ହାଟଡ଼ିହି, ୧୭ । ୬ : ହାଟଡିହି ବ୍ଲକ ଓରାଳି ଗ୍ରାମରୁ ଆଜି ନନ୍ଦିପଦା ପୁଲିସ ୩ପେଟି ବୋତଲ ବିଦେଶୀ ମଦ ଜବଦ କରିଛି । ଓରାଳି ଗ୍ରାମରେ ଗ୍ରାମବାସୀଙ୍କ ବାରଣ ଯୋଗୁଁ ଦୀର୍ଘ ତିନିବର୍ଷ ହେଲା ଗାଁରେ ମଦ ବିକ୍ରୀ ବନ୍ଦ ଥିବାବେଳେ ଜଣେ ବ୍ୟକ୍ତି ଗତ କିଛିଦିନ ହେଲା ଚୋରାରେ ଆଣି ଲୁଚାଛପାରେ ବିଦେଶୀ ମଦ ବିକ୍ରୀ ଆରମ୍ଭ କରିଥିଲା । ଏନେଇ ଖବର ପାଇବାପରେ ଆଜି ନନ୍ଦିପଦା ଥାନା ଅଧିକାରୀ ମଦନ ମୋହନ ନାୟକ ଅଚାନକ ଚଢ଼ାଉ କରିବାପରେ ଏକ ପରିତ୍ୟକ୍ତ ଘର ଭିତରୁ ତିନିପେଟି (୧୪୪ବୋତଲ) ବିଦେଶୀ ମଦ ଜବଦ କରିବାରେ ସକ୍ଷମ ହୋଇଥିଲା । ପୁଲିସ ଚଢ଼ାଉ ଖବରପାଇ ଚୋରା ମଦ ବ୍ୟବସାୟୀ ଜଣକ ସ୍ଥାନ ଛାଡି ପଳାଇଥିବା ଜଣାପଡିଛି । ପୁଲିସର ଏପରି ପଦକ୍ଷେପକୁ ଗ୍ରାମବାସୀଙ୍କ ପକ୍ଷରୁ ସ୍ୱାଗତ କରାଯାଇଛି ।
