ଦୈତାରୀରେ ଓଏମସି ମାଇନ୍ସର ମନମୁଖୀ କାର୍ଯ୍ୟକୁ ନେଇ ବନ୍ୟଜନ୍ତୁ ଗାଁ ମୁହାଁ, ଭୟଭୀତ ଅବସ୍ଥାରେ ଜନସାଧାରଣ
ହରିଚନ୍ଦନପୁର,ତା ୧୭ ଜାନୁଆରୀ (ଓଡ଼ିଆ ପୁଅ/ପ୍ରେମାନନ୍ଦ ଦାସ) କେନ୍ଦୁଝର ଜିଲ୍ଲା ହରିଚନ୍ଦନପୁର ବ୍ଲକ ଦୈତାରୀ ମାଇନ୍ସରେ ଗତ କିଛି ଦିନ ପୂର୍ବେ ବାଘର ଆତଙ୍କ ଖେଳି ଯାଇଥିଲା । ଫଳରେ ସେଠାକାର ଲୋକମାନେ ଭୟଭୀତ ଅବସ୍ଥାରେ ରହୁଥିଲେ । ସେ ଘଟଣାକୁ ନେଇ ମାଇନ୍ସ କର୍ତୃପକ୍ଷ ଓ ବନବିଭାଗ କର୍ତ୍ତୃପକ୍ଷ ସଲାସୁତୁରା ହୋଇ ନିରବଦ୍ରଷ୍ଟା ହୋଇଗଲେ । ହେଲେ ଏବେ ପୁଣି ଦୈତାରୀ ଥାନା ନିକଟରେ ଦନ୍ତା ହାତୀର ତାଣ୍ଡବ ଦେଖିବାକୁ ମିଳିଛି ।
ଗତ କାଲି ରାତିରେ ବଣୁଆ ଦନ୍ତା ହାତୀ ଜଣେ ସିଆଇଏସଏଫ ଯବାନଙ୍କ ଘର ଭାଙ୍ଗିବା ସହ ଯବାନଙ୍କ ପେଟରେ ଦାନ୍ତ ଏମିତି ଭୁସି ଦେଇଥିଲା ଯେ ତାଙ୍କର ଅନ୍ତଭୁଜୁଳା ସମ୍ପୂର୍ଣ୍ଣ ବାହାରି ଯାଇଥିଲା । ତାଙ୍କୁ ଗୁରୁତର ଅବସ୍ଥାରେ ସଙ୍ଗେ ସଙ୍ଗେ କଳିଙ୍ଗନଗର ଟାଟା ମେଡିକାଲକୁ ସ୍ଥାନାନ୍ତର କରାଯାଇଛି ।
ଖବର ମୁତାବକ ବଙ୍ଗଳୀ ସୋରେନ୍ ଜଣେ ସିଆଇଏସଏଫ (CISF) ଯବାନ, ସେ ରାଉରକେଲାରେ ଚାକିରୀ କରୁଛନ୍ତି । ମକର ସଂକ୍ରାନ୍ତି ଉପଲକ୍ଷେ ଛୁଟି କଟାଇବା ପାଇଁ ଘରକୁ ଆସିଥିଲେ । ହେଲେ ବର୍ତ୍ତମାନ ଯବାନ ଜଣଙ୍କ ଜୀବନ ମରଣ ସହ ସଂଘର୍ଷ କରିଚାଲିଛନ୍ତି ।
ଘଟଣାରୁ ଯଣାପଡିଛି ଯେ ଗୁରୁବାର ରାତିରେ ଦୈତାରୀର ଫର୍ଟି ଟୁନାମେଣ୍ଟ ଅଞ୍ଚଳର କୁନା ସୋରେନ ଓ ବଙ୍ଗାଳି ସୋରେନ ଘରେ ସୋଇଥିବା ବେଳେ ଏକ ଦନ୍ତା ହାତୀ ଆସି ପ୍ରଥମେ ଘରକୁ ଭାଙ୍ଗିଥିଲା । ଘର ଭାଙ୍ଗିବା ଶବ୍ଦ ଶୁଣି କୁନା ଗ୍ରୀଲ ପାଖକୁ ଆସି ହାତୀ ଘରଭାଙ୍ଗୁ ଥିବାର ଦୃଶ୍ୟ ଦେଖିଥିଲେ । କୁନା ତାର ଭାଇ ବଙ୍ଗାଳୀ ଏବଂ ଘରର ସମସ୍ତ ସଦସ୍ୟଙ୍କୁ ଉଠାଇ ଘଟଣା ସମ୍ପର୍କରେ ଜଣାଇଥିଲେ । ଜୀବନ ବଞ୍ଚାଇବାକୁ ଯାଇ ଘର ବାହାରକୁ ଦୈାଡି ପଳାଉଥିବା ସମୟରେ ହାତୀଟି ଦୈାଡି ଯାଇ ଘରର କିଛିବାଟ ଦୂରରେ ବଙ୍ଗାଳୀକୁ ମରଣାନ୍ତକ ଆକ୍ରମଣ କରିଥିଲା । ପରିବାରର ଅନ୍ୟ ସଦସ୍ୟମାନେ ବର୍ତ୍ତି ଯାଇଥିବା ବେଳେ ବଙ୍ଗଳୀ ଆକ୍ରମଣର ଶିକାର ହୋଇ ସେ ଗୁରୁତର ହୋଇଛନ୍ତି ।
ଘଟଣାର ଖବର ପାଇ ବନବିଭାଗର ଉଚ୍ଚପଦସ୍ଥ ଅଧିକାରୀ ଘଟଣାସ୍ଥଳରେ ପହଞ୍ଚି ଘଟଣାର ତଦନ୍ତ ପରେ ଆହାତ ପରିବାର ଓ ସରପଞ୍ଚ ସହ ଆଲୋଚନା କରିଥିଲେ । ଏଥିସହ ସରକାରଙ୍କ ନିୟମ ଅନୁଯାୟୀ ସହାୟତା ରାଶି ପ୍ରଦାନ କରାଯିବାକୁ ପ୍ରତିଶୃତି ଦେଇଛନ୍ତି ।
ସ୍ଥାନୀୟ ଲୋକଙ୍କ କହିବା ଅନୁସାରେ ଓଏମସି ମାଇନ୍ସର ମନମୁଖୀ କାର୍ଯ୍ୟକୁ ନେଇ ଗତ କିଛି ଦିନ ହେବ ବନ୍ୟଜନ୍ତୁ ଗାଁ ମୁହାଁ ହେବାକୁ ବାଧ୍ୟ ହେଉଛନ୍ତି । ଫଳରେ ଅନେକ ଜନଜୀବନ ନଷ୍ଟ ହେବା ସହ ଭୟଭୀତ ଅବସ୍ଥାରେ ଅଞ୍ଚଳବାସୀ । ଏଥିପ୍ରତି ଜିଲ୍ଲା ପ୍ରଶାସନ ଦୃଷ୍ଟି ଦେଇ ପୁଙ୍ଖାନୁପୁଙ୍ଖ ତଦନ୍ତ କରି ଦୃଢ଼ ପଦକ୍ଷେପ ଗ୍ରହଣ କରିବାକୁ ଅଞ୍ଚଳବାସୀ ଦାବି କରିଛନ୍ତି ।
