ଭଦ୍ରକ, ୨୮ା୬ (ଓଡ଼ିଆ ପୁଅ / ସ୍ନିଗ୍ଧା ରାୟ) – ଏହି ଜିଲାର ପୀରହାଟ ଥାନା ବାରସର ପଂଚାୟତ ଅଧୀନସ୍ଥ ତଳଦପା ଗ୍ରାମର ସୁଧାକର ମଳିକ ନାମକ ଜଣେ ବ୍ୟକ୍ତିର ପରିବାରକୁ ସର୍ବସାଧାରଣ ପୋଖରୀ ଓ ରାସ୍ତା ବ୍ୟବହାର କରିବାରେ ବାଛନ୍ଦ ନେଇ ପ୍ରତିବାଦ କରିବା ଘଟଣାରେ ତାଙ୍କ ପତ୍ନୀଙ୍କୁ ସଂଘବଦ୍ଧ ଆକ୍ରମଣ ହୋଇଛି । ତେବେ ଏହି ଘଟଣାରେ ସ୍ଥାନୀୟ ଥାନାକୁ ନ୍ୟାୟ ପାଇଁ ଅଭିଯୋଗ କରିବାକୁ ଯାଇ ସୁଧାକର ଜଣେ ପୁଲିସ୍ କନେଷ୍ଟବଳଙ୍କ ଦ୍ୱାରା ମାଡ ଖାଇବା ଘଟଣା ସେ ଜିଲା ଆରକ୍ଷୀ ଅଧିକ୍ଷକ ଚରଣ ସିଂ ମୀନାଙ୍କ ନିକଟରେ ଆଜି କରିଥିବା ଅଭିଯୋଗରୁ ଜଣାପଡିଛି । ସୁଧାକର ଜିଲା ଆରକ୍ଷୀ ଅଧିକ୍ଷକଙ୍କ ନିକଟରେ କରିଥିବା ଅଭିଯୋଗ ମୂଳେ ଉକ୍ତ ଗ୍ରାମରେ ଥିବା ଏକ ସର୍ବସାଧାରଣ ପୋଖରୀ ଓ ରାସ୍ତାକୁ ବ୍ୟବହାର କରିବାରେ ତାଙ୍କ ପରିବାରଙ୍କୁ କେତେକ ବ୍ୟକ୍ତି ବାରଣ କରିଥିଲେ । ମାତ୍ର ତାଙ୍କ ପତ୍ନୀ ଝୁନୁରାଣୀ ଉକ୍ତ ଘଟଣାକୁ ପ୍ରତିବାଦ କରିବାରୁ ତାଙ୍କୁ କେତେକ ମହିଳା ଓ ପୁରୁଷ ସଂଘବଦ୍ଧ ଆକ୍ରମଣ କରି ଅର୍ଦ୍ଧ ଉଲଗ୍ନ ସହ ଅଶ୍ଳୀଳ ଭାଷାରେ ଗାଳିଗୁଲଜ କରିଥିଲେ । ସୁଧାକର ସେଠାରେ ପହଞ୍ôଚ ଉକ୍ତ ଘଟଣାକୁ ମୋବାଇଲ୍ରେ ରେକର୍ଡିଂ କରୁଥିବାବେଳେ ପ୍ରତିପକ୍ଷ ତାଙ୍କୁ ମଧ୍ୟ ମାଡ ମାରିଥିଲେ । ଏହି ଘଟଣା ସଂପର୍କରେ ଉଭୟ ପତି-ପତ୍ନୀ ବହୁବାର ଥାନାକୁ ଆସି ବିଫଳ ହେବା ପରେ ଗତ ୨୫ ତାରିଖରେ ଥାନା ପକ୍ଷରୁ ସେଠାକୁ ଡକାଯାଇ ସର୍ବସାଧାରଣ ପୋଖରୀ ଓ ରାସ୍ତାକୁ ସମସ୍ତେ ବ୍ୟବହାର କରିବା ସହ ଭବିଷ୍ୟତରେ ଗଣ୍ଡଗୋଳ ନକରିବା ଲାଗି ତାଗିଦ କରି ଘଟଣାର ଆପୋଷ ସମାଧାନ କରିଥିଲେ । ମାତ୍ର ଉଭୟ ପତି-ପତ୍ନୀ ଯେଭଳି ଭାବେ ମାଡ ଗାଳି ଖାଇଥିଲେ, ତାହାର କୌଣସି ସମାଧାନ ହୋଇନଥିଲା । ସେମାନେ ଉକ୍ତ ଘଟଣାର ନ୍ୟାୟ ଦାବି କରିବାରୁ ପୁଲିସ୍ ସେମାନଙ୍କୁ ଥାନାରୁ ଶୀଘ୍ର ଚାଲିଯିବାକୁ ଧମକ ଦେଇ ମାଡ ମାରିଥିଲା । ଏବଂ ସେମାନଙ୍କୁ ଅପରପକ୍ଷଙ୍କ ଏତଲା କ୍ରମେ ଗିରଫ କରାଯିବ ବୋଲି ଧମକ ଦେଇଥିଲା । ଫଳରେ ସୁଧାକର ପୁଲିସ୍ର ଏଭଳି ମାଡ ମରାଯିବା ଓ ତାଙ୍କ ପତ୍ନୀଙ୍କୁ ସଂଘବଦ୍ଧ ଆକ୍ରମଣ ଘଟଣାର ନ୍ୟାୟ ପାଇଁ ଆଜି ଜିଲା ଆରକ୍ଷୀ ଅଧିକ୍ଷକ ଚରଣ ସିଂ ମୀନାଙ୍କ ନିକଟରେ ଲିଖିତ ଅଭିଯୋଗ କରିଥିବାର ଜଣାପଡିଛି ।
