ଭଦ୍ରକ, ୩୦ା୩ (ଓଡ଼ିଆ ପୁଅ / ସ୍ନିଗ୍ଧା ରାୟ)- ଏହି ଜିଲାର ଧାମନଗର ନିର୍ବାଚନ ମଣ୍ଡଳୀ ପାଇଁ ଡାକ୍ତର ସଞ୍ଜୟ ଦାସଙ୍କୁ ବିଜେଡି ପ୍ରାର୍ଥୀ କରିବା ପରେ ରାଜନୈତିକ ଚର୍ଚ୍ଚା ଆରମ୍ଭ ହୋଇଯାଇଛି । ବିଜେପି କବ୍ଜାରେ ଥିବା ଏ ନିର୍ବାଚନ ମଣ୍ଡଳୀରେ ଲଢେଇ କିପରି ହେବ, ସେ ନେଇ ଲୋକଙ୍କ ମଧ୍ୟରେ ଅନେକ ଉତ୍ସୁକତା ଦେଖିବାକୁ ମିଳିଛି । ସଞ୍ଜୟ ୨୦୨୩ ଜାନୁୟାରୀ ମକର ସଂକ୍ରାନ୍ତି ଦିନ ଠାରୁ ଧାମନଗରରେ ବୁଲାବୁଲି କରୁଛନ୍ତି । ଲୋକଙ୍କ ସହ ମିଶୁଛନ୍ତି । ସେମାନଙ୍କ କାର୍ଯ୍ୟକ୍ରମରେ ସାମିଲ ହେଉଛନ୍ତି । ବିଜେଡି ସଙ୍ଗଠନ କର୍ମକର୍ତ୍ତାଙ୍କ ସହ ମିଶି କାମ କରୁଛନ୍ତି । ଡାକ୍ତରୀ ଚାକିରୀ ଛାଡି ଆସିଥିବା ସଞ୍ଜୟଙ୍କର ଏହା ଭିତରେ ଲୋକପ୍ରିୟତା ବଢିଛି । ଗ୍ରହଣୀୟତା ବି ରହିଛି । ଏବେ ବିଜୁ ଜନତା ଦଳ ପକ୍ଷରୁ ପ୍ରାର୍ଥୀ ତାଲିକା ପ୍ରକାଶ ପାଇବା ପରେ ଧାମନଗର ପାଇଁ ତାଙ୍କ ନାଁ ପ୍ରାର୍ଥୀ ଭାବେ ଥିବାରୁ ସେ ଦଳ ସୁପ୍ରିମୋ ତଥା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ, ସାଙ୍ଗଠନିକ ସଂପାଦକ ପ୍ରଣବ ପ୍ରକାଶ ଦାସ ଓ ବିଜେଡି ନେତା ଭି.କେ. ପାଣ୍ଡିଆନଙ୍କୁ କୃତଜ୍ଞତା ଜଣାଇଛନ୍ତି । ଗତ ୨ଟି ନିର୍ବାଚନରେ ବିଜେଡି ଏଠାରୁ ପରାଜିତ ହୋଇଛି । ୨୦୧୯ ବିଧାନସଭା ନିର୍ବାଚନରେ ବିଜେପିର ବିଷ୍ଣୁଚରଣ ସେଠୀ ୪୮.୪୭% ବା ୮୦ ହଜାର ୧୧୧ ଖଣ୍ଡ ଭୋଟ ପାଇ ବିଜୟୀ ହୋଇଥିଲେ । ବିଜେଡିର ରାଜେନ୍ଦ୍ର ଦାସ ୪୫.୬୭% ବା ୭୫ ହଜାର ୫୩୮ ଖଣ୍ଡ ଭୋଟ ପାଇ ଦ୍ୱିତୀୟ ସ୍ଥାନରେ ରହିଥିଲେ । ତେବେ ସେତେବେଳେ ବିଜେଡିର ଖରାପ ପ୍ରଦର୍ଶନ ଓ ପରାଜୟ ପାଇଁ ରାଜେନ୍ଦ୍ର ଦାସ ଦଳୀୟ କନ୍ଦଳ ଏବଂ କିଛି କୁଚକ୍ରୀ ଗୋଷ୍ଠୀଙ୍କ ଷଡଯନ୍ତ୍ରକୁ ଦାୟୀ କରିଥିଲେ । ପରେ ଏ ନେଇ ଏକ ଅଡିଓ ଭାଇରାଲ ମଧ୍ୟ ହୋଇଥିଲା ।
ଦୁର୍ଭାଗ୍ୟକୁ ୨୦୨୨ ରେ ଧାମନଗର ବିଧାୟକ ତଥା ବିଜେପି ନେତା ବିଷ୍ଣୁଚରଣ ସେଠୀଙ୍କ ପରଲୋକ ପରେ ଉପନିର୍ବାଚନ ହୋଇଥିଲା । ଏହି ଉପନିର୍ବାଚନରେ ବିଜେପି ପ୍ରାର୍ଥୀ ତଥା ଦିବଂଗତ ବିଧାୟକ ବିଷ୍ଣୁଚରଣ ସେଠୀଙ୍କ ପୁଅ ସୂର୍ଯ୍ୟବଂଶୀ ସୁରଜ ୪୯.୦୯% ବା ୮୦୩୫୧ ଖଣ୍ଡ ଭୋଟ ପାଇ ବିଜୟୀ ହୋଇଥିଲେ । ପ୍ରତିଦ୍ୱନ୍ଦ୍ୱୀ ପ୍ରାର୍ଥୀ ବିଜେଡିର ଅବନ୍ତୀ ଦାସ ୪୩.୦୫% ବା ୭୦୪୭୦ ଖଣ୍ଡ ଭୋଟ ପାଇ ଦ୍ୱିତୀୟ ସ୍ଥାନରେ ରହିଥିଲେ । ତେବେ ବିଜେଡିରୁ ପୁଣିଥରେ ଟିକେଟ ପାଇବାକୁ ଆଶା ରଖିଥିବା ରାଜୁ ଦାସଙ୍କୁ ଦଳ ଶେଷ ମୁହୁର୍ତ୍ତରେ ଟିକେଟ ଦେଇନଥିଲା । ଏଥିରେ ଅସନ୍ତୁଷ୍ଟ ହୋଇ ରାଜୁ ସ୍ୱାଧୀନ ପ୍ରାର୍ଥୀ ହୋଇଥିଲେ । ସେ ୮ ହଜାର ୧୫୩ ଖଣ୍ଡ ଭୋଟ୍ ନେଇଯାଇଥିଲେ । ବିଜେଡି ଭାଗରୁ ଏହି ଭୋଟ୍ ଚାଲିଯିବା ଓ ପିତାଙ୍କୁ ହରାଇବାର ଲୋକଙ୍କ ସହାନୁଭୂତି ଥିବାରୁ ସୁରଜ ବିଜୟୀ ହୋଇଥିଲେ । ଧାମନଗରରେ ବିଜେଡି ହାରିବା ସହ ସାରା ଓଡ଼ିଶାରେ ଉପନିର୍ବାଚନରେ ନବୀନଙ୍କ ନେତୃତ୍ୱରେ ଦଳ ଜିତିବାର ଯେଉଁ ରେକର୍ଡ ଥିଲା ତାହା ଏଠାରେ ଭାଙ୍ଗିଥିଲା । ଦେଢବର୍ଷ ଭିତରେ ଏ ସ୍ଥିତି ବଦଳିଛି । ସୁରଜଙ୍କ ସହିତ ଲୋକଙ୍କ ସହାନୁଭୂତି ହ୍ରାସ ପାଇଥିଲେ ବି ଭଲ ପାଇବା ରହିଛି । ସେପଟେ ଧାମନଗର ପାଇଁ ସଞ୍ଜୟ ହେଉଛନ୍ତି ନବାଗତ । ଏଠାକାର ରାଜନୀତି ସହିତ ଦୂର ଦୂର ଯାଏଁ କୌଣସି ସଂପର୍କ ନଥିଲା । ହେଲେ ଧାମନଗର ବ୍ଲକ୍ର ପୂର୍ବତନ ଚେୟାରମେନ ଅଶୋକ ନାୟକଙ୍କ ଗୋଷ୍ଠୀ ସଞ୍ଜୟଙ୍କୁ ଆଣି ବର୍ଷେ ହେଲା ଏଠାରେ ସଂଗଠନ କରୁଛନ୍ତି । ପ୍ରତ୍ୟେକ ଲୋକଙ୍କ ପାଖରେ ପହଞ୍ôଚ ଡାକ୍ତରୀ ସେବା କରୁଛନ୍ତି ସଞ୍ଜୟ । ଏବେ ଟିକେଟ ମିଳିବା ପରେ ତାଙ୍କ ଶିବିରରେ ଉତ୍ସାହ ରହିଛି । ହେଲେ ବିଜେଡିର ପୁରୁଣା ସଂଗଠନ ଏଭଳି ଏକ ନିଷ୍ପତ୍ତି ଓ ବାରମ୍ବାର ନବାଗତଙ୍କୁ ଟିକେଟ ଦେଇ ବିଜେଡି ଧାମନଗର ପ୍ରତି ଅବିଚାର କରୁଥିବା ଲୋକେ କହୁଛନ୍ତି । ନବାଗତ ବିଧାୟକ ହେଉଥିବାରୁ ତାଙ୍କୁ ମନ୍ତ୍ରୀ ପଦ ମିଳୁନାହିଁ ।
ଶେଷଥର ପାଇଁ ୨୦୦୪ ରୁ ୨୦୦୮ ଡିସେମ୍ବର ଯାଏ ମନମୋହନ ସାମଲ ବିଜେଡି-ବିଜେପି ମେଣ୍ଟ ସରକାରରେ ମନ୍ତ୍ରୀ ଥିଲେ । ତା ପରେ ଶାସକ ବିଜୁ ନତା ଦଳ ଏଠାରେ ପ୍ରାର୍ଥୀ ବଦଳାଇ ଚାଲିଛି । ନୂଆ ବିଧାୟକ ହୋଇଥିବାରୁ ମନ୍ତ୍ରୀ ମଣ୍ଡଳରେ ସ୍ଥାନ ମିଳୁନାହିଁ । ଏଣୁ ଏହାକୁ ନେଇ ସଞ୍ଜୟଙ୍କ ବିରୋଧରେ ଲୋକଙ୍କ କ୍ଷୋଭ ରହିଛି । ସେହିପରି ସଞ୍ଜୟଙ୍କ ପ୍ରାର୍ଥୀତ୍ୱକୁ ନେଇ ବିଜେଡିର ଏକାଧିକ ପୁରୁଣା ନେତା ମଧ୍ୟ ଅସନ୍ତୁଷ୍ଟ ଅଛନ୍ତି । ସଞ୍ଜୟ ଯଦି ବିଧାୟକ ହୁଅନ୍ତି, ସେ ଜଣକ ଦ୍ୱାରା ପରିଚାଳିତ ହେବା ଆଶଙ୍କା ରହିଛି । ଅଧିକାଂଶ ତୁଙ୍ଗ ନେତା ଉପରେ ନିଜର ସମର୍ଥନ ଦେଉଥିଲେ ବି ଭିତରେ ସଞ୍ଜୟଙ୍କ ପ୍ରତି ବିରୋଧଭାସ ରହିଛି । ତେବେ ବିରୋଧୀ ବିଜେପି ପ୍ରାର୍ଥୀ ଘୋଷଣା କରିବା ପରେ ଏହି ଅସନ୍ତୋଷ ଥିବା ନେତା ସେମାନଙ୍କର ପଦକ୍ଷେପ ନେଇପାରନ୍ତି । ସେପଟେ କଂଗ୍ରେସ କାହାକୁ ପ୍ରାର୍ଥୀ କରିବ ଓ ବିଜେପି, ବିଜେଡିକୁ ଟକ୍କର ଦେଇପାରିବ କି ନାହିଁ ତାହା ସମୟ କହିବ ।
