁଦ୍ଧା ଆନନ୍ଦପୁର ଠାରେ ବୈତରଣୀ ନଦୀର ବିଦ ସଂଙ୍କେତ ଉପରେ ପାଣି ପ୍ରଭାବିତ ହେଉଥିବା ସୂଚନା ମିଳିଛି। ଏଠାରେ ବିଦ ସଙ୍କେତ ୩୮.୩୬ ମିଟର ରହିଥିବା ବେଳେ ପାଣି ୩୯.୬୪ ମିଟର ଉଚ୍ଚରେ ପ୍ରଭାବିତ ହେଉଅଛି। ସେଭଳି ତୁରୁମୁଙ୍ଗା ପୋଲ ଉପରେ ମଧ୍ୟ ପ୍ରାୟ ୨ ଫୁଟ ଉଚ୍ଚରେ ବୈତରଣୀ ନଦୀ ଜଳ ପ୍ରଭାବିତ ହେଉଥିବାରୁ ଯାତାୟତ ପ୍ରଭାବିତ ହୋଇଅଛି।
