କୋରାପୁଟ ୨୬-୦୩(ଓଡିଆ ପୁଅ /ରଂଜନ ଦାସ) ଲମତାପୁଟ ପୋଲିସ ଦ୍ୱାରା ବିପୁଳ ପରିମାଣର ଗଞ୍ଜେଇ ସହ ଏକ ଟ୍ରାକ୍ଟର ଜବତ କରା ଯାଇଛି । ତେବେ ଚୋରା ଗଞ୍ଜେଇ ବେପାରରେ ସମ୍ପୃକ୍ତ ଜଣେ ଅଭିଯୁକ୍ତ ସହ ଟ୍ରାକ୍ଟର ଚାଳକ କୌଶଳ କ୍ରମେ ଫେରାର ହୋଇଥିବା ଜଣାପଡିଛି । ଗତକାଲି ରାତିରେ ଓଡିଶା-ଆନ୍ଧ୍ର ସୀମାନ୍ତ ବାଙ୍ଗରୁପଡା ଗ୍ରାମରୁ ଲମତାପୁଟକୁ ଏକ ଟ୍ରାକ୍ଟର ଯୋଗେ ଗଞ୍ଜେଇ ଚାଲାଣ ହେଉଥିବା ସୂଚନା ଲମତାପୁଟ ପୋଲିସକୁ ମିଲିଥିଲା । ସୂଚନା ମୂତାବକ ଲମତାପୁଟ ଫାଣ୍ଡି ଅଧିକାରୀ ଦୀଲିପ କୁମାର ପ୍ରଧାନ ଏବଂ ଅନ୍ୟମାନଙ୍କୁ ନେଇ ଗଠିତ ଟିମ ବାଙ୍ଗରୁପଡା ଗସ୍ତ କରି ଚଢାଉ କରିଥିବାବେଳେ ପୋଲିସକୁ ଦେଖି ଉଭୟ ଟ୍ରାକ୍ଟର ଡ୍ରାଇଭରଏବଂ ଚୋରା ଗଞ୍ଜେଇ ମାଫିଆ ଫେରାର ହୋଇଯାଇଥିଲେ । ପୋଲିସ ଟିମ ଉକ୍ତ ଟ୍ରାକ୍ଟରକୁ ଲମତାପୁଟ ଫାଣ୍ଡିକୁ ଆଣି ସେଥିରେ ଥିବା ଗଞ୍ଜେଇ ଓଜନ କରିଥିଲେ । ଟ୍ରାକ୍ଟରରୁ ୩୮୭ କିଲୋ ୮୦୦ ଗ୍ରାମ ଗଞ୍ଜେଇ ଜବତ କରା ଯାଇଥିବାବେଳେ ଏହାର ଆନୁମାନିକ ମୂଲ୍ୟ ୩୦ ଲକ୍ଷ ଟଙ୍କା ହେବ ବୋଲି ଜଣାପଡିଛି ।