ଭଦ୍ରକ, ୭ା୧ (ଓଡ଼ିଆ ପୁଅ / ସ୍ନିଗ୍ଧା ରାୟ) – ନିଜ ବାପ ଗୋସାପ ଅମଳରୁ ଚାଷ ଜମିକୁ ଯାତାୟତ କରିଆସୁଥିବା ପଥରେ ଏବେ ଭଦ୍ରକ ଜିଲା ନୂତନ ଡାକ୍ତରଖାନାର ପାଚେରୀ ନିର୍ମାଣକୁ ବିରୋଧ କରି ଗତ ଦୁଇଦିନ ହେବ ଗଣଧାରଣା ଓ ଆତ୍ମାହୁତି ଚେତାବନୀ ଦେଇଆସୁଥିବା ସ୍ଥାନୀୟ ୪ଟି ଅଂଚଳର ଗ୍ରାମବାସୀ ଆଜି ଜିଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ଆମରଣ ଅନଶନରେ ବସିବା ଘଟଣା ଚର୍ଚ୍ଚାର ବିଷୟ ହୋଇଛି । ତେବେ ଏହି ରିପୋର୍ଟ ଲେଖାଯିବା ପର୍ଯ୍ୟନ୍ତ ଧାରଣାକାରୀମାନେ ନିଜ ଜିଦ୍ରେ ଅଟଳ ରହିଥିବାବେଳେ ଜିଲା ପ୍ରଶାସନ ଏଭଳି ଏକ ସମ୍ବେଦନଶୀଳ ଘଟଣା ନେଇ ଆଲୋଚନାରେ ବସିଛନ୍ତି । ମାତ୍ର କୌଣସି ସୁଫଳ ମିଳିପାରିନଥିବାର ଜଣାପଡିଛି । ପ୍ରାପ୍ତ ଖବରରୁ ଯାହା ଜଣାଯାଏ ସାମରାଇପୁରରେ ଭଦ୍ରକର ନୂତନ ଡାକ୍ତରଖାନା ନିର୍ମାଣ ଆରମ୍ଭ ହୋଇଛି । ଏହି ଡାକ୍ତରଖାନାର ଚତୁଃର୍ପାଶ୍ୱର୍ରେ ଏଥିପାଇଁ ଏକ ବିରାଟ ପାଚେରୀ ତିଆର ହେଉଛି । ଏହି ପାଚେରୀ ନିର୍ମାଣ ହେବା ଦ୍ୱାରା ଗେଲପୁର ପଂଚାୟତର ୪ ରୁ ଉର୍ଦ୍ଧ୍ୱ ଗ୍ରାମର ଗ୍ରାମବାସୀମାନେ ଚାଷକାର୍ଯ୍ୟ ନେଇ ଅସୁବିଧାର ସମ୍ମୁଖୀନ ହେବା ସହ ସେମାନଙ୍କର ଘରବାଡି ଓ ଚାଷଜମିକୁ ଯାତାୟତ ପାଇଁ ଏହା ବାଧକ ହେବ । ଫଳରେ ସେମାନେ ଚାଷକାର୍ଯ୍ୟ କରିବାକୁ ଯାଇପାରିବେ ନାହିଁ । ଏଣୁ ଏହି ପାଚେରୀ ନିର୍ମାଣକୁ ବିରୋଧ କରି ଏହି ଗ୍ରାମବାସୀମାନେ ଆମରଣ ଅନଶନରେ ବସିଛନ୍ତି ।
