ଭଦ୍ରକ, ୧୨ା୧୧ (ଓଡ଼ିଆ ପୁଅ / ସ୍ନିଗ୍ଧା ରାୟ) – ଆଉ ୨ଦିନ ପରେ ମା’ କାଳୀଙ୍କ ପୂଜା । ମା’ଙ୍କ ମୂର୍ତ୍ତୀର ଉଚ୍ଚତା ୪ଫୁଟ ରହିବ । ପୂଜା ମଣ୍ଡପରେ କେଳବ ପୂଜା ଦିନ ପୁରୋହିତ, କର୍ତ୍ତାଙ୍କୁ ନେଇ ସର୍ବାଧିକ ୭ଜଣ ହିଁ ଉପସ୍ଥିତ ରହି ପୂଜାର୍ଚ୍ଚାନା କରିବେ । ସେମାନଙ୍କ ମଧ୍ୟରେ ରହିବ ସାମାଜିକ ଦୂରତା ଏବଂ ମୁହଁରେ ରହିବ ମାସ୍କ । ମଣ୍ଡପ ଗୁଡିକର ୩ ପାଶ୍ୱର୍କୁ ସମ୍ପୂର୍ଣ୍ଣ ଆବଦ୍ଧ କରାଯିବ । ସମ୍ମୁୁଖ ଭାଗକୁ ମଧ୍ୟ କନା ଦ୍ୱାରା ଆବଦ୍ଧ କରାଯିବ । ତେଣୁ କୌଣସି ଭକ୍ତଙ୍କୁ ମେଢ କି ଠାକୁରାଣୀଙ୍କ ଦର୍ଶନ ମନା । ଭୋଗ ମଧ୍ୟ ଲାଗି ପାରିବ ନାହିଁ । ମାଇକ ବାଜିବ ନାହିଁ କିମ୍ବା ତୋରଣ ମଧ୍ୟ ନିର୍ମାଣ ହେବ ନାହିଁ । ଅପେରା ପ୍ରଦର୍ଶନ ଦୂରର କଥା ମୀନାବଜାରକୁ ମଧ୍ୟ ମନା । କୌଣସିପ୍ରକାର ସାଂସ୍କୃତିକ କାର୍ଯ୍ୟକ୍ରମ ଉପରେ ମଧ୍ୟ ଲାଗିଛି ରୋକ୍ । ମଣ୍ଡପରେ ଅଗ୍ନି ନିରାପତ୍ତା ବ୍ୟବସ୍ଥା ସହିତ ସିସିଟିଭି ନଜରରେ ରହିବ ସମଗ୍ର ପୂଜା ମଣ୍ଡପ ଅଞ୍ଚଳ । କରୋନା ମହାମାରୀ ପାଇଁ ଏହିପରି ପ୍ରଶାସନିକ କଟକଣା ଜାରୀ କରିଛି ଜିଲ୍ଲା ପ୍ରଶାସନ । ତେଣୁ ସମ୍ପୂର୍ଣ୍ଣ ଫିକା ପଡ଼ିବାକୁ ଯାଉଛି ଭଦ୍ରକର ଗଣପର୍ବ ଭାବେ ପରିଗଣିତ ମା’ କାଳୀଙ୍କ ପୂଜା । କାରଣ ପୂଜାର ୩ମାସ ପୂର୍ବରୁ ମା’ଙ୍କ ପୂଜାକୁ କିପରି ଆଡମ୍ବର ସହକାରେ ପାଳନ କରିବେ ତାକୁ ନେଇ ବହୁ ଯୋଜନା କରି ଆସୁଥିବାବେଳେ, ଚଳିତ ବର୍ଷ ପ୍ରଶାସନିକ କଟକଣାକୁ ନେଇ ସୃଷ୍ଟି ହୋଇଥିବା ଅନିଶ୍ଚିତତା ଯୋଗୁଁ ସବୁ ପଣ୍ଡ ହୋଇଯାଇଛି । ଭଦ୍ରକର ଏହି ମହାନ ଐତିହାସିକ ପର୍ବ ସମୟରେ କେବଳ ସହର ନୁହେଁ ସମଗ୍ର ଭଦ୍ରକ ଜିଲ୍ଲା ମୁଖରିତ ହୋଇ ଉଠେ । ସହର ମଧ୍ୟରେ ୯ଟି ସ୍ଥାନରେ ମା’ଙ୍କ ମୃଣ୍ମୟୀ ମୂର୍ତ୍ତୀ ବିଭିନ୍ନ ମଣ୍ଡପରେ ପୂଜା ପାଇଥାନ୍ତି । ଏହାବ୍ୟତୀତ ୩ଟି ଶକ୍ତିପୀଠରେ ମଧ୍ୟ ମା’ଙ୍କ ପୂଜା ପାରମ୍ପରିକ ରିତୀରେ ଅନୁଷ୍ଠିତ ହୋଇଥାଏ । ଏହା ୧୦ ଦିନ ଧରି ପାଳିତ ହୋଇଥାଏ । ଏହି ସମୟରେ ଚରମ୍ପା ଅଞ୍ଚଳରେ ଦିନ ରାତି ଏକ ହୋଇଯାଏ । ଘରେ ଘରେ ଭର୍ତ୍ତି ହୋଇ ଯାଆନ୍ତି କୁଣିଆ । ପୂଜା ବଜାରର ଭିଡ଼କୁ ନିୟନ୍ତ୍ରଣ କରିବା ପାଇଁ ପ୍ଲାଟୁନ ପ୍ଲାଟୁନ ପୁଲିସ ଫୋର୍ସ ନିୟୋଜିତ ହୁଅନ୍ତି । ମା’ଙ୍କ ଆକର୍ଷଣୀୟ ମୂର୍ତ୍ତୀ ସାଙ୍ଗକୁ, ସାଜସଜ୍ଜା, ମନେଲୋଭା ତୋରଣ ପୂଜା ପରିବେଶକୁ ସରଗରମ କରି ଦେଇଥାଏ । ଏହାବ୍ୟତୀତ ମା’ଙ୍କ ମୂର୍ତ୍ତୀ ପାଶ୍ୱର୍ରେ ନିର୍ମିତ ହେଉଥିବା ସାମାଜିକ ସଚେତନତା ଓ ଆଧ୍ୟାତ୍ମିକ କଥାବସ୍ତୁକୁ ନେଇ ନିର୍ମିତ ବାରୁଆଳୀ ମଧ୍ୟ ଶ୍ରଦ୍ଧାଳୁଙ୍କ ମନମୋହି ଥାଏ । କାଳୀପୂଜାର ଅନ୍ୟତମ ବିଶେଷତ୍ୱ ହେଲା ବସୁଥିବା ମୀନାବଜାର । ମଣ୍ଡପ ନିକଟରେ ଥିବା ବିଭିନ୍ନ ପଡ଼ିଆ ଏପରିକି ରାସ୍ତାର ଦୁଇ ପାଶ୍ୱର୍ରେ ଜିଲ୍ଲା ତଥା ବାହାର ରାଜ୍ୟର ବ୍ୟବସାୟୀ ସେମାନଙ୍କ ପସରା ମେଲି ଦେଇଥାନ୍ତି । ସର୍କସ, ଦୋଳି, ଚରକି, ଡ୍ରାଗନ, ସବୁପ୍ରକାର ଘରକରଣା ଦ୍ରବ୍ୟର ସମ୍ଭାର ଦେଖିବାକୁ ମିଳେ ପୂଜାରେ । କିନ୍ତୁ ଚଳିତ ବର୍ଷ କରୋନା ମହାମାରୀ ପାଇଁ ଏସବୁ ଦେଖିବାକୁ ମିଳିବ ନାହିଁ । ପୂଜା ପରମ୍ପରା ଅନୁଯାୟୀ ଅନୁଷ୍ଠିତ ହେବ । ତେଣୁ ପୂଜାକୁ ନିଷ୍ଠାର ସହ ସମାପନ ପାଇଁ ସମସ୍ତ ପୂଜା କମିଟି ଉଦଗ୍ରୀବ । ମୂର୍ତ୍ତୀ କାରିଗର ସ୍ଥିରୀକୃତ ନିୟମାନୁଯାୟୀ ମୂର୍ତ୍ତୀ ଗଢ଼ିବାରେ ବ୍ୟସ୍ତ । ଚଳିତ ବର୍ଷ ମେଳା ନଥିବାରୁ ପୂଜା ପାଇଁ କାହାରି ମନରେ ହରଷ ନାହିଁ ।
