ଭଦ୍ରକ, ୧୭ା୭ (ଓଡିଆ ପୁଅ / ସ୍ନିଗ୍ଧା ରାୟ) – ତିହିଡି ଥାନା ଅଧିନ ତିହିଡି଼ ବଜାରରେ ଥିବା ସରକାରୀ ବିଦେଶୀ ମଦ ଦୋକାନରୁ ଚୋରି ହୋଉଥିବା ଅଭିଯୋଗ ହୋଇଛି। ପୋଲିସ ଏସମ୍ପର୍କରେ ୨୫୮/୨୬ ମକଦ୍ଧମା ରୁଜୁକରି ତଦନ୍ତ ଚଳାଇଥିଲେ।ଶୁକ୍ରବାର ପୋଲିସ ଦୋକାନର କର୍ମଚାରୀକୁ ଗିରଫ କରିଥିବା ଜଣାଯାଇଛି।କର୍ମଚାରୀଙ୍କ ନାଁ ରାଜକିଶୋର ସାହୁ (୩୮)ଏବଂ ତାଙ୍କ ଘର ବାସୁଦେବପୁର ଏନଏସି ଅଧୀନ ୧୧ନଂ ୱାର୍ଡ ରେ ବୋଲି ଜଣାଯାଇଛି । ଗିରଫ ଯୁବକଙ୍କ ଠାରୁ ପୋଲିସ ୬ଲକ୍ଷ ୫୦ହଜାର ଟଙ୍କା ସମେତ ଏକ ହୋଣ୍ଡା ୟୁନିକ ବାଇକ ଓ ନକଲି ଆଧାର କାର୍ଡ଼ ଜବତ କରିଛି । ଆଇଆଇସି ଲୋପାମୁଦ୍ରା ନାୟକ ସୂଚନା ଦେଇ କହିଛନ୍ତି ଯେ ତିହିଡି଼ରେ ଥିବା ବିଦେଶୀ ମଦ ଦୋକାନରୁ ଗତ ୧୨ତାରିଖ ଅପରାହ୍ନରେ ୧୦ଲକ୍ଷ ଟଙ୍କା ଚୋରି ହୋଇଥିବା ନେଇ ଦୋକାନ ମାଲିକ ଭଦ୍ରକ ଅଂଚଳର ରାଜକୁମାର ସାହୁ ଅଭିଯୋଗ କରିଥିଲେ । ତାଙ୍କ ଦୋକାନ କର୍ମଚାରୀ ବାଲେଶ୍ୱର ଜିଲା କୁରୁଡ଼ା ଅଂଚଳର ରାଜକିଶୋର ଏହି ଚୋରି କରିଥିବା ଏବଂ ଚୋରି ସମୟରେ ସିସି ଟିଭି ବନ୍ଦ କରି ଦେଇଥିବା ଦୋକାନ ମାଲିକ ସାହୁ ଅଭିଯୋଗରେ ଦର୍ଶାଇଥିଲେ । ପୋଲିସ ରାଜକିଶୋରଙ୍କୁ ଗିରଫ କରିବା ପରେ ତାଙ୍କ ଘର ଗୋଟେ ଅଂଚଳର ହୋଇଥିବା ବେଳେ ସେ ବିଦେଶୀ ମଦ ଦୋକାନରେ ନକଲି ଆଧାର କାର୍ଡ଼ ଦେଇ କାମ କରୁଥିବା ଜଣାଯାଇଥିଲା । ଏପରିକି ରାଜକିଶୋର ନକଲି ଆଧାର କାର୍ଡ଼ ପ୍ରସ୍ତୁତି କାର୍ଯ୍ୟ ମଧ୍ୟ ଚଳାଇଥିଲେ । ବାସୁଦେବପୁର ନାୟକାଣୀଡିହ ଅଂଚଳର ଅନ୍ୟ ଏକ ନକଲି ପରିଚୟ ପତ୍ର ମଧ୍ୟ ତାଙ୍କ ଠାରୁ ଜବତ ହୋଇଥିବା ଆଇଆଇସି ନାୟକ ସୂଚନା ଦେଇଛନ୍ତି ।
