Home ଓଡ଼ିଶା ବିନା ଅଧିକାରୀରେ ଚାଲିଛି ହରିଚନ୍ଦନପୁର ବ୍ଲକର ବିଭିନ୍ନ ସରକାରୀ କାର୍ଯ୍ୟାଳୟ, ଆଦିବାସୀଙ୍କୁ ଭଗବାନ ହିଁ ଭରଷା

ବିନା ଅଧିକାରୀରେ ଚାଲିଛି ହରିଚନ୍ଦନପୁର ବ୍ଲକର ବିଭିନ୍ନ ସରକାରୀ କାର୍ଯ୍ୟାଳୟ, ଆଦିବାସୀଙ୍କୁ ଭଗବାନ ହିଁ ଭରଷା

215

ହରିଚନ୍ଦନପୁର,ତା ୧୩ ଅଗଷ୍ଟ (ଓଡ଼ିଆ ପୁଅ/ପ୍ରେମାନନ୍ଦ ଦାସ) କେନ୍ଦ୍ର ଓ ରାଜ୍ୟସରକାର ଜନସାଧାରଣଙ୍କୁ ସମସ୍ତ ସୁବିଧା ଯୋଗାଇଦେବାକୁ ବ୍ଲକସ୍ତରରେ ବିଭିନ୍ନ ବିଭାଗର କାର୍ଯ୍ୟାଳୟ ଖୋଲିଛନ୍ତି । ହେଲେ କାର୍ଯ୍ୟାଳୟ ଗୁଡିକରେ ଅଧିକାରୀମାନଙ୍କର ଅବସର ଓ ଅନ୍ୟତ୍ର ବଦଳି ଫଳରେ ଅଧିକାରୀ ଭଳି ଗୁରୁତ ପୂର୍ଣ୍ଣ ପଦବୀ ଗୁଡିକ ଅନେକ ଦିନ ହେବ ଖାଲି ପଡିଛି । ଅନ୍ୟ ବ୍ଲକର ଅଧିକାରୀମାନଙ୍କୁ ଏହି ବ୍ଲକରେ ଅତିରିକ୍ତ ଦାୟିତ୍ୱ ଦିଆଯାଇଥିବା ବେଳେ ସେମାନେ ନିୟମିତ ନଆସିବାରୁ ବିଭିନ୍ନ ଗୁରୁତ୍ୱପୂର୍ଣ୍ଣ କାମ ପାଇଁ ବହୁ ଦୁରଦୁରାନ୍ତରୁ ଆସୁଥିବା ଶହଶହ ଲୋକ ଅଧିକାରୀମାନଙ୍କୁ ନପାଇ ନିରାଶ ହୋଇ ଫେରୁଥିବା ଦେଖିବାକୁ ମିଳିଛି । ଖାଲି ବ୍ଲକର ବିଡିଓ ନୁହଁନ୍ତି ରାଜସ୍ୱ, ସ୍ୱାସ୍ଥ୍ୟ, ଶିକ୍ଷା ଓ ଜଳ ସେଚନ ପରି ଗୁରୁତପୂର୍ଣ୍ଣ ଅଧିକାରୀଙ୍କ ପଦବୀ ଖାଲି ପଡିଛି । ଆମେ କହୁଛୁ ରାଜ୍ୟର ଆୟତନ ଦୃଷ୍ଟିରେ ଦ୍ୱିତୀୟ ବୃହତମ ବ୍ଲକ ଭାବରେ ପରିଚିତ ଆଦିବାସୀ ଅଧ୍ୟୁଷିତ କେନ୍ଦୁଝର ଜିଲ୍ଲାର ହରିଚନ୍ଦନପୁର ବ୍ଲକ କଥା । ହରିଚନ୍ଦନପୁର ବ୍ଲକର ଅଧିକାରୀଙ୍କ ପଦବୀ ଚଳିତ ବର୍ଷ ଅପ୍ରେଲ ମାସରୁ ଖାଲି ପଡିଥିବା ବେଳେ ସହକାରୀ ଓ ନିର୍ବାହୀଯନ୍ତ୍ରୀ ସମେତ ସାମାଜିକ ସୁରକ୍ଷା ଅଧିକାରୀ ଓ ୧୦ଟି ପଞ୍ଚାୟତର ର୍ନିବାହୀ ଅଧିକାରୀଙ୍କ ପଦବୀ ୧ବର୍ଷ ହେବ ଖାଲି ପଡିଥିବା ଜଣାପଡିଛି । ତହସିଲଦାର ପଦବୀ ପ୍ରାୟ ୧ମାସ ହେବ ଖାଲିପଡିଥିବା ବେଳେ ଓ ଅତିରିକ୍ତ ତହସିଲଦାରଙ୍କ ଅବସରର ପରେ ପଦବୀ ଖାଲି ପଡିଥିବା ବିଭାଗ ପକ୍ଷରୁ ସୂଚନା ମିଳିଛି । କରୋନା ମହାମାରୀ ସମୟରେ ଉଭୟ ସରକାର ସ୍ୱାସ୍ଥ୍ୟ ବିଭାଗକୁ ଗୁରୁତ୍ୱ ଦେଉଥିବା ବେଳେ ହରିଚନ୍ଦନପୁର ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ଚିକିତ୍ସାଅଧିକାରୀଙ୍କ ସହ ୪ଟି ଡାକ୍ତର ପଦବୀ ଖାଲିପଡିଛି । ଏହି ଚିକିତ୍ସାଳୟର ମୁଖ୍ୟ ଅଧିକାରୀ ପଦବୀ ଖାଲିଥିବାରୁ ଘଟଗାଁ ଚିକିତ୍ସାଅଧିକାରୀଙ୍କୁ ସ୍ୱାସ୍ଥ୍ୟକେନ୍ଦ୍ରର ଅତିରିକ୍ତ ଦାୟିତ୍ୱ ପ୍ରଦାନ କରାଯାଇଛି । ଏଥିସହ ବ୍ଲକର ପିଠାଗୋଳା ଓ କଳାପାଟ ସ୍ୱାସ୍ଥ୍ୟକେନ୍ଦ୍ରରେ ଡାକ୍ତର ପଦବୀ ଖାଲି ପଡିଛି । ସେହିପରି ବ୍ଲକର ଶିକ୍ଷାଅଧିକାରୀ ପଦବୀ ଖାଲିଥିବା ବେଳେ ଦୁଇଟି ସହକାରୀ ଶିକ୍ଷାଧିକାରୀ ପଦବୀ ଖାଲିପଡିଥିବାକୁ ନେଇ ଘଟଗାଁ ଶିକ୍ଷାଅଧିକାରୀଙ୍କୁ ଅତିରିକ୍ତ ଦାୟିତ୍ୱ ଦିଆଯାଇଛି । ସେହିପରି ଜଳସମ୍ପଦ ବିଭାଗର ଅସକାରୀ ଯନ୍ତ୍ରୀ ସମେତ କନିଷ୍ଠଯନ୍ତ୍ରୀ ଗତ ଜାନୁୟାରୀ ମାସରୁ ବଦଳି ହେଲେଣି ଏହାର ଅତିରିକ୍ତ ଦାୟିତ୍ୱ ଘଟଗାଁ ସବଡିଭିଜନର ସହକାରୀ ଯନ୍ତ୍ରୀଙ୍କୁ ଦିଆଯାଇଛି । ଯାହାକୁ ନେଇ ସାଧାରଣରେ ଆଲୋଚନା, କେବଳ ଭଗବାନଙ୍କ ଭରଷାରେ ଚାଲିଛି ହରିଚନ୍ଦନପୁର ବ୍ଲକ । ଅତି ଦୁଃଖ ଓ ପରିତାପର ବିଷୟ କୋରନା ଭଳି ମହାମାରୀ ସମୟରେ ମନ୍ତ୍ରୀଙ୍କ ନିର୍ବାଚନ ମଣ୍ଡଳୀରେ ଏଭଳି ଗୁରୁତ୍ୱପୂର୍ଣ୍ଣ ବିଭାଗର ଅଧିକାରୀ ପଦବୀ ଖାଲି ପଡିଥିବାରୁ ଜନସାଧାରଣରେ ଅନେକ ପ୍ରଶ୍ନ ଉଠୁଛି । ଏଥିପ୍ରତି ରାଜ୍ୟର ଉଚ୍ଚପଦସ୍ଥ ଅଧିକାରୀ ଦୃଷ୍ଟିଦେଇ ଯଥାଶିଘ୍ର ଏହି ପଦବୀ ଗୁଡିକ ପୂରଣ କଲେ ଏ ଆଦିବାସୀ ଅଞ୍ଚଳର ଜନସାଧାରଣ ଉପକୃତ ହୁଅନ୍ତେ ବୋଲି ଶିକ୍ଷାବିତ ମହଲରେ ମତ ପ୍ରକାଶ ।

LEAVE A REPLY

Please enter your comment!
Please enter your name here

Solve this *Time limit exceeded. Please complete the captcha once again.