ଭଦ୍ରକ, ୮ା୯ (ଓଡ଼ିଆ ପୁଅ / ସ୍ନିଗ୍ଧା ରାୟ) – ଭଦ୍ରକ ବ୍ଲକ ଗେଲଟୁଆ ଗ୍ରାମ ପଞ୍ଚାୟତର ନନିଗୋପାଲ ଦେବନାଥ । ସେ ଜଣେ ଭିନ୍ନକ୍ଷମ । ଭିନ୍ନକ୍ଷମ ହୋଇ ମଧ୍ୟ କେବେ ନିଜ ପରିବାର ଉପରେ ବୋଝ ହୋଇ ନାହାନ୍ତି । ନିଜ ଉଦ୍ୟମରେ ଏକ ନିର୍ମାଣ ଶ୍ରମିକ କାର୍ଡ଼ ମଧ୍ୟ କରିଥିଲେ । ଆଶା ଥିଲା, ସରକାର ଯଦି କେବେ କୌଣସି ନିର୍ମାଣ ଶ୍ରମିକ ସହାୟତା ଘୋଷଣା କରନ୍ତି, ସେ ଏହା ପାଇ ପାରିବେ । ଯାହାକି ପରିବାରର କାମରେ ଆସିବ । କିନ୍ତୁ ସରକାର ନିର୍ମାଣ ଶ୍ରମିକଙ୍କ ପାଇଁ ଘୋଷଣା କରିଥିବା କୋଭିଡ ସହାୟତା ରାଶୀ ଏପର୍ଯ୍ୟନ୍ତ ପାଇ ପାରି ନାହାନ୍ତି । ପ୍ରତ୍ୟେକ ଦିନ ବିଛଣାରେ ପଡ଼ି ରହି ବ୍ୟାଙ୍କ ମେସେଜକୁ ଅପେକ୍ଷା କରିଛନ୍ତି । ତେଣୁ ଶ୍ରମ ବିଭାଗର ଏପରି ଅବହେଳାକୁ ନେଇ ସେ ଅସନ୍ତୋଷବ୍ୟକ୍ତ କରିବା ସହ ଷ୍ଟ୍ରେଚରରେ ଯାଇ ଶ୍ର୍ରମ କାର୍ଯ୍ୟାଳୟ ସମ୍ମୁଖରେ ଧାରଣା ଦେବେ ବୋଲି କହିଛନ୍ତି । ତଥ୍ୟ ଅନୁଯାୟୀ ଏକମାତ୍ର ପୁତ୍ର, ବୋହୂ, ଝିଅ ଓ ପତ୍ନୀଙ୍କୁ ନେଇ ନନିଗୋପାଲଙ୍କ ସଂସାର । ଶାରିରୀକ ପ୍ରତିବନ୍ଧୀତା ସତ୍ତ୍ୱେ ସକାଳ ହେଲେ ଚାଲିଚାଲି ବାହାରି ଯାଆନ୍ତି ବିଭିନ୍ନ ସାହି ବସ୍ତିକୁ । ହାତରେ ଥାଏ ଏକ ତୁଳା ଭିଣିବା ପାଇଁ ସରଂଜାମ । ବୁଲି ବୁଲି ଲୋକଙ୍କ ବ୍ୟବହାର ଉପଯୋଗୀ ହୋଇ ପାରୁନଥିବା ରେଜେଇ, ତକିଆର ତୁଳାକୁ ଭିଣି ବ୍ୟବହାର ଉପଯୋଗୀ କରିଥାନ୍ତି । ଏହି ବୃତ୍ତିରୁ ଯାହା କିଛି ମିଳେ ସେଥିରେ ପରିବାର ଚଳାଇଥାନ୍ତି ।
କିନ୍ତୁ ୩ବର୍ଷ ପୂର୍ବେ ଭଦ୍ରକ କଚେରୀ ବଜାରରେ ଏକ ଦୁର୍ଘଟଣାର ସମ୍ମୁଖୀନ ହେଲେ । ଏଥିରେ ତାଙ୍କ ମେରୁଦଣ୍ଡରେ ଗୁରୁତର ଆଘାତ ଲାଗିଲା । ସେହି ଦିନ ଠାରୁ ନନିଗୋପାଲ ଶଯ୍ୟାଶାୟୀ । କୌଣସି କାମ କରି ପାରୁ ନାହାନ୍ତି । ତଥାପି ବହୁ ଲୋକ ଘର ନିକଟରେ ନିଜର ପୁରୁଣା ରେଜେଇ ତକିଆ ଧରି ପହଞ୍ଚୁଛନ୍ତି । ନନିଗୋପାଲ ମଧ୍ୟ ଏଗୁଡ଼ିକୁ ମରାମତି କରୁଛନ୍ତି । କିନ୍ତୁ ବ୍ଲକ ପ୍ରଶାସନ ଓ ଶ୍ରମ କାର୍ଯ୍ୟାଳୟ ମଧ୍ୟରେ ସମନ୍ୱୟର ଅଭାବ ପାଇଁ ନନିଗୋପାଲଙ୍କୁ ମିଳି ପାରୁନି କୋଭିଡ ସହାୟତା ରାଶୀ । ନନିଗୋପାଲ ଶଯ୍ୟାଶାୟୀ ଥିବାରୁ ତାଙ୍କ ପତ୍ନୀ ବାରମ୍ବାର ଶ୍ରମ କାର୍ଯ୍ୟାଳୟ ଓ ବ୍ଲକକୁ ଦøଡ଼ି ଦୌଡ଼ ନୟାନ୍ତ ହେଲେଣି । ତଥାପି ମିଳିପାରୁନି ଏହି ସହାୟତା ରାଶୀ । ସୂଚନାଯୋଗ୍ୟ କୋଭିଡ ମହାମାରୀ ସମୟରେ ସରକାର କୋଭିଡ ପ୍ରଥମ ଲହର ସମୟରେ ପ୍ରତ୍ୟେକ ନିର୍ମାଣ ଶ୍ରମିକଙ୍କୁ ଦେଢ଼ ହଜାର ଟଙ୍କାର ସହାୟତା ରାଶୀ ଘୋଷଣା କରିଥିଲେ । ଚଳିତ ବର୍ଷ ମଧ୍ୟ ଅନୁରୂପ ପରିମାଣର ସହାୟତା ରାଶୀ ଘୋଷଣା କରିଛନ୍ତି । ଗତ ବର୍ଷ କୋଭିଡ ସହାୟତା ରାଶୀକୁ ବ୍ଲକ ପ୍ରଶାସନ ଜରିଆରେ ନଗଦ ଆକାରରେ ପ୍ରଦାନ କରାଯିବାକୁ ନିତୀଗତ ନିଷ୍ପତ୍ତି ନିଆଯାଇଥିଲା । କିନ୍ତୁ ଚଳିତ ବର୍ଷ ଅର୍ଥାତ୍ ଦ୍ୱିତୀୟ ଲହର ସମୟରେ କେତେକ ବୈଷୟିକ କାରଣ ପାଇଁ ଏହାକୁ ସିଧାସଳଖ ହିତାଧିକାରୀଙ୍କ ବ୍ୟାଙ୍କ ଏକାଉଣ୍ଟକୁ ସହାୟତା ରାଶୀ ପଠାଇ ଦିଆଯାଇଛି । ସୂଚନାନୁଯାୟୀ ଗତବର୍ଷ ଭଦ୍ରକ ଜିଲ୍ଲାର ପ୍ରାୟ ୬ହଜାର ହିତାଧିକାରୀଙ୍କୁ ଠାବ କରିପାରିନି ଶ୍ରମ ବିଭାଗ । ତେଣୁ ବିଭିନ୍ନ ବ୍ଲକ ପ୍ରଶାସନ ଗ୍ରହଣ କରିଥିବା ଏହି ଅନାବଣ୍ଟିତ ଅର୍ଥରାଶୀ କୁ ଶ୍ରମ ବିଭାଗକୁ ଫେରାଇ ଦେଇଛନ୍ତି । କିନ୍ତୁ ଚଳିତ ବର୍ଷ ୯୦ ପ୍ରତିଶତ ହିତାଧିକାରୀଙ୍କ ବ୍ୟାଙ୍କ ଏକାଉଣ୍ଟକୁ ସହାୟତା ରାଶୀ ପଠାଇ ଦିଆଯାଇଛି ।
ତେବେ ପ୍ରଥମ କିମ୍ବା ଦ୍ୱିତୀୟ ଦଫାର ସହାୟତା ରାଶୀ ଏପର୍ଯ୍ୟନ୍ତ ମିଳି ନାହିଁ ନନିଗୋପାଲଙ୍କୁ । ଜିଲ୍ଲା ଶ୍ରମାଧିକାରୀଙ୍କ କହିବାନୁଯାୟୀ ପ୍ରଥମ ଦଫାରେ ବଣ୍ଟନ ହୋଇନଥିବା ସହାୟତା ରାଶୀ ଫେରି ଆସିଛି । କିନ୍ତୁ ବ୍ଲକ ପ୍ରଶାସନ ଆମକୁ ସହାୟତା ପାଇନଥିବା ହିତାଧିକାରୀଙ୍କ ତାଲିକା ଦେଇ ନାହିଁ । ତେଣୁ ତାଙ୍କୁ ମିଳି ପାରୁ ନାହିଁ । ଅପରପକ୍ଷେ ଭଦ୍ରକ ବ୍ଲକ ଗୋଷ୍ଠି ଉନ୍ନୟନ ଅଧିକାରୀ ମନୋଜ ବେହେରା କହିଛନ୍ତିଯେ ତତ୍କାଳୀନ ଜିଲ୍ଲାପାଳ ଜ୍ଞାନ ଦାସଙ୍କ ନିର୍ଦ୍ଦେଶର ଆମେ ସହାୟତା ରାଶୀ ପାଇଥିବା ହିତାଧିକାରୀଙ୍କ ତାଲିକା ଶ୍ରମ ବିଭାଗକୁ ବହୁ ଆଗରୁ ଦେଇ ସାରିଛୁ । ତେଣୁ କିଏ ଏଥିରୁ ବଞ୍ଚିତ ହେଲା, ତାହା ଖୋଜିବା ଦାୟିତ୍ୱ ଶ୍ରମ ବିଭାଗର । ଏହି ପରିସ୍ଥିତିରେ ଭିନ୍ନକ୍ଷମ ନନିଗୋପାଲଙ୍କୁ ସହାୟତା ରାଶୀ ମିଳିବ କି ନାହିଁ ସେଥି ନେଇ ଅନିଶ୍ଚିତତା ଲାଗି ରହିଛି । ଜିଲ୍ଲାପାଳ ଏଥିପ୍ରତି ଦୃଷ୍ଟି ଦେବାକୁ ଦାବି ହୋଇଛି ।
