ଭଦ୍ରକ, ୨୯ା୧୨ (ଓଡ଼ିଆ ପୁଅ / ସ୍ନିଗ୍ଧା ରାୟ) – ଭଦ୍ରକ ଜିଲ୍ଲାରେ କୋବିଡ଼ ପରବର୍ତ୍ତୀ ସ୍ଥିତିର ସମୀକ୍ଷା ପାଇଁ ଭଦ୍ରକ ଜିଲ୍ଲା କୋବିଡ଼ ପରିଚାଳନାର ପ୍ରମୁଖ ଦାୟିତ୍ୱରେ ଥିବା ରାଜ୍ୟ ବାଣିଜ୍ୟ ପରିବହନ ବିଭାଗର ପ୍ରମୁଖ ଶାସନ ସଚିବ ମଧୁସୂଦନ ପାଢୀ ଆଜି ଭଦ୍ରକ ଗସ୍ତରେ ଆସିଥିଲେ । ଜିଲ୍ଲାପାଳଙ୍କ ସଦ୍ଭାବନା ସଭାଗୃହରେ ସମୀକ୍ଷା ବୈଠକରେ ଯୋଗ ଦେଇ କୋବିଡ଼ ନିୟନ୍ତ୍ରଣାଧୀନ ହୋଇଥିବା ବେଳେ ଏହା ପରବର୍ତ୍ତୀ ଜୀବନଜୀବିକା କିପରି ଚାଲିଛି ସେ ନେଇ ପଚାରି ବୁଝିଥିଲେ । ଭଦ୍ରକରେ କୋବିଡ ହସ୍ପିଟାଲ ଥିବା ସାଳନ୍ଦୀ ହସ୍ପିଟାଲକୁ ବନ୍ଦ କରାଯାଇ ଏକ ୩୨ ଶଯ୍ୟା ବିଶିଷ୍ଟ କୋବିଡ ହସ୍ପିଟାଲ ଜିଲ୍ଲା ମୁଖ୍ୟ ଚିକିତ୍ସାଳୟରେ କାର୍ଯ୍ୟକ୍ଷମ ହୋଇଥିବା ନେଇ ସନ୍ତୋଷ ପ୍ରକଟ କରିଥିଲେ । କୋବିଡ଼ ପରେ ଲୋକେ ଯେପରି ସ୍ୱାଭାବିକ ଜୀବନ ଜୀବିକାକୁ ଫେରି ପାରି ସେ ନେଇ ସରକାରଙ୍କ ବିଭିନ୍ନ ଯୋଜନା ଗୁଡିକର ସଫଳ କାର୍ଯ୍ୟକାରିତା ଉପରେ ଗୁରୁତ୍ୱାରୋପ କରିଥିଲେ । ଜିଲ୍ଲାର କୃଷି ଉତ୍ପାଦନ ବୃଦ୍ଧି, ଛତୁଚାଷ, ମାଛ ଚାଷ, କୁକୁଡା ଚାଷ, କୃଷି ଉଦ୍ୟୋଗରେ ଚାଷୀଙ୍କୁ ଋଣ ଯୋଗାଣ, ମନରେଗା ମାଧ୍ୟମରେ ଅଧିକ ଶ୍ରମଦିବସ ସୃଷ୍ଟି କରି ଅଧିକରୁ ଅଧିକ ଶ୍ରମିକଙ୍କୁ କାର୍ଯ୍ୟ ଯୋଗାଇବା ଉପରେ ପଦକ୍ଷେପ ନେବାକୁ ପରାମର୍ଶ ଦେଇଥିଲେ । ବଳରାମ ଯୋଜନାରେ ଭାଗଚାଷୀମାନଙ୍କୁ ପ୍ରୋତ୍ସାହିତ କରିବାକୁ ପରାମର୍ଶ ଦେଇଥିଲେ । ଯୁଦ୍ଧକାଳୀନ ଭିତ୍ତିରେ ସମସ୍ତ କାର୍ଯ୍ୟକୁ ଆଗେଇ ନେବାକୁ ପ୍ରମୁଖ ଶାସନ ସଚିବ ଶ୍ରୀଯୁକ୍ତ ପାଢୀ ପରାମର୍ଶ ଦେଇଥିଲେ । ଏହି ବୈଠକରେ ଜିଲ୍ଲାପାଳ ଡ. ଜ୍ଞାନ ଦାସ, ଅତିରିକ୍ତ ଜିଲ୍ଲାପାଳ ଶ୍ୟାମଭକ୍ତ ମିଶ୍ର, ଜିଲ୍ଲା ଗ୍ରାମ୍ୟ ଉନ୍ନୟନ ପ୍ରକଳ୍ପ ନିର୍ଦ୍ଦେଶକ ମଧୁସୂଦନ ଦାସ, ବିଭିନ୍ନ ବିଭାଗୀୟ ଅଧିକାରୀମାନେ ଯୋଗ ଦେଇଥିଲେ ।
