ହାଟଡ଼ିହି, ୪ / ୩ : (ଓଡିଆପୁଅ / ବିକାଶ ବିଶ୍ୱାଳ)ହଦଗଡ ଅଭୟାରଣ୍ୟ ଜଂଗଲରେ ନିଆଁ ବ୍ୟାପିବାରେ ଲାଗିଛି । ବନ ବିଭାଗ ପକ୍ଷରୁ ଏହାକୁ ରୋକିପାଇଁ ବ୍ୟାପକ ପଦକ୍ଷେପ ନିଆଯଯାଇଥିଲେ ମଧ୍ୟ ନିଆଁକୁ ରୋକିବାରେ ସକ୍ଷମ ହୋଇପାରୁନି । କିଛି ଦୁର୍ବୁତ ନିୟମିତ ବିଭିନ୍ନ ସ୍ଥାନରେ ନିଆଁ ଲଗାଇ ଦେଉଥିବାରୁ ଜଂଗଲରେ ବ୍ୟାପକ କ୍ଷୟକ୍ଷତି ହେଉଛି । ଦୀର୍ଘମାସ ହେବ ବର୍ଷା ନଥିବାରୁ ଜଂଗଲରେ ଅଳ୍ପ ସମୟ ମଧ୍ୟରେ ବ୍ୟାପକ ଅଞ୍ଚଳକୁ ନିଆଁ ବ୍ୟାପି ଯାଉଛି । ଏପରିକି ଜଂଗଲରେ ନିଆଁ ଲଗାଉଥିବା ବ୍ୟକ୍ତି ସଂପର୍କରେ ସୁଚନା ଦେଲେ ୫ହଜାର ଟଙ୍କାର ପୁରସ୍କାର ରାଶି ଘୋଷଣା ମଧ୍ୟ କରାଯାଇଛି । ଗତ କିଛିଦିନ ଧରି ହଦଗଡ ଜଂଗଲର ଦଲକି, ପିତାନାଉ, ଛେନାପଦି, ଅସିଆ, ଗଡଚଣ୍ଡୀ, ଜୁଣପସି, ସମେତ ବଉଳା ପାହାଡର ପାଦଦେଶରେ କେହି ନିଆଁ ଲଗାଇ ଦେଉଥିବାରୁ ଏହା ବ୍ୟାପକ ଆକାର ଧାରଣ କରି ଅନେକ ଅଞ୍ଚଳକୁ ବ୍ୟାପି ଯାଉଛି । ଯାହାଦ୍ୱାରାକି ଜଂଗଲର ଲଟାବୁଦା ସମେତ ଅନେକ ଗଛ ମଧ୍ୟ ପୋଡି ଯାଉଛି । ଏହି ନିଆଁ ଯୋଗୁଁ ବନ୍ୟଜନ୍ତୁ ମାନେ ଅସୁରକ୍ଷିତ ହୋଇ ପଡିଥିବାବେଳେ ପରିବେଶ ପ୍ରଦ୍ୟୁଷଣ ହେବାସହ ଉତ୍ତାପ ମଧ୍ୟ ବୃଦ୍ଧି ପାଉଛି । ଏଥିଯୋଗୁଁ ହଦଗଡ ବନବିଭାଗ ପକ୍ଷରୁ ଜଂଗଲ ପାଖ ଗାଁ ମାନଙ୍କରେ ଜନସଚେତନତା ସୃଷ୍ଟି କରିବା ସହ ଗାଁ ଗାଁରେ ବ୍ୟାନର ପୋଷ୍ଟର ଲଗାଯାଇଛି । ବନବିଭାଗ ପକ୍ଷରୁ ୮ଟି ସ୍କ୍ୱାର୍ଡ କରାଯାଇ ୪୦ଜଣ ନିଆଁ ଲିଭାଳିଙ୍କୁ ନିଆଁ ଲିଭା କାର୍ଯ୍ୟରେ ନିୟୋଜିତ କରାଯାଇଛି । ତଥାପି କିଛି ଲୋକ ଜାଳକାଠ ସଂଗ୍ରହ ପାଇଁ ହେଉ କିମ୍ବା ଖଲିପତ୍ର ସଂଗ୍ରହ ପାଇଁ ଯାଉଥିବାବେଳେ ନିଆଁ ଲଗାଇ ଦେଉଛନ୍ତିବୋଲି ଅନୁମାନ କରାଯାଉଛି । ଏ ସମ୍ପର୍କରେ ହଦଗଡ ରେଞ୍ଜର ସୁମିତ ମହାନ୍ତିଙ୍କୁ ପଚାରିବାରେ ବର୍ଷା ନହେବା କାରଣରୁ ଗତବର୍ଷ ଠାରୁ ଚଳିତବର୍ଷ ଅଧିକ ନିଆଁ ଲାଗୁଥିବା କହିଛନ୍ତି । ଅନେକ ଜନସଚେତନତା ପରେ ମଧ୍ୟ କିଛି ଲୋକ ଏପରି ନିଆଁ ଲଗାଇ ଦେଉଛନ୍ତି । ଯଦି କେହି ଏହି ନିଆଁ ଲଗାଳୀଙ୍କ ସମ୍ପର୍କରେ ସୁଚନା ଦିଅନ୍ତି ସେମାନଙ୍କ ନାମ ଗୋପନ ରଖାଯିବା ସହ ସେମାନଙ୍କୁ ୫ହଜାର ଟଙ୍କାର ପୁରସ୍କାର ବ୍ୟବସ୍ଥା କରାଯାଇଥିବା ସୁଚନା ଦେଇଛନ୍ତି ।
