ଭଦ୍ରକ, ୧୪ା୩ (ଓଡ଼ିଆ ପୁଅ / ସ୍ନିଗ୍ଧା ରାୟ) – ଭଦ୍ରକ ଜିଲାରେ ଥାଲସେମିଆ ରୋଗୀମାନଙ୍କର ଦୂରାବସ୍ଥା ଦିନକୁ ଦିନ ବଢିବାରେ ଲାଗିଛି । ଉପଯୁକ୍ତ ଚିକିତ୍ସା ଅଭାବରୁ ରୋଗୀମାନେ ବହୁ ଯନ୍ତ୍ରଣା ଭୋଗ କରୁଛନ୍ତି । ଥାଲସେମିଆ ରୋଗ ଜନିତ ସଂକ୍ରମିତ, ଗ୍ରୋଥ୍ ଶୀଘ୍ର ନଘଟିବା, ବୋନ୍ ଠିକ୍ ଭାବେ କାମ ନକରିବା ଭଳି ରୋଗୀମାନେ ବହୁ ଅସୁବିଧାର ସମ୍ମୁଖୀନ ହେଉଛନ୍ତି । ରକ୍ତଦାନର ବ୍ୟବସ୍ଥା, ରକ୍ତଭଣ୍ଡାରର ସୁବ୍ୟବସ୍ଥା ନଥିବାରୁ ଥାଲସେମିଆ ୱାର୍ଡ ଓ ଅଭିଜ୍ଞ ଡାକ୍ତର ଅଭାବରୁ ରୋଗୀମାନେ ନାନାଦି ହଇରାଣ ମଧ୍ୟ ହେଉଛନ୍ତି । ରକ୍ତ ସଂଗ୍ରହ ଓ ରକ୍ତ ଜମା ରଖିବାରେ ବିଫଳ ହୋଇଛି ଜିଲା ମୁଖ୍ୟ ଡାକ୍ତରଖାନା । ସମଗ୍ର ଭଦ୍ରକ ଜିଲାରେ ପ୍ରାୟ ୫ ଶହରୁ ଅଧିକ ଥାଲସେମିଆ ରୋଗୀ ଥିବାବେଳେ ଏହା କ୍ରମବର୍ଦ୍ଧଷ୍ଣୁ ଗତିରେ ବଢିବାରେ ଲାଗିଛି । ଏବଂ ରକ୍ତଦାନ ଶିବିର କରାଯାଇ ସଂଗ୍ରହ ଅଧିକ କରାଯିବାର ଆବଶ୍ୟକତା ରହିଛି । ଗୋଟିଏ ରୋଗୀକୁ ମାସକୁ ୨ ଥର ରକ୍ତ ଦିଆଯାଉଛି । ଏ+, ଏବି- ଭଳି ବିରଳ ରକ୍ତ ଅଭାବରୁ ଏହି ବ୍ଲଡ୍ ଗ୍ରୁପ୍ର ରୋଗୀ ମୃତ୍ୟୁମୁଖରେ ପଡୁଛନ୍ତି । ଏବଂ ଡାକ୍ତରଖାନାରେ ମଧ୍ୟ ସହାୟକ ଓ କର୍ମଚାରୀଙ୍କର ଅଭାବ ରହିଛି । ନୂତନ ଭାବେ ନିର୍ମାଣ କରାଯାଇଥିବା ଭଦ୍ରକ ଜିଲା ମୁଖ୍ୟ ଚିକିତ୍ସାଳରେ ବାଲେଶ୍ୱର, କେନ୍ଦୁଝର, ଯାଜପୁର ଓ କେନ୍ଦ୍ରାପଡା ଜିଲାରୁ ୩୦ ଭାଗ ରୋଗୀ ରହିଥିବାବେଳେ ଭଦ୍ରକ ଜିଲାର ରୋଗୀ ଆଡମିଶନ ପାଇପାରୁନାର୍ହାନ୍ତି । ଭଦ୍ରକ ଜିଲାପାଳ ଏହି ମର୍ମରେ ରାଜ୍ୟ ସରକାରଙ୍କୁ ଅବଗତ କରାଇ ତୁରନ୍ତ ମେଡିକାଲ କଲେଜ ପାଇଁ ପ୍ରଶାସନିକ ଦାବି ପ୍ରେରଣ କରନ୍ତୁ ।
ସ୍ତ୍ରୀ ଓ ପ୍ରସୂତି ବିଭାଗ ଓ ଶିଶୁ ରୋଗ ବିଭାଗ ଡାକ୍ତର, ଅଭିଜ୍ଞ ପାରା ମେଡିକାଲ ଷ୍ଟାଫ, ଉପକରଣ ଅଭାବ ଓ ଅତ୍ୟଧିକ ମେଡିସିନ୍ କୌଣସି କାମରେ ଆସୁନଥିବାର ଅଭିଯୋଗ ହୋଇଛି । ଭଦ୍ରକ ଜିଲା କଂଗ୍ରେସ କମିଟି ଥାଲସେମିଆ ରୋଗୀମାନଙ୍କ ପାଇଁ ଏକ ସ୍ୱତନ୍ତ୍ର ୱାର୍ଡ ଓ ସମସ୍ତ ବ୍ୟବସ୍ଥା, ଅଭିଜ୍ଞ ଡାକ୍ତର ନିଯୁକ୍ତି ଦେବାକୁ ଏହି ସାମ୍ବାଦିକ ସମ୍ମିଳନୀରେ ଦାବି କରିଛି । ଏହି ସାମ୍ବାଦିକ ସମ୍ମିଳନୀରେ ଜିଲା ମିଡିଆ ସେଲର ଆବାହକ ଶୁଭେନ୍ଦୁ ରାୟ ମହାପାତ୍ର, ଜିଲା ଯୁବ କଂଗ୍ରେସ ସଭାପତି ବଳରାମ ରାଉତ, ଜିଲା ବିଧାନସଭା ଯୁବ କଂଗ୍ରେସ ସଭାପତି ଇଲିୟାସ ଅଲ୍ଲୀ ଖାଁ ଓ ଭଦ୍ରକ ବିଧାନସଭା ଯୁବ କଂଗ୍ରେସ ସାଧାରଣ ସଂପାଦକ ସୁଶାନ୍ତ କୁମାର ଦାସ ପ୍ରମୁଖ ଉପସ୍ଥିତ ଥିଲେ । ଏବଂ ଭଦ୍ରକ ଜିଲା କଂଗ୍ରେସ କମିଟିର ସଭାପତି ଅଶୋକ କୁମାର ଦାସ ଏକ ସମର୍ଥନ ପତ୍ର ମାଧ୍ୟମରେ ବରପଦା ଯାନ୍ତ୍ରିକ ବୈଷୟିକ ବିଦ୍ୟାଳୟର ଆନ୍ଦୋଳନରତ କର୍ମଚାରୀଙ୍କ ଦାବୀକୁ ସମର୍ଥନ ଜଣାଇଛନ୍ତି । ଏହି ସମର୍ଥନ ପତ୍ରରେ ଉଲ୍ଲେଖ ରହିଛି ଏମାନଙ୍କ ଦାବୀ ଯଥାର୍ଥ ଅଟେ । ସେମାନେ ଯେଉଁ ପରିଚାଳନା କମିଟି ଭଂଗ କରିବାକୁ ଦାବୀ କରୁଛନ୍ତି, ତାହା ଯଥାର୍ଥ । ଭାରତୀୟ ଜାତୀୟ କଂଗ୍ରେସ, ଭଦ୍ରକ ଜିଲା ଏହାର ସଂପୂର୍ଣ୍ଣ ସମର୍ଥନ କରୁଛି । ବର୍ତ୍ତମାନର ପରିଚାଳନା କମିଟି ସଂପୂର୍ଣ୍ଣ ଭାବେ ଏକ ପରିବାର ଦ୍ୱାରା ନିୟନ୍ତ୍ରିତ । ଯାହାକୁ ଭଂଗ କରି ଜିଲାପାଳ ସଭାପତି ହୋଇ ଏକ ନୂତନ ପରିଚାଳନା କମିଟି ଗଠନ କରି ଏହାର ଦାୟିତ୍ୱ ନେବାକୁ ଆନ୍ଦୋଳନରତ କର୍ମଚାରୀଙ୍କ ଦାବୀକୁ ଭାରତୀୟ ଜାତୀୟ କଂଗ୍ରେସ ଭଦ୍ରକ ଜିଲା ସମର୍ଥନ କରୁଛି । ଆନ୍ଦୋଳନରତ କର୍ମଚାରୀମାନଙ୍କୁ ଗଣତାନ୍ତ୍ରିକ ପଦ୍ଧତିରେ ଏହି ଆନ୍ଦୋଳନକୁ ଆଗେଇ ନେବା ପାଇଁ ଯାହା ନିଷ୍ପତ୍ତି ନେବେ, ତାହାକୁ ଭାରତୀୟ ଜାତୀୟ କଂଗ୍ରେସ ସମର୍ଥନ ଜଣାଉଛି ବୋଲି ସଭାପତି ଶ୍ରୀ ଦାସ ସମର୍ଥନ ପତ୍ର ମାଧ୍ୟମରେ ସୂଚନା ଦେଇଛନ୍ତି ।
