ଭଦ୍ରକ, ୨ା୮ (ଓଡ଼ିଆ ପୁଅ / ସ୍ନିଗ୍ଧା ରାୟ) – ମଙ୍ଗଳବାର ରାତି ରୁ କେନ୍ଦୁଝର ଅଞ୍ଚଳରେ ପ୍ରବଳ ବର୍ଷା ଯୋଗୁଁ ବୈତରଣୀର ବନ୍ୟାଜଳ ବୃଦ୍ଧି ପାଇଛି । ଆଖୁଆପଦା ଠାରେ ବର୍ତ୍ତମାନ ବୈତରଣୀର ବନ୍ୟାଜଳ ବିପଦ ସଂଙ୍କେତ ଉପରେ ପ୍ରବାହିତ ହେଉଥିବାରୁ ଧାମନଗର ଓ ଭଣ୍ଡାରିପୋଖରୀ ବ୍ଲକ୍ର ତଳିଆ ଅଞ୍ଚଳ ପାଇଁ ବନ୍ୟା ଜନିତ ବିପଦ ସୃଷ୍ଟି ହେବାର ଆଶଙ୍କା ଦେଖାଦେଇଛି । ସୂଚନାଯୋଗ୍ୟକି ଆଖୁଆପଦା ଠାରେ ବୈତରଣୀର ବିପଦ ସଙ୍କେତ ୧୭.୮୩ ମିଟର ଥିବା ବେଳ ଆଜି ବୁଧବାର ସଂଧ୍ୟା ୫ ଘଟିକା ସୁଦ୍ଧା ୧୯.୨୭ ଉଚ୍ଚତାରେ ଜଳ ପ୍ରବାହିତ ହେଉଅଛି । ଆଜି ବୁଧବାର ରାତ୍ର ୮ଟା ରୁ ୯ଟା ମଧ୍ୟରେ ଏହି ବନ୍ୟାଜଳ ଆଖୁଆପଦାରେ ୨୦.୫ ମିଟର ଛୁଇଁବା ଆକଳନ କରାଯାଇଛି ଏବଂ ବନ୍ୟାଜଳ ରାତ୍ର ୨ଟା ସୁଦ୍ଧା ଧାମନଗର ପହଞ୍ôଚବ । ଏହାର ମୁକାବିଲା ପାଇଁ ଜିଲ୍ଲା ଓ ସଂପୃକ୍ତ ବ୍ଲକ୍ ପ୍ରଶାସନ ସଂପୂର୍ଣ୍ଣ ପ୍ରସ୍ତୁତ ଥିବା ଜିଲ୍ଲାପାଳ ସିଦ୍ଧେଶ୍ୱର ବଳିରାମ ବୋନ୍ଦର ପ୍ରକାଶ କରିଛନ୍ତି । ଏହି ପରିପ୍ରେକ୍ଷୀରେ ତଳିଆ ଅଞ୍ଚଳରେ ଚାଳ ଛପର, ମାଟି ଘରେ ଥିବା ଲୋକମାନେ ଯଥା ପୂର୍ବରୁ ନିରାପଦ ସ୍ଥାନ ବାତ୍ୟାଶ୍ରୟ, ପକ୍କା ଘର ଆଦିକୁ ପଳାଇ ଯାଇ ଆଶ୍ରୟ ନେବାକୁ ଜିଲ୍ଲା ପ୍ରଶାସନ ତରଫରୁ ଭଣ୍ଡାରିପୋଖରୀ ଓ ଧାମନଗର ବ୍ଲକ୍ର ଜନସାଧାରଣଙ୍କୁ ନିବେଦନ କରାଯାଇଛି । ପ୍ରଶାସନ ଦ୍ୱାରା ଲୋକଙ୍କୁ ନିରାପଦ ସ୍ଥାନକୁ ସ୍ଥାନାନ୍ତରଣ ପ୍ରକ୍ରିୟାରେ ଲୋକ ପ୍ରଶାସନକୁ ସହଯୋଗ କରିବା ପାଇଁ ମଧ୍ୟ ଜିଲ୍ଲାପାଳ ଆନ୍ତରିକତାର ସହିତ ଲୋକଙ୍କୁ ବିନତି କରିଛନ୍ତି । ସୂଚନାଯୋଗ୍ୟକି ଏଥିପାଇଁ ୧ଟି ଏନ୍.ଡ଼ି.ଆର୍.ଏଫ୍ ଓ ୧ଟି ଓ.ଡ଼ି.ଆର୍.ଏଫ୍ ଦଳ ସଂପୃକ୍ତ ଅଞ୍ଚଳ ପାଇଁ ମୂତୟନ କରାଯାଇଛି । ୩୦ ସଦସ୍ୟ ବିଶିଷ୍ଟ ଏନ୍.ଡ଼ି.ଆର.ଏଫ୍. ଟିମ୍ ଧାମନଗରରେ ଉପସ୍ଥିତ ଅଛନ୍ତି । ଆଖୁଆପଦା ଆନିକଟ ନିକଟରୁ ଲୋକଙ୍କୁ ସ୍ଥାନାନ୍ତରିତ କରାଯାଇଥିବା ସୂଚନା ମିଳିଛି । ତେବେ ପରିସ୍ଥିତି ସମ୍ପୂର୍ଣ୍ଣ ନିୟନ୍ତ୍ରଣାଧିନ ଅଛି ବୋଲି ଜିଲ୍ଲାପାଳ ପ୍ରକାଶ କରିଛନ୍ତି ।
