ଭଦ୍ରକ, ୨୮ା୬ (ଓଡ଼ିଆ ପୁଅ / ସ୍ନିଗ୍ଧା ରାୟ) – ଭଦ୍ରକ ଜିଲ୍ଲା ବନ୍ତ ବ୍ଳକ ପୁରୁଷଣ୍ଡ ସେବା ସମବାୟ ସମିତିର ସଂପାଦକ ଶୁଭେନ୍ଦୁ ପ୍ରଧାନଙ୍କୁ ନିଲମ୍ବିତ କରିବା ପାଇଁ ପରିଚାଳନା କମିଟିର ମସୁଧା ଏବେ ପଦାରେ ପଡିଛି । ପରିଚାଳନା କମିଟିର ଜଣେ ସଦସ୍ୟ ରବିନ୍ଦ୍ର ପଣ୍ଡା ଏନେଇ ଏକ ପ୍ରେସ ବିବୃତ୍ତି ଦେଇ କହିଛନ୍ତି ପରିଚାଳନା କମିଟିର କିଛି ସଦସ୍ୟ ନିଜର ବ୍ୟକ୍ତିଗତ ଉଦ୍ଦେଶ୍ୟକୁ ପୂରଣ କରିବା ପାଇଁ ଏଭଳି କାଣ୍ଡ ଭିଆଉଛନ୍ତି । ଘଟଣାରୁ ପ୍ରକାଶ ଯେ, ଗତ କିଛି ଦିନ ହେବ ପରିଚାଳନା କମିଟିର ସଭାପତି ଓ ସଂପାଦକଙ୍କ ମଧ୍ୟରେ ଦୀର୍ଘ ୩ ବର୍ଷ ଧରି ତିକ୍ତତା ଲାଗି ରହିଥିଲା । ଆସନ୍ତା ଜୁଲାଇ ୨ ତାରିଖରେ ପରିଚାଳନା କମିଟିର କାର୍ଯ୍ୟକାଳ ସରୁଥିବାରୁ ଏହା ପୂର୍ବରୁ ସଭାପତି ସଂପାଦକଙ୍କୁ ନିଲମ୍ବନ କରିବାକୁ ଚାହୁଁଛନ୍ତି । ଏ ନେଇ ସଭାପତି ଜୁନ ୧୮ ତାରିଖରେ ସଂପାଦକଙ୍କୁ କାରଣ ଦର୍ଶାଅ ନୋଟିସ ଜାରି କରିଥିଲେ । ତହୌିଁପରଦିନ ଅର୍ଥାତ ୧୯ ତାରିଖରେ ଉକ୍ତ ନୋଟିସର ଉତ୍ତରରେ କମିଟି ସନ୍ତୁଷ୍ଟ ନଥିବା କୁହାଯାଉଛି । ସେପଟେ ସଂପାଦକ୨୧ ତାରିଖ ଠାରୁ କୋଭିଡରେ ଆକ୍ରାନ୍ତ ହୋଇ ହୋମ ଆଇସୋଲେସନରେ ରହିଥିବାବେଳେ କମିଟିର ସଭାବହି ଘର ଘର ବୁଲାଇ ସଭାପତି ଦସ୍ତଖତ କରାଉଥିବା ସଭ୍ୟ ରିବନ୍ଦ୍ର ପଣ୍ଡା କହିଛନ୍ତି । ଏପରିକି ବୋର୍ଡ କାର୍ଯ୍ୟକାଳ ସରିବାର ଶେଷ ମାସରେ କୌଣସି ଗୁରୁତ୍ୱପୂର୍ଣ୍ଣ ନିଷ୍ପତି ନ ନେବାକୁ କୋଅପରେଟିଭ ମାନୁଆଲରେ ଲିପିବଦ୍ଧଥିବାବେଳେ ଏହା ଆଇନ ବିରୁଦ୍ଧ ବୋଲି କହିଛନ୍ତି ।
୨୩ ତାରିଖ ଦିନ ହୋଇଥିବା ବୈଠକରେ ମାତ୍ର ୪ ଜଣ ସଭ୍ୟ ଉପସ୍ଥିତଥିବାରୁ ଏହି ପୃଷ୍ଠାରେ ଦସ୍ତଖତ କରାଇବାକୁ ନିଜେ ସଭାପତି ଘର ଘର ବୁଲୁଥିବା ଅଭିଯୋଗ ଆଣିଛନ୍ତି ଶ୍ରୀ ପଣ୍ଡା । ଏପରିକି ପଣ୍ଡା ନିଜେ ସେହି ବିବରଣୀ ବହିରେ ୨୪ ତାରିଖରେ ଦସ୍ତଖତ କରିଥିବା କହିଛନ୍ତି । ତେବେ୨୩ତାରିଖ ବିବରଣୀରେ ୨୪ତାରିଖ ପକାଇ ଦସ୍ତଖତ କରିବା ପରେ ଏହା ପଛରେ ବଡ଼ କିଛି ଘୋଟାଲା ଥିବାର ଅନୁମାନ କରାଯାଉଛି । ପଣ୍ଡାଙ୍କ କହିବାକଥା ହେଲା ଯଦି ସଂପାଦକଙ୍କ ବିରୁଦ୍ଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରିବାର ଥିଲା ତେବେ ଗତ ଚାରିବର୍ଷ ଭିତରେ କାହିଁକି ଏ ଦିଗରେ ନିଷ୍ପତି ନିଆଗଲା ନାହିଁ । ଏବେ ବେଆଇନଭାବେ ଏଭଳି ନିଷ୍ପତିକୁ ବରିଷ୍ଠ ସଭ୍ୟ ଶ୍ରୀ ପଣ୍ଡା ଘୋର ନିନ୍ଦା କରୁଥିବା ପ୍ରେସ ବିବୃତିରେ କହିଛନ୍ତି । ଅନ୍ୟପକ୍ଷେ ସମିତିର ସଭାପତି ନାରାୟଣ ଚନ୍ଦ୍ର ଉଦଗାତାଙ୍କୁ ଯୋଗାଯୋଗ କରିବାରୁ ସେ କହନ୍ତି, ସମିତିର ସମ୍ପାଦକ ଆର୍ଥିକ ଅନିୟମିତତା ତଥା ପରିଚାଳନାଗତ କାର୍ଯ୍ୟରେ ସମିତିର ପ୍ରଭୂତ କ୍ଷତି ଘଟାଇଛନ୍ତି । ତାଙ୍କ ବିରୁଦ୍ଧରେ ସମିତି କାର୍ଯ୍ୟନୁଷ୍ଠାନ ପ୍ରକ୍ରୀୟା ୨୦୧୮ ମସିହାରୁ ଆରମ୍ଭ କରିଛି । ବିଭିନ୍ନ ଅନିୟମିତତା ନିମନ୍ତେ ୨ଥର କାରଣ ଦର୍ଶାଅ ନୋଟିସ ଜାରୀ କରିବା ପରେ ସନ୍ତୋଷ ଜନକ ଉତ୍ତର ନମିଳିବାରୁ ତାଙ୍କୁ ଶେଷରେ ବାଧ୍ୟହୋଇ ନିଲମ୍ବନ କରାଯାଇଛି । ସଂପୃକ୍ତ ପରିଚାଳନା କମିଟିର ଜନୈକ ସଦସ୍ୟ ଦେଇଥିବା ବିବୃତ୍ତି ସଂମ୍ପୂର୍ଣ୍ଣ ଭିତ୍ତିହୀନ, କାରଣ ସେ ମଧ୍ୟ ପୂର୍ବରୁ କାର୍ଯ୍ୟାନୁଷ୍ଠାନ ପ୍ରକ୍ରୀୟାରେ ସାମିଲ ଥିଲେ । ତାଙ୍କ ସ୍ୱାର୍ଥରେ ବାଧା ଉପୁଜିବାରୁ ସେ ସମିତିର କ୍ଷତି କରିବାକୁ ଆଗେଇ ଆସିଛନ୍ତି ।
