ଭଦ୍ରକ, ୧୯ା୬ (ଓଡ଼ିଆ ପୁଅ / ସ୍ନିଗ୍ଧା ରାୟ) – ପୁତ୍ରର ବିବାହ ପାଇଁ ଲଗ୍ନ ସରି ନିମନ୍ତ୍ରଣ ପତ୍ର ବଣ୍ଟା ସରିଥିଲା । ସମସ୍ତ ବିବାହ ସାମଗ୍ରୀ ମଧ୍ୟ କିଣା ସରିଥିଲା । ହେଲେ କରୋନା ରୂପୀ ରାକ୍ଷସ ଛଡାଇନେଲା ମା’ ଠାରୁ ପୁଅକୁ । ଏଭଳି ଏକ ହୃଦୟ ବିଦାରକ ଘଟଣା ଘଟିଛି ଭଦ୍ରକ ଗ୍ରାମାଞ୍ଚଳ ଥାନା ଅଧୀନସ୍ଥ ଅସୁରାଳି ଅଂଚଳର ନାଥସାହିରେ । ପ୍ରାଣବନ୍ଧୁ ନାଥଙ୍କ ୨୮ ବର୍ଷର ପୁଅ ଚନ୍ଦ୍ରମଣିର ଗତ ୧୧ ତାରିଖରେ ବିବାହ ପାଇଁ ସମସ୍ତ ପ୍ରସ୍ତୁତି ସରିଥିଲା । କିନ୍ତୁ ୩ ଦିନ ପୂର୍ବରୁ ଲଗ୍ନ ହେବା ପରେ ତା’ ପରଦିନ ଠାରୁ ହଠାତ୍ ତାକୁ ଜ୍ୱର ହେଲା । କରୋନା ଟେଷ୍ଟ କରିବାରୁ ଚନ୍ଦ୍ରମଣିର ପଜିଟିଭ୍ ବାହାରିଲା । ଯେଉଁଥିପାଇଁ ଉଭୟ ପରିବାର ବିଚାର ବିମର୍ଷ କରି ଆସନ୍ତା ୨୮ ତାରିଖକୁ ବିବାହ ଦିନ ଘୁଞ୍ଚାଇ ଦେଇଥିଲେ । ଇତିମଧ୍ୟରେ ଧୀରେ ଧୀରେ କରୋନାରୁ ସୁସ୍ଥ ହେବାକୁ ଲାଗିଥିଲା ଚନ୍ଦ୍ରମଣି । ସେପଟେ ବାହାଘର ପାଇଁ ସମସ୍ତ ପ୍ରସ୍ତୁତି ବି ସରିଥିଲା । ଘର ଆଗରେ ଟେଣ୍ଟ ପାଇଁ ବାଉଁଶ ବି ପଡିସାରିଥିଲା । ଘର ଆଗରେ ବରକନ୍ୟାଙ୍କ ନାମ ଓ ଶୁଭକଳସ, କଦଳୀ ଗଛର ଚିତ୍ର ଅଙ୍କା ବି ସରିଥିଲା । ହେଲେ ହଠାତ୍ ଅସୁସ୍ଥ ହେବା ସହ ନିଶ୍ୱାସ ନେବାରେ କଷ୍ଟ ଅନୁଭବ କଲେ ଚନ୍ଦ୍ରମଣି । ପୁଅର ଦେହ ଖରାପ ଦେଖି ପରିବାର ଲୋକେ ମେଡିକାଲ ନେବାପାଇଁ ପ୍ରସ୍ତୁତ ହେଉଥିବା ସମୟରେ ହଠାତ୍ ଚନ୍ଦ୍ରମଣିଙ୍କ ପ୍ରାଣବାୟୁ ଉଡିଗଲା । ଶରୀରରେ ଅକ୍ସିଜେନ୍ ସ୍ତର ହଠାତ୍ କମ୍ ହେବାରୁ ତାଙ୍କର ମୃତ୍ୟୁ ହୋଇଥିଲା । ତେବେ କରୋନାରେ ମୃତ୍ୟୁ ଘଟିବାରୁ ସାହିଭାଇ କେହି ପାଖ ମାଡିଲେଣି । ଶେଷରେ ସ୍ଥାନୀୟ ସରପଞ୍ଚ, ବ୍ଲକ୍ ପ୍ରଶାସନ ଓ ମେଡିକାଲ କର୍ମଚାରୀଙ୍କ ସହଯୋଗରେ ଶବ ସତ୍କାର ଭଳି ଏକ ଦୁଃଖଦ ଘଟଣା ଘଟିଛି ଏହି ଅଂଚଳରେ ।
