ହାଟଡିହି-୨/୫, ହାଟଡିହି ବ୍ଲକ ଶାଳଣିଆଁ ପଞ୍ଚାୟତରେ ମନରେଗା ଯୋଜନାରେ ଦୁର୍ନିତିର ଗନ୍ଧ ବାରିହୋଇ ପଡୁଛି । ଏହି ପଞ୍ଚାୟତରେ ଏବେ ମନରେଗା ଯୋଜନା ପାଇଁ ପ୍ରକଳ୍ପ ଅନୁମୋଦନ ହୋଇଥିବାବେଳେ ସେôତରେ ବ୍ୟାପକ ଅନିୟମିତତା ହୋଇଥିବା ଅଭିଯୋଗ ହୋଇଛି । ଜଣେ ଜଣେ ବ୍ୟକ୍ତି ପୁର୍ବରୁ ଲ୍ୟାଣ୍ଡ ଡେଭଲପମେଣ୍ଟ, ମୋ ପୋଖରୀ ନେଇଥିବାବେଳେ ଏବେ ପୁନର୍ବାର ନିଜ ନାମ ସହିତ ନିଜ ନିଜର ସମ୍ପର୍କୀୟଙ୍କ ନାମରେ ହାତେଇବାରେ ସକ୍ଷମ ହୋଇଛନ୍ତି । ଏହି ଯୋଜନାରେ ଜଣେ ବ୍ୟକ୍ତି ଗୋଟିଏ ଯୋଜନାରେ ସାମିଲ ହୋଇପାରିବାକୁ ନିୟମ ଥିବାବେଳେ କିପରି ବର୍ଷକୁ ବର୍ଷ ଯୋଜନାକୁ ହାତୋଉଛନ୍ତି ତାହାକୁ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି । ଏପରିକି କେତେକ ପ୍ରକଳ୍ପର କାମ ଆରମ୍ଭ ହୋଇନଥିବାବେଳେ କାମ ହେଉଥିବା ଦର୍ଶାଇ ମଷ୍ଟରରୋଲ ବାହାର କରିସାରିଲେଣି । ଏ ସମ୍ପର୍କରେ କନିଷ୍ଠଯନ୍ତ୍ରୀଙ୍କୁ ପଚାରିବାରେ ସେ ଏବାବଦରେ ଜାଣି ନଥିବା କହୁଥିବାବେଳେ ପଞ୍ଚାୟତର ଜିଆରଏସ ମଧ୍ୟ କାମ ବାବଦରେ ସମ୍ପୁର୍ଣ୍ଣ ଅଜ୍ଞ ବୋଲି କହିଛନ୍ତି । ସେହିପରି ସରପଞ୍ଚଙ୍କୁ ପଚାରିବାରେ କେଉଁଠି କଣ କାମ ହେଉଛି ତାହା ତାଙ୍କୁ ଜଣାଯାଉ ନାହିଁ ବୋଲି କହିଛନ୍ତି । ଏଠାରେ ପ୍ରଶ୍ନ ଉଠେ ଯେ ଯଦି ମନରେଗା କାମ ବାବଦରେ ଜିଆରଏସ କିମ୍ବା କନିଷ୍ଠଯନ୍ତ୍ରୀ ଜାଣି ନାହାନ୍ତି ତେବେ କାର୍ଯ୍ୟାଦେଶ କିଏ ଦେଉଛି ଓ କିପରି ପଞ୍ଚାୟତରେ କାର୍ଯ୍ୟ ହେଉଛି ତାହାର ତଦନ୍ତ ହେବା ନିହାତି ଜରୁରି ବୋଲି ସାଧାରଣରେ ଦାବି ହେଉଛି ।
