ହରିଚନ୍ଦନପୁର, ତା ୧୩ ଜୁନ (ଓଡ଼ିଆ ପୁଅ/ପ୍ରେମାନନ୍ଦ ଦାସ) ନରଣପୁର ଠାରୁ ହରିଚନ୍ଦନପୁର ଭିଆଇପି ରାସ୍ତାର କୁଆଝରଣ ଘାଟିରେ ଭାରସାମ୍ୟ ହରାଇ ତଳକୁ ଖସିଲା ହିଟାଚି ମେସିନ୍ ବୋଝେଇ ଟ୍ରଲର, ଚାଳକଙ୍କ ସହ ମେସିନ୍ ଅପରେଟର ଗୁରୁତର । ଖବର ଅନୁଯାୟୀ ହିଟାଚି ମେସିନଟି କେନ୍ଦୁଝର ଜିଲ୍ଲା ପଦ୍ମପୁର ଠାରେ ଏଲଏଣ୍ଡଟି କମ୍ପାନୀର ଜଳ ଯୋଗାଣ କାର୍ଯ୍ୟରେ ନିୟୋଜିତ ଥିଲା । ସେଠାରେ କାର୍ଯ୍ୟ ସରିଯିବାରୁ ଆଜି ଅପରାହ୍ନ ସମୟରେ ହିଟାଚି ମେସିନଟି ଏକ ଟ୍ରଲର(ଓଡି ୨୯ ଇ ୮୩୯୭)ରେ ବୋଝେଇ ହୋଇ ଭୁବନେଶ୍ୱର ପଟିଆ ଅଭିମୁଖେ ଯାଉଥିଲା । ହେଲେ କୁଆଝରଣ ଘାଟିରେ କୋୖଣସି କାରଣରୁ ଭାରସାମ୍ୟ ହରାଇ ୧୦୦ଫୁଟ୍ ତଳକୁ ଖସି ଯାଇଥିଲା । ଫଳରେ ଟ୍ରଲର ଚାଳକଙ୍କ ସହ ସାଥିରେ ଥିବା ମେସିନ୍ ଅପରେଟର ଗୁରୁତର ଆହତ ହୋଇଛନ୍ତି । ଘଟଣା ଘଟିବା ପରେ ଉକ୍ତ ରାସ୍ତା ଦେଇ ଆସୁଥିବା ଲୋକମାନେ ହରିଚନ୍ଦନପୁର ଅଗ୍ନିଶମ ବିଭାଗକୁ ଫୋନ୍ ଯୋଗେ ଜଣାଇବା ସହ ଉଭୟଙ୍କୁ ଗୁରୁତର ଅବସ୍ଥାରେ ଗାଡ଼ି ମଧ୍ୟରୁ ଉଦ୍ଧାର କରି ରାସ୍ତା ଉପରକୁ ଆଣିଥିଲେ । ଅଗ୍ନିଶମ ବାହିନୀ ଘଟଣାସ୍ଥଳରେ ପହଞ୍ଚି ଉଭୟଙ୍କୁ ଗୁରୁତର ଅବସ୍ଥାରେ ଆଣି ହରିଚନ୍ଦନପୁର ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରରେ ଭର୍ତ୍ତି କରାଇଥିଲେ । ସେଠାରେ ପ୍ରାଥମିକ ଚିକିତ୍ସା ପରେ ଉଭୟ ଉଭୟଙ୍କ ସ୍ବାସ୍ଥ୍ୟ ଅବସ୍ଥା ଗୁରୁତର ଥିବାରୁ ତାଙ୍କୁ କଟକ ବଡ଼ ମେଡ଼ିକାଲକୁ ସ୍ଥାନାନ୍ତର କରାଯାଇଥିବା ସ୍ବାସ୍ଥ୍ୟକେନ୍ଦ୍ର ପକ୍ଷରୁ ସୂଚନା ମିଳିଛି । ଟ୍ରଲର ଚାଳକଙ୍କ ପରିଚୟ ମିଳିନଥିବା ବେଳେ ସେ ଅଣ ଓଡ଼ିଆ ହୋଇଥିବା ସହ ତାଙ୍କ ଘର ବିହାର ଅଞ୍ଚଳରେ ଓ ମେସିନ୍ ଅପରେଟର ଜଣଙ୍କ ନୟାଗଡ଼ ଜିଲ୍ଲା ଜହ୍ନିପୁର ଗ୍ରାମପଞ୍ଚାୟତ ବିଜୁପୁର ଗ୍ରାମର କାହ୍ନା ସ୍ବାଇଁ (୧୯) ବୋଲି ଜଣାପଡ଼ିଛି । ଘଟଣାର ଖବର ପାଇ ହରିଚନ୍ଦନପୁର ପୋଲିସ ଘଟଣାସ୍ଥଳରେ ପହଞ୍ଚି ଉଭୟ ଗାଡିକୁ ଜବତ କରି ଘଟଣାର ତଦନ୍ତ ଆରମ୍ଭ କରିଛି ।
