Home ଜିଲ୍ଲା ପରିକ୍ରମା ପ୍ରଶାସନର ନଜର ଆଡୁଆଳରେ ଚାଲିଥିଲା ବେଆଇନ ମାଟି ଉତ୍ତୋଳନ, ଆଉ ଏକ ଗେଙ୍ଗୁଟି ନଦୀ ସୃଷ୍ଟି...

ପ୍ରଶାସନର ନଜର ଆଡୁଆଳରେ ଚାଲିଥିଲା ବେଆଇନ ମାଟି ଉତ୍ତୋଳନ, ଆଉ ଏକ ଗେଙ୍ଗୁଟି ନଦୀ ସୃଷ୍ଟି ଆଶଙ୍କା

13

ଭଦ୍ରକ, ୨୮ା୧୧ (ଓଡ଼ିଆ ପୁଅ / ସ୍ନିଗ୍ଧା ରାୟ) – ଧାମନଗର ତହସିଲ ଅଧିନ ଖଡିପଦା ପଞ୍ଚାୟତ କନକେଇ ଓ ବାଲୁକୁରିପାଟର ଗେଙ୍ଗୁଟି ନଦୀପଠାରୁ ପ୍ରତିଦିନ ଚୋରାରେ ଚାଲିଥିଲା ମାଟି ଓ ବାଲି ଉତ୍ତୋଳନ । ପ୍ରଶାସନର ନଜର ଆଡୁଆଳରେ ଏହି ବେଆଇନ କାର୍ଯ୍ୟ ଚାଲିଥିବା ବେଳେ ଏଥିରେ ରାଜସ୍ୱ ବିଭାଗର କେତେକ କର୍ମଚାରୀଙ୍କ ହାତ ଥିବା କୁହାଯାଇଛି । ଦୈନିକ ଏଠାରୁ ଶହଶହ ଟ୍ରିପ ମାଟି ଓ ଫିଲିଂ ବାଲି ଉତ୍ତୋଳନ କରାଯାଇ ମାଫିଆ ମାନେ ମାଲେମାଲ ହେଉଛନ୍ତି । ତହସିଲଦାର ରାଧାକାନ୍ତ ବାରିକ ଓ ଅତିରିକ୍ତ ତହସିଲଦାର ଅଭିପ୍ସା ପଟ୍ଟନାୟକ ଏବଂ ପୁଲିସ ଫୋର୍ସ ସେଠାରେ ଅଚାନକ ପହଞ୍ଚି ଚଢଉ କରିଥିଲେ । ତହସିଲଦାରଙ୍କୁ ଦେଖି ଟ୍ରାକ୍ଟର ଗୁଡିକ ଫେରାର ହୋଇଯାଇଥିବା ବେଳେ ସେଥିମଧ୍ୟରୁ ୮ଟି ଟ୍ରାକ୍ଟର ଓ ଗୋଟିଏ ଜେସିବିକୁ ଜବତ କରାଯାଇ ଥାନାରେ ଅଟକ ରଖାଯାଇଛି । ତେବେ ଜବତ ଗାଡି ଗୁଡିକରୁ ଜୋରିମାନା ଆଦାୟ କରାଯିବ ବୋଲି ତହସିଲଦାର ଶ୍ରୀ ବାରିକ ସୂଚନା ଦେଇଛନ୍ତି । ସ୍ଥାନୀୟ ଲୋକଙ୍କ ଅଭିଯୋଗ ଅନୁଯାୟୀ ଏ ଅଞ୍ଚଳଟି ଏକ ଖାଦନରେ ପରିଣତ ହୋଇଛି । ପ୍ରତିଦିନ ଦିନ ଓ ରାତି ବିଶେଷକରି ରାତିରେ ଏଠାରୁ ଜେସିବି ସହାୟତାରେ ନଦୀପଠାରୁ ମାଟି ତଢାଯାଇ ଟ୍ରିପ ଟ୍ରିପ ବିକ୍ରି ହେଉଛି । ନଦୀପଠାରୁ ଏପରି ମାଟି ଓ ଫିଲିଂ ବାଲି ଉଠାଣ ଯୋଗୁଁ ଏବେ ନଦୀ ଗାଁ ମୁହାଁ ହେଲାଣି । ପଠା ଅଞ୍ଚଳ କ୍ଷୟ ହେବାରେ ଲାଗିଛି । ନିକଟରେ ଥିବା ମା’ କନକଦୁର୍ଗା ଓ ଶିବ ମନ୍ଦିର ଏବଂ ସ୍ଥାନୀୟ ଗ୍ରାମ ପ୍ରତି ବିପଦ ଆଶଙ୍କା ରହିଛି । ଏହା ଏକ ବନ୍ୟାଞ୍ଚଳ ହୋଇଥିବାରୁ ଏହି କନକେଇରୁ ବନ୍ୟାଜଳ ବାହାରି ବ୍ଲକର ଅନ୍ୟ ସ୍ଥାନକୁ ବନ୍ୟାଜଳ ପ୍ଲାବିତ କରିଥାଏ । ଅଧିକ ମାତ୍ରାରେ ଭାରିଯାନ ଗାଁ ଭିତରେ ଦେଇ ଯାତାୟତ କରୁଥିବାରୁ ରାସ୍ତା ଅବସ୍ଥା ଶୋଚନୀୟ ହୋଇପଡିଛି । ଗାଁର ବୟସ୍କ ଓ ରୋଗୀ ବ୍ୟକ୍ତି ରାତିରେ ଶୋଇବା କଷ୍ଟକର ହେଉଥିବା ବେଳେ ଗାଡିରୁ ନିର୍ଗତ ଧୂଆଁ ବାହାରି ପରିବେଷକୁ ପ୍ରଦୁଷଣ କରୁଛି । ଛୋଟ ପିଲା ଓ ବୟସ୍କ ଲୋକ ବିଭିନ୍ନ ଚର୍ମ ରୋଗର ସ୍ୱୀକାର ହେଉଛନ୍ତି । ରାଜସ୍ୱ ବିଭାଗର କେତେକ କର୍ମଚାରୀଙ୍କ ହାତ କରି ଏହି ମାଫିଆ ମାନେ ବେଧଡକରେ ଏହି ବେଆଇନ କାରବାର ଚଳାଇ ଆସୁଛନ୍ତି । ଫଳରେ ସରକାର ଲକ୍ଷଲକ୍ଷ ଟଙ୍କାର ରାଜସ୍ୱ ହରାଉଥିବା ବେଳେ ସାଧାରଣ ଲୋକଙ୍କ ଜୀବନ ପ୍ରତି ବିପଦ ସୃଷ୍ଟି କରୁଛି । ତେବେ ଜବତ ହୋଇଥିବା ଗାଡି ଗୁଡିକର ଫିଟନେସ ଓ ଅନ୍ୟାନ୍ୟ କାଗଜପତ୍ର ଯାଞ୍ଚ ପାଇଁ ଜିଲା ପରିବହନ ବିଭାଗର ତଦନ୍ତ କରିବା ଆବଶ୍ୟକତା ରହିଛି ବୋଲି ଅଞ୍ଚଳବାସୀ ଦାବି କରିଛନ୍ତି । ସେହିପରି ବ୍ଲକର ବୈତରଣୀ, ଗେଙ୍ଗୁଟି ଓ କୋଚିଳା ନଦୀରୁ ବେଆଇନ ଭାବେ ଚୋରାରେ ବାଲି ଓ ମାଟି ଉତ୍ତୋଳନ କରାଯାଉଛି । ସ୍ଥାନୀୟ ଅଞ୍ଚଳବାସୀ ଏନେଇ ବାରମ୍ବାର ରାଜସ୍ୱ ବିଭାଗକୁ ଜଣାଇଥିଲେ ମଧ୍ୟ ସେମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ହେଉନଥିବା ଅଭିଯୋଗ ହୋଇଛି । ତେଣୁ ପ୍ରଶାସନ ଏସବୁ ବେଆଇନ କାର୍ଯ୍ୟ ପ୍ରତି ଦୃଷ୍ଟି ଦେଇ ସେମାନଙ୍କ ବିରୋଧରେ ଦୃଷ୍ଟ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ସାଧାରଣରେ ଦାବି ହେଉଛି ।

LEAVE A REPLY

Please enter your comment!
Please enter your name here

Solve this *Time limit exceeded. Please complete the captcha once again.