କୋରାପୁଟ ୧୬-୦୪(ଓଡିଆ ପୁଅ /ରଂଜନ ଦାସ) ପଟ୍ଟାଙ୍ଗି ଥାନା ରେଙ୍ଗା ପଂଚାୟତର ପୋଡାଗୁଡା ଗ୍ରାମରେ ମାଟି ଅତଡା ଖସି ୩ଜଣ ମହିଳାଙ୍କ ମୃତ୍ୟୁ ହୋଇଛି । ମୃତ ମହିଳା ମାନେ ହେଲେ ରାଲେଗାଡା ପଂଚାୟତ ମିରିଆଲପାଡୁ ଗ୍ରାମର ମୁସୁରି ରାମୁଲୁଆମ୍ମା(୪୩) ଓ ଝିଅ ମୁସୁରି ଦେବୀ (୧୭), ମୁତୁଲା କୋଟା(୨୭) । ସୂଚନା ମୁତାବକ ଆଜି ପୂର୍ବାହ୍ନ୍ନରେ ମିରିଆଲପାଡୁ ଗ୍ରାମର ମୁସୁରି ରାମୁଲୁଆମ୍ମା ,ମୁତୁଲା କୋଟା(୧),ମୁସୁରି ଦେବୀ,ମୁତୁଲା କୋଟା(୨) ପୋଡାଗୁଡା ଗ୍ରାମକୁ ଘର ଲିପା ଚୂନମାଟି ଆଣିବାକୁ ଯାଇଥିଲେ । ଖାଲୁଆ ସ୍ଥାନରେ ରହି ମାଟି ଖୋଳୁଥିବାବେଳେ ଉପରୁ ମାଟି ଅତଡା ଖସି ସମସ୍ତେ ଚାପି ହୋଇ ଯାଇଥିଲେ । ନିକଟସ୍ଥ ଗ୍ରାମର ଲୋକଙ୍କ ଠାରୁ ଖବର ପାଇ ପଟ୍ଟାଙ୍ଗୀ ପୋଲିସ ଘଟଣା ସ୍ଥଳକୁ ଆସି ଉଦ୍ଧାର କାର୍ଯ୍ୟ ଆରମ୍ଭ କରିଥିଲା । ତେବେ ଘଟଣା ସ୍ଥଳରେ ଉପରୋକ୍ତ ତିନିଜଣଙ୍କ ମୃତ୍ୟୁ ହୋଇଥିଲା । ମୁତୁଲା କୋଟା(୨)କୁ ଗୁରୁତର ଅବସ୍ଥାରେ କୋରାପୁଟ ଏସଏଲଏନ ମେଡିକାଲ କଲେଜକୁ ସ୍ଥାନାନ୍ତର କରାଯାଇଛି । ରାଲେଗାଡା ସରପଂଚ ତ୍ରିନାଥ କୋଟା ମୃତକ ପରିବାରକୁ ହରିଶ୍ଚନ୍ଦ୍ର ଯୋଜନାରେ ୨ ହଜାର ଟଙ୍କା ଲେଖାଏଁ ସହାୟତା ଦେଇଛନ୍ତି ।
