କଳାହାଣ୍ଡି ତା.୧୮.୦୭.୨୦୨୧ ( ଓଡିଆପୁଅ) କଳାହାଣ୍ଡି ଜିଲ୍ଲାରେ ପ୍ରାୟ ସମସ୍ତ ଧାନ ମଣ୍ଡିରେ ଚାଷୀଙ୍କ ଧାନ ପଡିରହିଥିବା ଜଣାପଡିଛି । ଧର୍ମଗଡ ଉପଖଣ୍ଡରେ ଇନ୍ଦ୍ରାବତୀ ଜଳସେଚନ ବ୍ୟବସ୍ଥା ଥିବା ହେତୁ ରବି ଧାନ ଉତ୍ପାଦନରେ ବ୍ୟାପକ ବୃଦ୍ଧି ହୋଇଥିବା କାରଣରୁ କଳାହାଣ୍ଡି ସର୍ବାଧିକ ଧାନ ଉତ୍ପାଦନ ଜିଲ୍ଲା କ୍ରମରେ ଦ୍ୱିତୀୟ ରେ ଥିବା ବେଳେ ଯୋଗାଣ ବିଭାଗର ତ୍ରୁଟିପୂର୍ଣ୍ଣ ମଣ୍ଡି ବ୍ୟବସ୍ଥା ଯୋଗୁଁ ଚାଷୀ ମାନେ କଷ୍ଟ ଉପାର୍ଜିତ ଧାନକୁ ମଣ୍ଡି ମାନଙ୍କରେ ସୁବିଧାରେ ବିକ୍ରି କରିପାରୁନଥିବା ଅଭିଯୋଗ ହେଉଛି । ଅନ୍ୟପକ୍ଷରେ ଧାନକିଣାସଂସ୍ଥା ପାକ୍ସ ପାଖରେ ପର୍ଯ୍ୟାପ୍ତ ଗୋଦାମ ବ୍ୟବସ୍ଥା ରହିଥିଲେହେଁ ମଣ୍ଡିରୁ ଧାନ ଉଠାଣ ପାଇଁ ସର୍ବଦା ମିଲର୍ସ ଙ୍କ ଉପରେ ହିଁ ନିର୍ଭର କରୁଥିବା ଦେକାଯାଇଥାଏ ।
ଗତ ବନ୍ଦୋବସ୍ତ ପୂର୍ବରୁ ଥିବା ରେକର୍ଡ ଅନୁସାରେ ଅଣଜଳସେଚିତ ଥିବା ଜମି ଗୁଡିକ ପରବର୍ତି ପର୍ଯ୍ୟାୟରେ ଇନ୍ଦ୍ରାବତୀ କେନାଲ ଦ୍ୱାରା ଜଳସେଚନ ହେଉଥିଲେହେଁ ଚଳିତ ବନ୍ଦୋବସ୍ତରେ ପୂର୍ବଭଲି ଅଣଜଳସେଚିତ ହିଁ ଦର୍ଶାଯାଇଥିବା ହେତୁ ଅନେକ ଚାଷୀଙ୍କୁ ସେି ଜମିରୁ ଉତ୍ପାଦିତ ଧାନ ବିକିବା ପାଇଁ ପଂଜିକରଣରେ ବ୍ୟାପକ ଅସୁବିଧା ହୋଇଥିଲା । ଅନ୍ୟପକ୍ଷରେ ଟୋକନ ଇସ୍ୟୁ ହୋଇ ଧାନ ବିକିବା ପାଇଁ ପୂର୍ବରୁ ଏକମାସ ସମୟ ଦିଆଯାଉଥିବା ବେଳେ ଚଳିତ ରବି ଋତୁରେ ତାହା ସର୍ବାଧିକ ୧୫ ଦିନ ସମୟ ଦିଆଯାଇଥିବା ହେତୁ ବହୁ ଚାଷୀ ଧାନ ବିକିବାରେ ବହୁ ହଇରାଣ ହେଉଥିବା ଅଭିଯୋଗ ହେଉଛି । କେନ୍ଦ୍ର ସରକାରଙ୍କ ଚାଉଲ ସଂଗ୍ରହ ନୀତି ଅନୁସାରେ ମଣ୍ଡିକୁ ଧାନ ଆଣିବା ସହିତ ବସ୍ତା, ସୁତୁଲି ଠାରୁ ଆରମ୍ଭକରି ମଣ୍ଡି ପରିଚାଲନା ବ୍ୟବସ୍ଥା ପାଇଁ ଆବଶ୍ୟକୀୟ ପାଣ୍ଠି ବ୍ୟବସ୍ଥା କରାଯାଇଥିଲେହେଁ ରାଜ୍ୟ ସରକାର ଯୋଗାଣ ବିଭାଗ ତରଫରୁ ମଣ୍ଡି ମାନଙ୍କରେ ସେସବୁର ବିନିଯୋଗ କରାଯାଉନଥିବା ଅଭିଯୋଗ ହେଉଛି । ମଣ୍ଡି ମାନଙ୍କରେ ଆବଶ୍ୟକୀୟ ଭିତିଭୂମି ଅଭାବ ହେତୁ ଧାନକିଣା ସଂସ୍ଥା ମାନେ ସଂଲଗ୍ନିତ କଷ୍ଟମ ମିଲର୍ସଙ୍କ ଉପରେ ଭରସା କରିବାକୁ ବାଧ୍ୟ ହେଉଥିବା ଦେଖାଯାଇଥାଏ ।
ଏସବୁ ବ୍ୟତୀତ ମଣ୍ଡିମାନଙ୍କରେ ମିଲର୍ସ ମାନଙ୍କ ମର୍ଜୀରେ ଧାନ ଉଠାଣ ହେଉଥିବା କାରଣରୁ ଅସାଧୁ ମିଲର୍ସମାନେ ବିଭିନ୍ନ ଷଡଯନ୍ତ୍ର କରି ଚାଷୀଙ୍କ ଧାନ ଉଠାଣରେ ଅଯଥା ବିଲମ୍ବ କରି ଅଧିକ ପରିମାଣ ଧାନ ହରିଲୁଟ କରୁଥିବାର ମଧ୍ୟ ଅଭିଯୋଗ ହେଉଛି । କାଗଜପତ୍ରରେ ଧାନକିଣାସଂସ୍ଥା ପାକ୍ସ/ଏସଏଚଜି ଚାଷୀଙ୍କ ଧାନ କିଣୁଥିବା ବେଳେ ବାସ୍ତବ ପକ୍ଷେ ମିଲର୍ସ ହିଁ ଧାନ କିଣିଥାଏ ଏବଂ ଏହାରି ସୁଯୋଗରେ ବ୍ୟାପକ ଭାବେ ଚାଷିଙ୍କୁ ଶୋଷଣ କରାଯାଉଥିବାର ଅଭିଯୋଗ ହୋଇଥାଏ ।
ଚାଷୀ ପଂଜିକରଣରେ ବ୍ୟାପକ ଜାଲିଆତି କରାଯାଉଥିବା ବେଳେ ସଂପୃକ୍ତ ରାଜସ୍ୱ ନୀରିକ୍ଷକ ମାନଙ୍କ ସହାୟତାରେ ଅସାଧୁ ମିଲର୍ସ-ପାକ୍ସ/ଏସଏଚଜି କର୍ମକର୍ତାଙ୍କ ମଧୁଚନ୍ଦ୍ରିକା ଯୋଗୁଁ ବ୍ୟାପକ ଭାବେ ଫଲ୍ସ ଏଂଟ୍ରୀ ହେଉଥିବା ମଧ୍ୟ ଅଭିଯୋଗ ହେଉଛି ।
ଗତ ୩୦.୦୬.୨୦୨୧ ଦିନ ମଣ୍ଡି ବନ୍ଦ ହେବାପରେ ମଧ୍ୟ ମଣ୍ଡି ମାନଙ୍କରେ ଅନେକ ଚାଷୀଙ୍କ ଧାନ ପଡିରହିଛି । ସେସବୁ କିପରି ଭାବେ ବିକ୍ରୀ କରାଯିବ ତାହା ସନ୍ଦେହଜନକ ମନେହୁଏ । ବିଗତ ଦୁଇ ବର୍ଷ ତଳେ ଜୁନାଗଡ ବ୍ଲକ ହାବସପୁର ମଣ୍ଡିରେ ଜନୈକ ଚାଷିଙ୍କ ରବିଋତୁର ଧାନକୁ ସେପଟେମ୍ବର ମାସରେ ଯୋଗାଣ ବିଭାଗ ତତ୍ୱାବଧାନରେ ବିକ୍ରୀ କରାଯାଇଥିଲା ଏବଂ ସେହି ଧାନ କେଉଁ କ୍ରୟସଂସ୍ଥାର ଖାତାରେ ସଂଯୋଗ କରାଗଲା, କେଉଁ ହିସାବରେ ଚାଉଲ ଉଠାଣ କରାଗଲା ତାହାର ହିସାବ ଯେଗାଣ ବିଭାଗ ପାଖରେ ନାହିଁ ।
ସେହିପରି ବିଗତ ବର୍ଷ ର ଖରିଫ ଓ ରବିରେ ମଣ୍ଡି ବନ୍ଦ ହେବାପରେ ମଧ୍ୟ ଅନେକ ଚାଷୀଙ୍କ ଧାନ କୁ ଯୋଗାଣ ବିଭାଗ ତରଫରୁ ବ୍ୟବସ୍ଥା କରାଯାଇ କମ ମୂଲ୍ୟରେ ବିକ୍ରୀ କରାଯାଇଥିବାର ଚାଷୀ ମାନଙ୍କ ସୂତ୍ରରୁ ଜଣାପଡିଛି । ତେବେ ସେହି ଧାନ ସବୁ କେଉଁ କ୍ରୟସଂସ୍ଥାର ଖାତାରେ ସଂଯୋଗ କରାଗଲା, କେଉଁ ହିସାବରେ ଚାଉଲ ଉଠାଣ କରାଗଲା ସେହି ଧାନ ବିକ୍ରୀର ମାର୍କେଟ ଫିଜ ଅସୁଲି କରାଗଲା କି ନାହିଁ ଇତ୍ୟାଦି ର ହିସାବ କିପରି ମିଳିବ ତାହା ମୂଖ୍ୟ ପ୍ରଶ୍ନବାଚୀ ସୃଷ୍ଟି ହେଉଛି । ଇତିମଧ୍ୟରେ ଦାସିଗାଁ ଧାନମଣ୍ଡିର ଧାନ ସବୁକୁ ଦଲାଲ ମାଧ୍ୟମରେ କମ ମୂଲ୍ୟରେ କିଣାଯାଇ ଚାଲାଣ କରାଯାଉଥିବା ବେଳେ ତାହା ସ୍ଥାନୀୟ ଚାଷୀ ମାନଙ୍କ ଦ୍ୱାରା ଅଟକ ରଖାଯାଇଥିବା ଜଣାପଡିଥିଲା । ଅଦ୍ୟାବଧି ଅନେକ ଚାଷୀଙ୍କ ଟୋକନ ଲାପ୍ସ, ଟୋକନ ଆସିନଥିବା ଏବଂ ଚାଷିପଂଜିକରଣରେ ଅସୁବିଧା ହୋଇଥିବା ଚାଷୀଙ୍କ ଧାନ ସବୁ ମଣ୍ଡିରେ ପଡିରହିଥିବା ବେଳେ ତାହା ଯୋଗାଣ ବିଭାଗର ମୁଣ୍ଡବିନ୍ଧାର କାରଣ ହୋଇଛି । ସେସବୁ ଧାନକୁ ଯେଣତେଣ ପ୍ରକାରେ ଉଠାଣ କରିଦେବାକୁ କିଛି ଅସାଧୁ ପଦାଧିକାରୀ ଓ ଅସାଧୁ ମିଲର୍ସ ମାନଙ୍କ ମଧୁଚନ୍ଦ୍ରିକା ହୋଇ କମ ମୂଲ୍ୟରେ ଧାନ ଉଠାଣ କରିଦେବାକୁ ଚକ୍ରାନ୍ତ କରୁଥିବା ଜଣାପଡିଛି ।
ହେଲେ ବିଗତ ବର୍ଷ ମାନଙ୍କରେ ଏଭଲି ଭାବେ କମ ଦରରେ କିଣାଯାଇ ଧାନ ଉଠାଣ କରାଯାଇଥିବା ବେଳେ ସେସବୁର ହିସାବପତ୍ର ମିଳୁନଥିବା ବେଳେ ଚଳିତ ବର୍ଷ ହଜାର ହଜାର କ୍ୱିଂଟାଲ ଧାନ ବିନା କାଗଜାତରେ କମଦରରେ ଆପୋଷ ବୁଝାମଣା ମାଧ୍ୟମରେ କିଣାଯାଇ କିପରି ଭାବେ ହିସାବକୁ ଅଣାଯିବ ତାହା ପ୍ରଶ୍ନବାଚୀ ସୃଷ୍ଟି କରୁଛି । ଏସବୁ କାରବାରରେ ଫଲ୍ସ ଏଂଟ୍ରୀ ହିଁ ଏକମାତ୍ର ରାସ୍ତା ଏବଂ ଗତବର୍ଷର କମଦରରେ କିଣାଯାଇଥିବା ଧାନକୁ ଚଳିତ ବର୍ଷ ଫଲ୍ସ ଏଂଟ୍ରୀ ମାଧ୍ୟମରେ କାଗଜାତ କରାଯାଇଥିବା ସନ୍ଦେହକୁ ଏଡାଇ ଦିଆଯାଇନପାରେ । ଯୋଗାଣ ବିଭାଗ ସାମନାରେ ଏଭଲି ଏକ କୋଟୀ କୋଟୀ ଟଙ୍କାର ବାଟମାରଣା ଷଡଯନ୍ତ୍ର ସଂପର୍କରେ କେନ୍ଦ୍ର ସରକାରଙ୍କ ଦ୍ୱାରା ଏକ ନିରପେକ୍ଷ ତଦନ୍ତ କରାଗଲେ ବହୁ ଗୋନୀୟ ତଥ୍ୟ ପଦାକୁ ଆସିପାରିବ ବୋଲି ଚାଷି ମହଲରେ ଦାବୀ ହେଉଛି ।
