ବଡ଼ବିଲ, ତା ୨୬ ନଭେମ୍ବର (ଓଡ଼ିଆ ପୁଅ/ସୀତାରାମ ଦୀକ୍ଷିତ) କେନ୍ଦୁଝର ଜିଲ୍ଲା ବଡ଼ବିଲର ବାଇପାଶ୍ ରିଙ୍ଗ୍ ରୋଡ୍ ନିର୍ମାଣ ଦାବିରେ ତେଜିଲା ଆନ୍ଦୋଳନ । ପ୍ରଶାସନ ନିକଟରେ ବାରମ୍ବାର ଲିଖିତ ଅଭିଯୋଗ ସହ ମୁଖ୍ୟମନ୍ତ୍ରୀଙ୍କୁ ପୋଷ୍ଟକାର୍ଡ଼ ମାଧ୍ୟମରେ ଦୃଷ୍ଟି ଆକର୍ଷଣ ପରେବି କିଛି ଶୁଣାଗଲା ନାହିଁ । ଯାହା ଫଳରେ ବଡ଼ବିଲ ସିଭିଲ ସୋସାଇଟି ଆନ୍ଦୋଳନର ପନ୍ଥା ଆପଣାଇ ଗତ ୧୮ ତାରିଖରେ ନାଲଦା ଠାରୁ ବଡ଼ବିଲ ତହସିଲ କାର୍ଯ୍ୟାଳୟ ପର୍ଯ୍ୟନ୍ତ ୮ କି.ମି. ପଦଯାତ୍ରା ଏବଂ ୧୯ ଓ ୨୦ ତାରିଖ ଦୁଇ ଦିନ ଧରି ମଧୁସୂଦନ ଛକରେ ଧାରଣା ପ୍ରଦର୍ଶନ କରିଥିଲା । କିନ୍ତୁ ଏଦିଗରେ ଜିଲ୍ଲା ପ୍ରଶାସନ ପକ୍ଷରୁ କୌଣସି ସକାରାତ୍ମକ ପ୍ରତିଶୃତି ମିଳିଲା ନାହିଁ । ବଡ଼ବିଲ ସିଭିଲ ସୋସାଇଟି ଅଭିଯୋଗ କରିଛି ଯେ, ଗତ ୨୧ ତାରିଖରେ କେନ୍ଦୁଝର ଜିଲ୍ଲାପାଳ ଆଶିଷ ଠାକରେଙ୍କ ବଡ଼ବିଲ ଗସ୍ତ ସମୟରେ ତାଙ୍କ ସହ ସୌଜନ୍ୟ ମୂଳକ ଆଲୋଚନା ହୋଇଥିଲା । ଜିଲ୍ଲାପାଳ ଏଅଞ୍ଚଳର ବିପର୍ଯ୍ୟସ୍ତ ରାସ୍ତା, ଧୂଳିଧୂଆଁ ପ୍ରଦୂଷଣର ନିରାକରଣ ନିମନ୍ତେ ଏକ ବାଇପାଶ୍ ରିଙ୍ଗ୍ ରୋଡର ଆବଶ୍ୟକତା ରହିଥିବା ସ୍ୱୀକାର କରିଥିଲେହେଁ ରିଙ୍ଗ୍ ରୋଡ୍ ନିର୍ମାଣ ସକାଶେ ସ୍ୱୀକୃତି ପ୍ରଦାନ ପାଇଁ ଅସମର୍ଥତା ପ୍ରକାଶ କରିଥିଲେ । ଜିଲ୍ଲା ପ୍ରଶାସନ ପକ୍ଷରୁ କୌଣସି ନିର୍ଭରଯୋଗ୍ୟ ପ୍ରତିଶୃତି ନମିିଳିବାରୁ ଆନ୍ଦୋଳନକୁ ଆହୁରି ତୀବ୍ରତର କରିବା ପାଇଁ ବଡ଼ବିଲ ସିଭିଲ ସୋସାଇଟି ନିଷ୍ପତ୍ତି ନେଇଥିବା କହିଛନ୍ତି । ଦାବି ପୂରଣ ପାଇଁ ଆମରଣ ଅନଶନ ପାଇଁ ସଜବାଜ ହେଉଛି ସଂଗଠନ । ଏନେଇ ଆଜି ବିକାଶ ମହଲ ଠାରେ ଏକ ପ୍ରେସ୍ ମିଟରେ ବଡ଼ବିଲ ସିଭିଲ ସୋସାଇଟି ପକ୍ଷରୁ ସୂଚନା ଦିଆଯାଇଛି । ନିଷ୍ପତ୍ତି ଅନୁଯାୟୀ ଆସନ୍ତା ଡିସେମ୍ବର ୬ ତାରିଖ ଠାରୁ କେନ୍ଦୁଝର ଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ବଡ଼ବିଲ ସିଭିଲ ସୋସାଇଟି ପକ୍ଷରୁ ଆମରଣ ଅନଶନ ଆରମ୍ଭ ହେବ ବୋଲି ଆୟୋଜିତ ପ୍ରେସ୍ ମିଟରେ ସୂଚନା ଦିଆଯାଇଛି ।
