ଭଦ୍ରକ, ୧୧ା୮ (ଓଡ଼ିଆ ପୁଅ / ସ୍ନିଗ୍ଧା ରାୟ) – ଭଦ୍ରକ ସହରର ଏକ ଘରୋଇ ମେଡିକାଲର ଅପରେସନ ଟେବୁଲରେ ଜଣେ ଟ୍ୟୁମର ରୋଗୀଙ୍କର ଅସ୍ତ୍ରୋପଚାର ଟେବୁଲରେ ମୃତ୍ୟୁ ହେବା ଘଟଣା ଚର୍ଚ୍ଚାର ବିଷୟ ହୋଇଛି । ତେବେ ଏହି ଘଟଣାକୁ ନେଇ ମୃତା ମହିଳାଙ୍କ ପରିବାର, ଆତ୍ମୀୟ ସ୍ୱଜନ ଓ ଜନସାଧାରଣଙ୍କୁ ନେଇ ଦୀର୍ଘ ୬ ଘଣ୍ଟା ଧରି ଲାଗିରହିଥିବା ଆଜିର ଉତ୍ତେଜନା ତାଙ୍କୁ କ୍ଷତିପୂରଣ ଦେବାରେ ପ୍ରତିଶ୍ରୁତି ଦିଆଯିବା ପରେ ପ୍ରଶମିତ ହୋଇଛି । ପ୍ରାପ୍ତ ଖବରରୁ ଯାହା ଜଣାଯାଏ ଏହି ଜିଲାର ଧୁଷୁରୀ ଥାନା ଅଧୀନସ୍ଥ କଟସାହି ପଂଚାୟତର ଗୁହାଳିପାଳ ଗ୍ରାମନିବାସୀ ବସନ୍ତ ପାତ୍ରଙ୍କ ପତ୍ନୀ ସଂଜୁଲତାଙ୍କର ଟ୍ୟୁମର ହୋଇଥିଲା । ସେଥିପାଇଁ ସେ ଭଦ୍ରକ ସହରରେ ଥିବା ସାଳନ୍ଦୀ ହସ୍ପିଟାଲରେ ଗତକାଲି ଆଡମିଶନ ହୋଇଥିଲେ । ଗତକାଲି ରାତିରେ ତାଙ୍କର ଅପରେସନ ବେଳେ ମୃତ୍ୟୁ ହୋଇଥିବା ନେଇ ପରିବାର ଲୋକ ଅଭିଯୋଗ କରିଛନ୍ତି । ଏପରିକି ଆଜି ସକାଳେ ଏହି ଘଟଣାକୁ ନେଇ ହସ୍ପିଟାଲରେ ତୀବ୍ର ଉତ୍ତେଜନା ଦେଖାଦେଇଥିଲା । ଦୀର୍ଘ ୬ ଘଣ୍ଟା ଧରି ଏହି ଉତ୍ତେଜନା ଲାଗି ରହିଥିବାବେଳେ ଉତ୍ତ୍ୟକ୍ତ ଲୋକମାନେ ହସ୍ପିଟାଲ ପରିସରରେ ଚେୟାର, ଟେବୁଲ ଓ ଫୁଲକୁଣ୍ଡ ଭଂଗାରୁଜା କରିଥିଲେ । ଖବର ପାଇ ସିଟି ଡିଏସ୍ପି ଅଂଶୁମାନ ଦ୍ୱିବେଦୀଙ୍କ ନେତୃତ୍ୱରେ ଏକ ପୁଲିସ୍ ଟିମ୍ ସେଠାରେ ପହଞ୍ôଚ ଉତ୍ତ୍ୟକ୍ତ ଲୋକଙ୍କ ସହ ଆଲୋଚନା କରିଥିଲେ । ତେବେ ଯେପର୍ଯ୍ୟନ୍ତ ଉଚିତ୍ କ୍ଷତିପୂରଣ ଦିଆନଯାଇଛି, ସେପର୍ଯ୍ୟନ୍ତ ମହିଳାଙ୍କର ଶବ ମେଡିକାଲରୁ ନେବୁନାହିଁ ବୋଲି ଅଡି ବସିଥିଲେ ମୃତା ପରିବାର ଲୋକେ । ଶେଷରେ ମେଡିକାଲ କର୍ତ୍ତୃପକ୍ଷ, ପୁଲିସ୍ ଓ ମୃତା ମହିଳାଙ୍କ ପରିବାର ଲୋକଙ୍କ ସହିତ ଆଲୋଚନା କରିବା ପରେ ଉଚିତ୍ କ୍ଷତିପୂରଣ ଦିଆଯିବାର ପ୍ରତିଶ୍ରୁତି ଦେଇଥିଲେ । ତେବେ ଏ ସଂପର୍କରେ ସହରାଞ୍ଚଳ ଥାନାରେ ଏକ ଅପମୃତ୍ୟୁ ମାମଲା ରୁଜୁ କରାଯାଇ ତଦନ୍ତ ଆରମ୍ଭ ହୋଇଥିବା ନେଇ ସିଟି ଡିଏସ୍ପି ଶ୍ରୀ ଦ୍ୱିବେଦୀ ଗଣମାଧ୍ୟମକୁ ସୂଚନା ଦେଇଛନ୍ତି ।
