ଭଦ୍ରକ, ୭ା୧୦ (ଓଡ଼ିଆ ପୁଅ / ସ୍ନିଗ୍ଧା ରାୟ) – ଭଦ୍ରକ ଜିଲା ତିହିଡ଼ି ଉଚ୍ଚ ମାଧ୍ୟମିକ ବିଦ୍ୟାଳୟର ବିଭିନ୍ନ ବିଭାଗର ଅଧ୍ୟାପକ ଅଭାବ ରହିଛି । ଯେଉଁଥିପାଇଁ ଶିକ୍ଷାଦାନରେ ବାଧା ସୃଷ୍ଟି ହେଉଥିବା ଜଣାପଡ଼ିଛି । ତେବେ ତୁରନ୍ତ ବିଭିନ୍ନ ବିଭାଗରେ ଖାଲିଥିବା ଅଧ୍ୟାପକ ସ୍ଥାନ ପୂରଣ କରିବାକୁ ଅଭିଭାବକ ତଥା ଜନସାଧାରଣରେ ଦାବି କରାଯାଇଛି । ତିହିଡ଼ି ବ୍ଲକରେ ଛାତ୍ରଛାତ୍ରୀଙ୍କ ଉଚ୍ଚ ଶିକ୍ଷାପାଇଁ ତତ୍କାଳୀନ ଶିକ୍ଷାବିତ୍ ଓ ବୁଦ୍ଧିଜୀବୀମାନଙ୍କ ପ୍ରଚେଷ୍ଟାରେ ତିହିଡ଼ି କଲେଜ ୧୯୮୬ ମସିହାରେ ସ୍ଥାପନ କରାଯାଇଛି । ଏହି କଲେଜରେ ତିହିଡ଼ି ବ୍ଲକ ସମେତ ଜିଲ୍ଲା ତଥା ବାହାର ଜିଲ୍ଲାର ଛାତ୍ରଛାତ୍ରୀମାନେ ଅଧ୍ୟୟନ କରି ଆସୁଛନ୍ତି । ବିଶେଷ ଭାବେ ଏହି କଲେଜ ଗ୍ରାମାଞ୍ଚଳର ପିଲାମାନଙ୍କୁ ଉଚ୍ଚ ଶିକ୍ଷା ଦେବାରେ ଗୁରୁତ୍ୱପୂର୍ଣ୍ଣ ଭୂମିକା ବହନ କରିଛି । ମୁଖ୍ୟତଃ ଗ୍ରାମାଞ୍ଚଳର ବହୁ ବାଳିକା ପୂର୍ବରୁ ଉଚ୍ଚ ଶିକ୍ଷା ପାଇବାରୁ ବଂଚିତ ହେଉଥିଲେ । ଏହି କଲେଜ ସ୍ଥାପନ ହେବା ପରେ ବିଶେଷ କରି ସ୍ଥାନୀୟ ଅଞ୍ଚଳର ବାଳିକାମାନେ ଉଚ୍ଚ ଶିକ୍ଷା ଲାଭ କରିପାରୁଛନ୍ତି । ସରକାରଙ୍କ ପରିବର୍ତ୍ତିତ ନିୟମ ଅନୁସାରେ ତିହିଡ଼ି କଲେଜ ଏବେ ଉଚ୍ଚ ମାଧ୍ୟମିକ ବିଦ୍ୟାଳୟରେ ନାମିତ ହୋଇଛି । କଲେଜରେ ସମସ୍ତ ବିଭାଗରେ ଛାତ୍ରଛାତ୍ରୀମାନେ ଅଧ୍ୟୟନ କରୁଥିବା ବେଳେ ଅଧ୍ୟାପକମାନଙ୍କର ଅଭାବ ପାଇଁ ପିଲାମାନେ ଉପଯୁକ୍ତ ଶିକ୍ଷାଗ୍ରହଣରୁ ବଂଚିତ ହେଉଛନ୍ତି । ବର୍ତ୍ତମାନ ଏହି କଲେଜରେ ପ୍ରଥମ ଓ ଦ୍ୱିତୀୟ କଳା ବିଭାଗରେ ୫୧୨, ବିଜ୍ଞାନ ବିଭାଗରେ ୨୫୬, ବାଣିଜ୍ୟ ବିଭାଗରେ ୨୫୬ ଓ ଧନ୍ଦାମୂଳକ ବିଭାଗରେ ୪୦ଜଣ ଛାତ୍ରଛାତ୍ରୀ ଅଧ୍ୟୟନ କରୁଛନ୍ତି । ମାତ୍ର କଲେଜର ରାଜନୀତି ବିଜ୍ଞାନ ବିଭାଗରେ ଜଣେ, ଇତିହାସ ବିଭାଗରେ ଜଣେ, ଅର୍ଥନୀତି ବିଭାଗରେ ୨ଜଣ, ଜୁଲୋଜିରେ ଜଣେ, ଓଡ଼ିଆରେ ଜଣେ ଅଧ୍ୟାପକଙ୍କ ସ୍ଥାନ ଖାଲି ପଡ଼ିଛି । ସେହିପରି ଲାଇବ୍ରେରୀ ସହକାରୀ, ଲାଇବ୍ରେରୀ ଅଟେଣ୍ଡାଣ୍ଟ, ମୁଖ୍ୟ କିରାଣୀ ଓ ସହକାରୀ କିରାଣୀ ସହିତ ଜଣେ ପିଅନ ସ୍ଥାନ ମଧ୍ୟ ଖାଲି ପଡ଼ିଛି । ଯାହାଫଳରେ କଲେଜର ଶିକ୍ଷାଦାନ ସହିତ ଅନ୍ୟାନ୍ୟ କାର୍ଯ୍ୟ ବାଧାପ୍ରାପ୍ତ ହେଉଥିବା ଜଣାପଡ଼ିଛି ।
