ଭଦ୍ରକ, ୪ା୧୦ (ଓଡ଼ିଆ ପୁଅ / ସ୍ନିଗ୍ଧା ରାୟ) – ଭଦ୍ରକ ଜିଲା ଭଣ୍ଡାରିପୋଖରୀ ବ୍ଲକ ନେରଡା ପଞ୍ଚାୟତ ପୁରିପଡା ଗ୍ରାମର କୈଳାସ ରାଉତଙ୍କ ବାସଗୃହ ଓ ଗୁହାଳ ଗତକାଲି ବିଳମ୍ବିତ ରାତିରେ ଅଗ୍ନିକାଣ୍ଡରେ ଜଳିଯିବା ସହ ଚାରି ଗୋରୁ ଜୀବନ୍ତ ଦଗ୍ଧ ହୋଇଛନ୍ତି । କୈଳାସ ସନ୍ଧ୍ୟାବେଳେ ଗୁହାଳେ ମଶାଧୂଆଁ ଦେଇଥିଲେ । ଏହି ନିଆଁରୁ ଅଗ୍ନିକାଣ୍ଡ ହୋଇଥିଲା । ସେହି ସମୟରେ କୈଳାସ ପରିବାର ଶୋଇ ପଡିଥିଲେ । ଅଗ୍ନି ଧାସରେ ପରିବାର ଲୋକେ ଉଠି ନିଆଁ ଜଳୁଥିବା ଦେଖି ଜୀବନ ବିକଳରେ ସମସ୍ତେ ଘରୁ ପଦାକୁ ବାହାରି ଆସିବାକୁ ସମର୍ଥ ହୋଇଥିଲେ । ହେଲେ କୌଣସି ଆସବାବପତ୍ର ବାହାରିପାରିନଥିଲା । ଏପରିକି ଗୁହାଳରେ ବନ୍ଧା ହୋଇଥିବା ଚାରି ଗୋରୁ ଜୀବନ୍ତ ଜଳିଯାଇଥିଲେ । ଗ୍ରାମବାସୀ ନିଆଁ ଲିଭାଇବାକୁ ଉଦ୍ୟମ କରି ସଫଳ ହୋଇନଥିଲେ । ଖବରପାଇ ଭଣ୍ଡାରିପୋଖରୀରୁ ଦମକଳ ବାହିନୀ ଆସି ଅଗ୍ନିକୁ ଆୟତ୍ତ କରିଥିଲା । ଅଗ୍ନିକାଣ୍ଡରେ ଦୁଇବଖରା ଚାଳଘର ସମେତ ପ୍ରାୟ ଲକ୍ଷାଧିକ ଟଙ୍କାର ସମ୍ପତ୍ତି ଜଳିଯାଇଛି ।
